ຂ່າວຫຼ້າສຸດ

ຜູ້​ວ່າ​ການ​ເຂດ​ບໍ​ລິ​ຫານ​ພິ​ເສດ​ຮົງ​ກົງ​ ເລັ່ງ​ຊຸກຍູ້​ໃຫ້​ຢຸດຕິ​ການ​ໃຊ້​ຄວາມ​ຮຸນ​ແຮງ

489 12 ສ.ຫ. 2019 ຂ່າວຕ່າງປະເທດ
ຜູ້​ວ່າ​ການ​ເຂດ​ບໍ​ລິ​ຫານ​ພິ​ເສດ​ຮົງ​ກົງ​ ເລັ່ງ​ຊຸກຍູ້​ໃຫ້​ຢຸດຕິ​ການ​ໃຊ້​ຄວາມ​ຮຸນ​ແຮງ

   ເມື່ອ​ວັນ​ທີ 9 ສິງຫາ​ທີ່​ຜ່ານ​ມາ ທ່ານ​ນາງ ແຄ​ຣີ ແລມ​ແຊງ​ເຢັດ​ງໍ ຜູ້​ວ່າການ​ເຂດ​ບໍລິຫານ​ພິເສດ​ຮົງ​ກົງ (ຈີນ) ກໍ​ຄື​ຜູ້ຕາງໜ້າ​ວົງ​ການ​ຕ່າງໆ​ຂອງ​ຮົງ​ກົງ ໄດ້​ເຂົ້າ​ຮ່ວມ​ພິທີ​ຖະແຫຼງ​ຂ່າວ. ກ່ອນ​ພິທີ​ຖະແຫຼງ​ຂ່າວ​ນັ້ນ ທ່ານ​ນາງ ແຄ​ຣີ ແລມ​ແຊງ​ເຢັດ​ງໍ ໄດ້​ເປັນ​ປະທານ​ຈັດ​ກອງ​ປະຊຸມ​ວົງ​ການ​ຕ່າງໆ ໂດຍ​ໄດ້​ກ່າວ​ຢູ່​ທີ່​ພິທີ​ຖະແຫຼງ​ຂ່າວ​ວ່າ ຜູ້​ແທນ​ທີ່​ເຂົ້າ​ຮ່ວມ​ກອງ​ປະຊຸມ​ດັ່ງກ່າວ ຮູ້ສຶກ​ເປັນ​ຫ່ວງ​ຕໍ່​ສະພາບ​ການ​ຢູ່​ຮົງ​ກົງ​ໃນ​ປັດຈຸບັນ ແລະ ເຫັນ​ວ່າ ສະພາບ​ການ​ໃນ​ປັດຈຸບັນ ຈະ​ສ້າງ​ຜົນ​ກະທົບ​ຕໍ່​ຮົງ​ກົງ​ໃນ​ໄລຍະ​ຍາວ ແຕ່​ກໍ​ເຊື່ອ​ໝັ້ນ​ວ່າ “ຮົງ​ກົງ​ວຸ້ນວາຍ​ບໍ່​ໄດ້” ເປັນ​ສຽງ​ຮຽກຮ້ອງ​ຮ່ວມ​ກັນ​ຂອງ​ຊາວ​ຮົງ​ກົງ​ສ່ວນ​ຫຼາຍ​ທີ່​ສຸດ.

     ທ່ານ​ນາງ ແຄ​ຣີ ແລມ​ແຊງ​ເຢັດ​ງໍ ຍັງ​ປະກາດ​ຢູ່​ພິທີ​ຖະແຫຼງ​ຂ່າວ​ວ່າ ກອງ​ປະຊຸມ​ບໍລິຫານ​ງານ​ຈະ​ຟື້ນ​ຟູ​ຈັດ​ຂຶ້ນ​ຄືນໃໝ່​ໃນ​ວັນ​ທີ 13 ສິງຫາ​ນີ້ ພ້ອມ​ທັງ​ຢືນຢັນ​ຕື່ມ​ວ່າ ໃນ​ບົດ​ລາຍ​ງານ​ການ​ບໍລິຫານ​ງານ​ທີ່​ຈະ​ເຜີຍແຜ່​ໃນ​ເດືອນ​ຕຸລາ​ປີ​ນີ້ ຈະ​ມີ​ມາດ​ຕະການ​ເພື່ອ​ຮັບ​ມື​ກັບ​ບັນຫາ​ເສດຖະກິດ ແລະ ຊີວິດ​ການ​ເປັນ​ຢູ່​ຂອງ​ປະຊາຊົນ. ໃນ​ຂະນະ​ດຽວ​ກັນ ທ່ານ​ນາງ ແຄ​ຣີ ແລມ​ແຊງ​ເຢັດ​ງໍ ຍັງ​ຮຽກຮ້ອງ​ໃຫ້​ຜູ້​ເດີນ​ຂະ​ບວນ​ປະ​ທ້ວງ​ຈົ່ງ​ຢຸດຕິ​ການ​ກະທຳ​ໃຊ້​ກຳລັງ​ຮຸນ​ແຮງ ວົງ​ການ​ຕ່າງໆ​ໃນ​ສັງຄົມ​ຈະ​ສາມາດ​ປະ​ວາງ​ຄວາມ​ເຫັນ​ຂັດ​ແຍ້ງ​ກັນ ຫຼຸດຜ່ອນ​ຄວາມ​ເປັນ​ປໍ​ລະ​ປັກ​ກັນ ເພື່ອ​ໃຫ້​ຮົງ​ກົງ ຈະ​ບໍ່​ໄດ້​ຮັບ​ຜົນ​ເສຍ​ຫາຍ​ຕື່ມ​ອີກ.

