ຂ່າວຫຼ້າສຸດ

ນາຍົກລັດຖະມົນຕີ ຊຸກຍູ້ການພັດທະນາຢູ່ເມືອງວັງວຽງ

521 12 ສ.ຫ. 2019 ຂ່າວໜ້າ​ໜຶ່ງ
ນາຍົກລັດຖະມົນຕີ ຊຸກຍູ້ການພັດທະນາຢູ່ເມືອງວັງວຽງ

    ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ແລະ ເຈົ້າ­ແຂວງ​ວຽງ​ຈັນ ລົງ​ຢ້ຽມ­ຢາມ ແລະ ຊຸກ­ຍູ້​ການ​ພັດ­ທະ­ນາ​ຢູ່​ເມືອງ​ວັງ​ວຽງ ແຂວງ​ວຽງ​ຈັນ ວັນ​ທີ 8 ສິງ­ຫາ 2019 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ຄຳ​ຜອງ ດວງ​ວິ­ໄລ ເຈົ້າ­ເມືອງ​ວັງ​ວຽງ ແລະ ພາກ­ສ່ວນ​ກ່ຽວ­ຂ້ອງ.

    ທ່ານ​ນາ­ຍົກ­ລັດ­ຖະ­ມົນ­ຕີ ພ້ອມ​ຄະ­ນະ ໄດ້​ໄປ​ຢ້ຽມ­ຢາມ ແລະ ຕິດ­ຕາມ​ການ​ກໍ່­ສ້າງ​ສະ­ຖາ­ນີ​ລົດ­ໄຟ ລາວ-ຈີນ ຈຸດ​ວັງ​ວຽງ ເຊິ່ງ​ເສັ້ນ­ທາງ​ລົດ­ໄຟ ລາວ-ຈີນ ຜ່ານ​ແຂວງ​ວຽງ​ຈັນ ຍາວ 145 ກິ­ໂລ­ແມັດ ຜ່ານ 4 ເມືອງ 60 ບ້ານ ມີ​ຜູ້​ໄດ້​ຮັບ​ຜົນ​ກະ­ທົບ 1.589 ຄອບ­ຄົວ ປັດ­ຈຸ­ບັນ ໄດ້​ໄກ່​ເກ່ຍ​ທີ່​ດິນ ແລະ ສິ່ງ​ກີດ­ຂວາງ​ຄືບ​ໜ້າ 99% ແລະ ກຳ­ລັງ​ສືບ­ຕໍ່​ດຳ­ເນີນ​ການ​ຊົດ​ເຊີຍ​ໃຫ້​ຜູ້​ໄດ້​ຮັບ​ຜົນ​ກະ­ທົບ ສຳ­ລັບ​ສະ­ຖາ­ນີ​ລົດ­ໄຟ​ວັງ​ວຽງ ຕັ້ງ​ຢູ່​ບ້ານ​ຫ້ວຍ​ສະ​ເຫງົ້າ-ພູ​ດິນ​ແດງ ມີ​ເນື້ອ­ທີ່ 144 ກວ່າ​ເຮັກ­ຕາ ໃນ​ນີ້ ສະ­ເພາະ​ເນື້ອ­ທີ່​ອາ­ຄານ​ສະ­ຖາ­ນີ 5.000 ຕາ​ແມັດ ສາ­ມາດ​ຮອງ​ຮັບ​ຜູ້­ໂດຍ­ສານ​ໄດ້ 600 ຄົນ ເຊິ່ງ​ໄດ້​ສຳ­ເລັດ​ການ​ອອກ​ແບບ ບຸກ­ເບີກ​ພື້ນ​ທີ່ ແລະ ກະ ກຽມ​ດຳ­ເນີນ​ການ​ກໍ່­ສ້າງ ໂດຍ​ຄາດ​ວ່າ​ຈະ​ສຳ­ເລັດ ໃນ​ປີ 2021.

