ຂ່າວຫຼ້າສຸດ

ບັນຫາປິ່ນອ້ອມ ເຂົ້າພັນສາສຶກສາທຳ

2.997 12 ສ.ຫ. 2019 ນານາສາລະ

    ສ່ວນ​ຕົວ​ຜູ້​ຂຽນ​ມີ​ຄວາມ​ເຂົ້າ­ໃຈ​ວ່າ: ຂຽນ​ໃຫ້​ສັງ­ຄົມ​ໄດ້​ອ່ານ​ແລ້ວ​ເກີດ​ຄວາມ​ຮູ້ ຄວາມ​ເຂົ້າ­ໃຈ​ໃນ​ທາງ​ເກີດ​ປະ­ໂຫຍດ​ແກ່​ສ່ວນ​ລວມ​ແລ້ວ ຈຶ່ງ​ບໍ່​ມີ​ຄວາມ​ກັງ­ວົນ​ສົງ­ໄສ​ທີ່​ຈະ​ນຳ​ເອົາ​ຫຼັກ​ທຳ​ມະ​ສະ­ເໜີ​ໃຫ້​ແຟນ​ຄໍ​ລຳ​ໄດ້​ອ່ານ​ເພື່ອ​ເປັນ​ອາ­ຫານ​ສະ­ໝອງ​ນຳ​ພາ­ໃຫ້​ຫົວ​ໃຈ­ເຢັນ ແລະ ສະ­ຫງົບ​ຫຼາຍ​ຂຶ້ນ​ຈາກ​ກະ­ແສ​ເສດ­ຖະ­ກິດ​ບີບ​ຮັດ ຫຼັກ​ທາງ​ສິນ​ລະ​ທຳ​ໃນ​ພຸດ​ທະ​ສາ­ສະ­ໜາ​ນັ້ນ ສຳ­ລັບ​ຜູ້​ສຶກ​ສາ​ທຳ​ມະ​ພໍ­ກະ­ເທີນ​ກໍ​ຈະ​ເຂົ້າ­ໃຈ​ຜິດ​ທັນ­ທີ​ໂລດ​ວ່າ ພະ­ພຸດ­ທະ­ເຈົ້າ​ສອນ​ໃຫ້​ມັກ​ນ້ອຍ​ສັນ­ໂດດ​ຢ່າງ​ດຽວ.

    ການ​ເຂົ້າ­ໃຈ​ຜິດ​ແຕ່​ເລີ່ມ​ຕົ້ນ​ຈຶ່ງ​ກໍ່­ໃຫ້­ເກີດ​ຜູ້­ກ່ຽວ​ບໍ່​ຢາກ​ສຶກ​ສາ​ທຳ​ມະ ທັງໆ​ທີ່​ພະ­ພຸດ­ທະ­ເຈົ້າ​ບໍ່​ເຄີຍ​ສອນ​ໃຫ້​ຊາວ­ບ້ານ​ມັກ​ນ້ອຍ ແຕ່​ເພິ່ນ​ສອນ​ໃຫ້​ແຕ່​ພະ­ສົງ​ມັກ​ນ້ອຍ​ສັນ­ໂດດ ແລະ ຫຼາຍ​ຄົນ​ກໍ​ຍັງ​ເຂົ້າ­ໃຈ​ຜິດ​ເລື່ອງ​ສັນ­ໂດດ​ປົນ​ກັນ​ນຳ​ອີກ ເຊິ່ງ​ຄວາມ​ຈິງ​ຄຳ​ວ່າ: ສັນ­ໂດດ ກໍ​ຄື ການ​ຂົນ­ຂວາຍ​ສະ­ແຫວງ­ຫາ​ຊັບ​ຕາມ​ກຳ­ລັງ​ຄວາມ​ສາ­ມາດ ແລະ ໃຫ້​ໄດ້​ມາ​ດ້ວຍ​ຄວາມ​ສຸດ­ຈະ­ລິດ ດັ່ງ­ນັ້ນ ຊີ­ວິດ​ຂອງ​ຊາວ­ບ້ານ​ຈະ​ມີ​ເຮືອນ​ຫຼູ​ຫຼາ​ລ້ຳ​ລວຍ​ພຽງ​ໃດ​ກໍ​ເປັນ​ທີ່​ໜ້າ​ຊື່ນ​ຊົມ ຖ້າ​ຫາກ​ວ່າ­ຄວາມ ລ້ຳ​ລວຍ ແລະ ຊັບ​ສິນ​ດັ່ງ­ກ່າວ​ໄດ້​ມາ​ດ້ວຍ​ກຳ­ລັງ​ຂອງ​ຄວາມ​ສຸດ­ຈະ­ລິດ ຂ້າງ​ເທິງ​ນີ້​ຄື​ຫົວ­ໃຈ​ຂອງ​ຄຳ​ວ່າ​ສັນ­ໂດດ ເຊິ່ງ​ພະ­ພຸດ­ທະ­ເຈົ້າ​ໄດ້​ສອນ​ໄວ້​ທັງ​ພະ ແລະ ຊາວ­ບ້ານ.

