ແຫຼມ​ກາ​ຊາ ໄດ້​ຮັບ​ຄວາມ​ເສຍ​ຫາຍ​ຫຼາຍ​ຍ້ອນ​ຖືກ​ອິດ​ສະ​ຣາ​ແອນ​ປິດ​ລ້ອມ

573 12 ສ.ຫ. 2019 ຂ່າວຕ່າງປະເທດ
ແຫຼມ​ກາ​ຊາ ໄດ້​ຮັບ​ຄວາມ​ເສຍ​ຫາຍ​ຫຼາຍ​ຍ້ອນ​ຖືກ​ອິດ​ສະ​ຣາ​ແອນ​ປິດ​ລ້ອມ

    ເຈົ້າ​ໜ້າທີ່​ຂອງ​ປາ​ແລັດ​ສະ​ຕິນ ແຈ້ງ​ໃຫ້​ຮູ້​ວ່າ ອັດຕາ​ສ່ວນ​ຄົນ​ທຸກ​ຍາກ ຢູ່​ໃນ​ພື້ນ​ທີ່​ແຫຼມ​ກາ​ຊາ ມີ​ເຖິງ 85% ໃນ​ຂະນະ​ທີ່​ອັດຕາ​ສ່ວນ​ຄົນ​ຫວ່າງ​ງານ​ຢູ່​ທີ່ 60% ແລະ ລາຍ​ຮັບ​ປະຈຳ​ວັນ​ຂອງ​ແຕ່ລະຄົນ ຢູ່​ທີ່​ນັ້ນ ໃນ​ປັດຈຸບັນ ມີ​ບໍ່​ເຖິງ 2 ໂດ​ລາ​ສະຫະລັດ/ວັນ.

    ທ່ານ ຈາ​ມານ ອາ​​ລ-ໂຄ​ດາ​ຣີ ຫົວໜ້າ​ຄະນະ​ກຳມະການ​ປະຊາຊົນ ທີ່​ຄັດຄ້ານ​ການ​ປິດ​ລ້ອມ ແຫຼມ​ກາ​ຊາ ຂອງ​ປາ​ແລັດ​ສະ​ຕິນ ກ່າວ​ຕໍ່​ຜູ້​ສື່​ຂ່າວ ເມື່ອ​ວັນ​ທີ 10 ສິງຫາ​ທີ່​ຜ່ານ​ມາ​ວ່າ ນະໂຍບາຍ​ປິດ​ລ້ອມ​ຂອງ​ອິດ​ສະ​ຣາ​ແອນ ຄາດ​ວ່າ​ສ້າງ​ຄວາມ​ເສຍ​ຫາຍ​ໂດຍ​ກົງ​ເປັນ​ມູນ​ຄ່າ 70 ລ້ານ​ໂດ​ລາ​ສະຫະລັດ/ເດືອນ ໃຫ້​ແກ່​ພື້ນຖານ​ເສດຖະກິດ​ຂອງ​ແຫຼມ​ກາ​ຊາ. ນອກຈາກ​ນັ້ນແລ້ວ ວິ​ກິດ​ການ​ນັບ​ມື້​ນັບ​ຮ້າຍ​ແຮງ​ຂຶ້ນ ຍ້ອນ​ວ່າ​ລາຍ​ຮັບ​ຂອງ​ລັດຖະກອນ​ຫຼຸດ​ລົງ ກໍ​ສ້າງ​ຜົນ​ກະທົບ ໃນ​ທາງ​ລົບ ຕໍ່​ສະພາບ​ເສດຖະກິດ​ຢູ່​ໃນ​ເຂດ​ດັ່ງກ່າວ​ເຊັ່ນ​ກັນ.

    ທ່ານ ຈາ​ມານ ອາ​​ລ-ໂຄ​ດາ​ຣີ ໃຫ້​ຮູ້​ວ່າ ໂຮງ​ຈັກ ໂຮງງານ ແລະ ບັນດາ​ວິ​ສາ​ຫະ​ກິດ 3.500 ແຫ່ງ ຕ້ອງ​ໄດ້​ງົດ​ການເຄື່ອນໄຫວ ໃນ​ໄລຍະ​ທີ່​ອິດ​ສະ​ຣາ​ແອນ​ປະຕິບັດ​ນະໂຍບາຍ​ປິດ​ລ້ອມ​ແຫຼມ​ກາ​ຊາ ຊຶ່ງ​ແກ່ຍາວ​ຕະຫຼອດ 12 ປີ​ທີ່​ຜ່ານ​ມາ.

ຂ່າວທີ່ກ່ຽວຂ້ອງ