    ໂອ­ກາດ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ ກໍ​ໄດ້​ເນັ້ນ​ໜັກ​ໃຫ້​ຜູ້​ພັດ­ທະ­ນາ​ໂຄງ­ການ ເອົາ­ໃຈ­ໃສ່​ປະ­ຕິ­ບັດ​ວຽກ​ງານ​ໃຫ້​ສຳ­ເລັດ​ຕາມ​ແຜນ­ການ ແລະ ມີ​ຄຸນ​ນະ​ພາບ ການ​ກໍ່­ສ້າງ​ໃຫ້​ເປັນ​ໄປ​ຕາມ​ການ​ອອກ​ແບບ​ທີ່​ໄດ້​ຮັບ­ຮອງ ສິ່ງ​ສຳ­ຄັນ​ໂຄງ​ສ້າງ​ຕ່າງໆ​ຕ້ອງ​ໃຫ້​ກົມ​ກືນ​ກັບ​ທຳ​ມະ​ຊາດ ກໍ​ຄື ແຫຼ່ງ​ທ່ອງ​ທ່ຽວ​ຂອງ​ເມືອງ​ວັງ​ວຽງ.

    ຈາກ​ນັ້ນ ກໍ​ໄດ້​ໄປ​ຢ້ຽມ­ຢາມ​ສູນ​ບໍ­ລິ­ການ​ເຕັກ­ນິກ​ກະ­ສິ­ກຳ ແລະ ໄດ້​ຊີ້​ນຳ​ໃຫ້​ສູນ​ດັ່ງ­ກ່າວ ເອົາ­ໃຈ­ໃສ່​ການ​ປູກ​ພືດ-ຜັກ​ປອດ​ສານ­ພິດ ພືດ​ລົ້ມ​ລຸກ ໂດຍ​ໃຫ້​ຕິດ​ພັນ​ກັບ​ການ​ສົ່ງ­ເສີມ​ການ­ທ່ອງ­ທ່ຽວ ຢ້ຽມ­ຢາມ​ສະ­ຖານ­ທີ່​ທ່ອງ​ທ່ຽວ​ທຳ​ມະ​ຊາດ​ຖ້ຳ​ນາງ​ຟ້າ ແລະ ຖ້ຳ​ນອນ ໂດຍ​ໄດ້​ເນັ້ນ​ໃຫ້​ຜູ້​ພັດ­ທະ­ນາ ເອົາ­ໃຈ­ໃສ່​ອະ­ນຸ​ຮັກ​ທຳ​ມະ​ຊາດ ແລະ ຄວາມ​ປອດ​ໄພ​ໃຫ້​ນັກ​ທ່ອງ​ທ່ຽວ.

    ທ່ານ ຄຳ​ຜອງ ດວງ​ວິ­ໄລ ໄດ້​ລາຍ​ງານ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຂອງ​ເມືອງ​ວັງ​ວຽງ ໄລ­ຍະ 6 ເດືອນ​ຜ່ານ​ມາ ເຊິ່ງ​ເມືອງ​ວັງ​ວຽງ​ສືບ­ຕໍ່​ມີ​ຄວາມ​ສະ­ຫງົບ ແລະ ເປັນ​ລະ­ບຽບ​ຮຽບ​ຮ້ອຍ​ໂດຍ​ພື້ນ­ຖານ ເສດ­ຖະ­ກິດ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ດ້ານ​ການ​ສຶກ​ສາ ແລະ ວັດ­ທະ­ນະ­ທຳ ຕິດ​ພັນ​ກັບ​ການ​ພັດ­ທະ­ນາ​ຊົນ ນະ​ບົດ ແລະ ລຶ­ບລ້າງ​ຄວາມ­ທຸກ​ຍາກ​ຂອງ​ປະ­ຊາ­ຊົນ ກໍ​ນັບ​ມື້​ດີ​ຂຶ້ນ​ເປັນ​ກ້າວໆ.