    ຫາກ​ເວົ້າ​ເຖິງ​ການ​ສຶກ​ສາ​ທຳ​ມະ​ທາງ​ພຸດ​ທະ​ສາ­ສະ­ໜາ​ຈະ​ເນັ້ນ​ໃຫ້​ສຶກ​ສາ​ໄຕ່​ລະ­ດັບ​ຂຶ້ນ​ເລື້ອຍໆ ເຊັ່ນ​ຍົກ​ຕົວ­ຢ່າງ: ທຳ​ມະ​ໝວດ 2-3-4-5...ສຳ­ລັບ​ຄະ­ລາ­ວາດ (ປະ­ຊາ­ຊົນ) ກໍ​ຕ້ອງ​ສຶກ​ສາ​ທຳ​ມະ​ໃຫ້​ຖືກ​ທາງ​ເໝາະ​ສົມ​ກັບ​ໜ້າ­ທີ່ ແລະ ອາ­ຊີບ​ຂອງ​ຕົນ ຍົກ​ຕົວ­ຢ່າງ: ຫຼັກ​ທຳ​ມະ 4 ປະ­ການ​ສຳ­ລັບ​ຊີ­ວິດ​ຄູ່​ຄອງ​ຜົວ-ເມຍ ທີ່​ເອີ້ນ​ວ່າ ທຳ​ມະ​ສຳ­ລັບ​ການ​ຄອງ​ເຮືອນ ຄື: 1. ສັດ­ຈະ ເປັນ​ຫົວ­ຂໍ້​ທຳ​ມະ​ທີ່​ສຳ­ຄັນ​ມາ​ທີ​ໜຶ່ງ​ຂອງ​ຊີ­ວິດ ຄູ່​ທີ່​ພະ­ພຸດ­ທະ­ເຈົ້າ​ນຳ​ມາ​ສອນ​ທັນ­ທີ​ໂລດ​ວ່າ ຊີ­ວິດ​ຄອບ­ຄົວ (ຜົວ-ເມຍ) ຕ້ອງ​ຖື​ເລື່ອງ​ສັດ­ຈະ ຈິງ​ໃຈ ເປີດ­ເຜີຍ​ຕໍ່​ກັນ.

2. ທະ​ມະ ແປ​ວ່າ ເຝິກ ຂົ່ມ​ໃຈ ດັດ­ນິ­ໄສ​ຂອງ​ຕົນ​ໃຫ້​ດີ​ຂຶ້ນ ເພາະ​ຊີ­ວິດ​ຄູ່​ຕ້ອງ​ມີ​ການ​ປ່ຽນ­ແປງ​ໃສ່​ກັນ.

3. ຂັນ​ຕິ ຄື: ຄວາມ​ອົດ­ທົນ​ໃນ​ໜ້າ­ທີ່​ວຽກ​ງານ​ຂອງ​ຕົນ ບໍ່​ໃຫ້​ຈິດ­ໃຈ​ຫວັ່ນ­ໄຫວ ຫຼື ເສືອກ​ສົນ​ໄປ​ໃນ​ທາງ​ນອກ​ຄອກ​ວຸ້ນ­ວາຍ.

4. ຈາ­ຄະ ຄື: ຄວາມ​ເສຍ­ສະ­ຫຼະ ຄື: ຕ່າງ​ຝ່າຍ​ຕ້ອງ​ໃຈ­ກວ້າງ​ພ້ອມ​ເປີດ​ໃຈ​ຮັບ​ຟັງ​ຄຳ​ອະ­ທິ­ບາຍ ຟັງ​ເຫດ­ຜົນ ບໍ່​ເຫັນ­ແກ່​ໂຕ ເອົາ​ແຕ່​ໃຈ​ໂຕ​ເອງ.

    ສັງ​ລວມ​ໄດ້​ວ່າ: ບົດ​ນີ້​ເປັນ​ຫົວ­ຂໍ້​ທຳ​ມະ​ເພື່ອ​ສຶກ​ສາ​ຕໍ່​ຈາກ​ບົດ​ກ່ອນ ສຳ­ລັບ​ຊາວ​ພຸດ​ລາວ​ທີ່​ເອີ້ນ​ຕົນ​ວ່າ​ນັບ­ຖື​ພຸດ​ທະ​ສາ­ສະ­ໜາ ຍ່ອມ​ຕ້ອງ​ຮູ້​ຫຼັກ​ຄຳ​ສອນ​ເພື່ອ​ນຳ­ໄປ​ປະ­ຕິ­ບັດ​ໃຫ້​ເກີດ​ຄວາມ­ສຸກ ແລະ ຍຸ­ຕິ​ທຳ ບໍ່​ເອົາ​ປຽບ​ຄົນ​ອື່ນ !.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