    ຕາມ​ຂ່າວ CRI  ວັນ​ທີ 11 ສິງຫາ​ນີ້ ຕຳຫຼວດ​ຮົງ​ກົງ​ເຜີຍ​ໃຫ້​ຮູ້​ວ່າ ໃນ​ວັນ​ທີ 10 ສິງຫາ ມີ​ຜູ້​ປະ​ທ້ວງ​ຈຳນວນ​ຫຼວງຫຼາຍ​ໄດ້​ຊຸມນຸມ​ຢູ່​ເຂດ​ໄຕ​ພໍ ໂດຍ​ໄດ້​ຢຶດ​ເອົາ​ທາງ​ຫຼວງ ແລະ ໄດ້​ໄປ​ປະຕິບັດ​ການ​ກະທຳ​ດ້ວຍ​ກຳລັງ​ຮຸນ​ແຮງ​ຢູ່​ເຂດ​ອື່ນ ບໍ່​ເອົາ​ຫົວຊາ​ນຳ​ຄວາມ​ປອດ​ໄພ​ຂອງ​ປະຊາຊົນ. ຝ່າຍ​ຕຳຫຼວດ​ໄດ້​ກ່າວ​ປະນາມ​ຕໍ່​ຄົນ​ເຫຼົ່າ ແລະ ໃນ​ການເຄື່ອນໄຫວ​ຂັບ​ໄລ່​ນັ້ນ ຝ່າຍ​ຕຳຫຼວດ​ໄດ້​ຈັບ​ຕົວ 16 ຄົນ ຍ້ອນ​ເຂົາເຈົ້າ​ໄດ້​ຊຸມນຸມ​ປະ​ທ້ວງ​ຢ່າງ​ຜິດ​ກົດໝາຍ ລັກ​ຖື​ອາວຸດ​ທີ່​ມີ​ລັກສະນະ​ໂຈມ​ຕີ ໂຈມ​ຕີ​ຕຳຫຼວດ ແລະ ກີດຂວາງ​ຕຳຫຼວດ​ປະຕິບັດ​ໜ້າທີ່.

     ກ່ອນ​ໜ້າ​ນັ້ນ ໃນ​ວັນ​ທີ 7 ສິງຫາ​ທີ່​ຜ່ານ​ມາ ຫ້ອງການ​ວຽກ​ງານ​ຮົງ​ກົງ ແລະ ມາ​ກາວ ຂອງ​ລັດຖະບານ​ຈີນ ແລະ ສຳນັກງານ​ພົວພັນ​ຂອງ​ລັດຖະບານ​ຈີນ​ປະຈຳ​ຮົງ​ກົງ ໄດ້​ຮ່ວມ​ກັນ​ຈັດ​ກອງ​ປະຊຸມ​ປຶກສາ​ຫາລື ກ່ຽວ​ກັບ​ສະຖານະ​ການ​ຢູ່​ຮົງ​ກົງ ໂດຍ​ບຸກຄົນ​ສຳຄັນ​ໃນ​ວົງ​ການ​ຕ່າງໆ​ຂອງ​ຮົງ​ກົງ​ເຫັນ​ວ່າ ກອງ​ປະຊຸມ​ດັ່ງກ່າວ ໄດ້​ເປັນ​ການ​ຊີ້​ຊ່ອງ​ທາງ​ເພື່ອ​ຢຸດຕິ​ສະຖານະ​ການ​ຄວາມ​ປັ່ນ​ປ່ວນ​ວຸ້ນວາຍ ແລະ ຟື້ນ​ຟູ​ຄວາມ​ເປັນ​ລະບຽບ​ຮຽບ​ຮ້ອຍ​ຢູ່​ຮົງ​ກົງ ຊາວ​ຮົງ​ກົງ​ສ່ວນ​ຫຼາຍ​ຈະ​ເດັດດ່ຽວ​ສະໜັບສະໜູນ​ອຳນາດ​ການ​ປົກຄອງ​ຮົງ​ກົງ ກໍ​ຄື​ຜູ້​ວ່າການ​ຂອງ​ຕົນ​ໃນ​ການ​ປະຕິບັດ​ໜ້າທີ່​ປົກຄອງ​ຢ່າງ​ມີ​ປະ​ສິດທິ​ຜົນ ສະໜັບສະໜູນ​ກອງ​ກຳລັງ​ຕຳຫຼວດ​ສະກັດ​ກັ້ນ​ເຫດການ​ປັ່ນ​ປ່ວນ​ວຸ້ນວາຍ ສະກັດ​ກັ້ນ​ການ​ກະທຳ​ຕ່າງໆ​ທີ່​ໃຊ້​ກຳລັງ​ຮຸນ​ແຮງ ແລະ ທ້າ​ທາຍ​ຕໍ່​ການ​ປົກຄອງ​ດ້ວຍ​ກົດໝາຍ ແລະ ຟື້ນ​ຟູ​ຄວາມ​ເປັນ​ລະບຽບ​ຮຽບ​ຮ້ອຍ​ທາງ​ສັງຄົມ​ໂດຍ​ໄວ.

ຂ່າວທີ່ກ່ຽວຂ້ອງ