    ທ່ານ​ນາ­ຍົກ​ໄດ້​ສະ­ເໜີ​ໃຫ້​ບັນ­ດາ​ທ່ານ​ລັດ­ຖະ­ມົນ­ຕີ​ກະ­ຊວງ​ກ່ຽວ­ຂ້ອງ ຊີ້​ແຈງ​ບາງ​ບັນ­ຫາ​ທີ່​ເມືອງ​ສະ­ເໜີ ແລະ ບາງ​ບັນ­ຫາ​ພົ້ນ​ເດັ່ນ ເປັນ­ຕົ້ນ ການ​ປ້ອງ​ກັນ ແລະ ແກ້​ໄຂ​ການ​ລະ­ບາດ​ຂອງ​ພະ­ຍາດ​ໄຂ້­ເລືອດ­ອອກ ການ​ສົ່ງ­ເສີມ​ການ​ຜະ­ລິດ​ກຳ​ສິ​ກຳ​ອິນ​ຊີ ການ​ປູກ​ພືດ​ປອດ​ສານ­ພິດ ຕິດ​ພັນ​ກັບ​ການ​ຊຸກ­ຍູ້​ສົ່ງ­ເສີມ​ການ­ທ່ອງ­ທ່ຽວ ການ​ຕິດ­ຕາມ​ເຝົ້າ​ລະ­ວັງ​ການ​ລະ­ບາດ ຂອງ​ພະ­ຍາດ​ອາ​ຫິ​ວາ​ໝູ​ອາ​ຟຣິ​ກາ ການ​ສ້າງ ແລະ ປັບ­ປຸງ​ເສັ້ນ­ທາງ​ເຂົ້າ​ແຫຼ່ງ​ທ່ອງ​ທ່ຽວ ແລະ ການ​ຊົດ​ເຊີຍ​ໃຫ້​ຜູ້​ໄດ້​ຮັບ​ຜົນ​ກະ­ທົບ​ຈາກ​ທາງ​ລົດ­ໄຟ ເມືອງ​ວັງ​ວຽງ​ໄດ້​ຮັບ​ການ​ພັດ­ທະ­ນາ ແລະ ມີ​ຫຼາຍ​ອັນ​ປ່ຽນ­ແປງ​ໃໝ່ ແຕ່​ຍັງ​ມີ​ບາງ​ບັນ­ຫາ​ທີ່​ຕ້ອງ​ໄດ້​ເອົາ­ໃຈ­ໃສ່​ປັບ­ປຸງ ແກ້​ໄຂ ເປັນ­ຕົ້ນ​ການ​ພັດ­ທະ­ນາ​ຍັງ​ບໍ່​ໄປ​ຕາມ​ຜັງ­ເມືອງ​ຢ່າງ​ເຄັ່ງ​ຄັດ ຂາດ​ການ​ວາງ​ແຜນ​ພັດ­ທະ­ນາ​ການ­ທ່ອງ­ທ່ຽວ​ທີ່​ດີ ແລະ ຍືນ​ຍົງ ບັນ­ຫາ​ລາ­ຄາ​ສິນ­ຄ້າ ແລະ ຄ່າ​ບໍ­ລິ­ການ​ແພງ ບັນ­ຫາ​ຄວາມ​ສະ­ອາດ ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ ການ​ຄຸ້ມ​ຄອງ​ການ​ປ່ອຍ​ນ້ຳ​ເສຍ​ລົງ​ແມ່­ນ້ຳ ແລະ​ອື່ນໆ ເພື່ອ​ສືບ­ຕໍ່​ພັດ­ທະ­ນາ​ເມືອງ​ວັງ​ວຽງ ໃຫ້​ເປັນ​ເມືອງ​ທ່ອງ​ທ່ຽວ​ຢ່າງ​ແທ້​ຈິງ ການ​ນຳ​ຫຼັກ​ແຫຼ່ງ ແລະ ພະ­ນັກ­ງານ​ເມືອງ​ຕ້ອງ​ເອົາ­ໃຈ­ໃສ່ ເປັນ­ຕົ້ນ ໃຫ້​ເມືອງ​ວັງ​ວຽງ ກໍ​ຄື​ແຂວງ​ວຽງ​ຈັນ ຊອກ​ໃຫ້​ເຫັນ​ທ່າ­ແຮງ​ແທ້​ຈິງ​ຂອງ​ເມືອງ​ວັງ​ວຽງ ແລະ ນຳ​ໃຊ້​ທ່າ­ແຮງ​ດັ່ງ­ກ່າວ​ຢ່າງ​ຖືກ­ຕ້ອງ ຍືນ​ຍົງ ແລະ ມີ​ປະ​ສິດ­ທິ​ຜົນ​ສູງ.

ຂ່າວທີ່ກ່ຽວຂ້ອງ