ຊາວ​ມຸ​ສະ​ລິ​ມ​ຜູ້​ສະ​ແຫວ​​ງ​ບຸນ​ ເຂົ້າ​ຮ່ວມ​ພິທີ​ກຳ​ແກວ່ງ​ກ້ອນ​ຫີ​​ນ​ໃສ່​ຜີ​ຮ້າຍ

809 12 ສ.ຫ. 2019 ຂ່າວຕ່າງປະເທດ
ຊາວ​ມຸ​ສະ​ລິ​ມ​ຜູ້​ສະ​ແຫວ​​ງ​ບຸນ​ ເຂົ້າ​ຮ່ວມ​ພິທີ​ກຳ​ແກວ່ງ​ກ້ອນ​ຫີ​​ນ​ໃສ່​ຜີ​ຮ້າຍ

  ວັນ​ທີ 11 ສິງຫາ​ນີ້ ຊາວ​ມຸ​ສລິມ​ຈາກ​ທົ່ວ​ໂລກ ໄດ້​ປະຕິບັດ​ພິທີກຳ​ແກວ່ງ​ກ້ອນ​ຫີນ​ໃສ່​ກຳແພງ ຈາ​ມາ​ຣາດ (Jamarat) ຢູ່​ໃນ​ນະຄອນ ມີນາ (Mina) ຂອງ​ອາ​ຣາ​ບີ ຊາ​ອຸ​ດິດ ຄື​ກັບ​ວ່າ​ເປັນ​ສັນຍາ​ລັກ​ໃຫ້​ແກ່​ການ​ແກວ່ງ​ກ້ອນ​ຫີນ​ໃສ່​ຜີ​ຮ້າຍ. ພິທີກຳ​ດັ່ງກ່າວ ເປັນ​ການ​ເປີດ​ສາກ​ໃຫ້​ແກ່​ເທດສະການ​ສະແຫວງ​ບຸນ​ຄັ້ງ​ໃຫຍ່​ຂອງ​ຊາວ​ມຸ​ສະ​ລິມ.

   ອຳນາດ​ການ​ປົກຄອງ ອາ​ຣາ​ບີ ຊາ​ອຸ​ດິດ ໄດ້​ຜັນ​ຂະຫຍາຍ​ການ​ປະຕິບັດ​ໜ້າທີ່​ຂອງ​ເຈົ້າ​ໜ້າທີ່​ຮັກສາ​ຄວາມ​ສະຫງົບ ແລະ ພະນັກງານ​ການ​ແພດ ຈຳນວນ​ຫຼາຍ​ໝື່ນ​ຄົນ ພ້ອມ​ກັນ​ນັ້ນ​ກໍ​ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະໄໝ ເຊັ່ນ​ເຮືອບິນ​ແບບ​ບໍ່​ມີ​ຄົນ​ຂັບ ເພື່ອ​ຕິດຕາມ​ກວດກາ ໃນ​ການ​ຮັກສາ​ຄວາມ​ເປັນ​ລະບຽບ​ຮຽບ​ຮ້ອຍ.

    ຕົວ​ເລກ​ຂອງ​ທາງ​ການ​ອາ​ຣາ​ບີ ຊາ​ອຸ​ດິດ ໃຫ້​ຮູ້​ວ່າ ໃນ​ການ​ສະແຫວງ​ບຸນ​ເມື່ອ​ປີ 2015 ໄດ້​ເກີດ​ເຫດການ​ແຫຍ່​ກັນ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ເກືອບ 800 ຄົນ. ເຖິງ​ຢ່າງໃດ​ກໍ​ຕາມ ຕົວ​ເລກ​ສະຖິຕິ​ຕົວ​ຈິງ ຊີ້​ໃຫ້​ເຫັນ​ວ່າ ຈຳນວນ​ຜູ້​ເສຍ​ຊີວິດ​ຈາກ​ເຫດການ​ດັ່ງກ່າວ ມີ​ກວ່າ 2.000 ຄົນ ໃນ​ນັ້ນ​ມີ​ຊາວ​ອີ​ຣານ 400 ຄົນ.

    ສຳລັບ​ໃນ​ປີ​ນີ້ ມີ​ຜູ້​ສະແຫວງ​ບຸນ​ເກືອບ 2,5 ລ້ານ​ຄົນ ຊຶ່ງ​ສ່ວນ​ຫຼາຍ​ແມ່ນ​ມາ​ຈາກ​ປະເທດ​ອື່ນໆ ໄດ້​ເດີນທາງ​ໄປ​ຍັງ​ອາ​ຣາ​ບີ ຊາ​ອຸ​ດິດ ເພື່ອ​ເຂົ້າ​ຮ່ວມ​ໃນ​ເທດສະການ​ວັນ​ບຸນ ທີ່​ແກ່ຍາວ​ເປັນ​ເວລາ 5 ວັນ ຊຶ່ງ​ເປັນ​ເທດສະການ​ທາງ​ສາສະໜາ ທີ່​ຊາວ​ມຸ​​ສ​ສະ​ລິມ ຕ້ອງ​ໄດ້​ປະຕິບັດ​ຢ່າງ​ໜ້ອຍ 1 ເທື່ອ​ໃນ​ຊີວິດ.

ຂ່າວທີ່ກ່ຽວຂ້ອງ