ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 13-08-2019

588 13 ສ.ຫ. 2019 ຫົວຂໍ້ຂ່າວອື່ນໆ

    ເລື່ອງ​ທີ່​ສັງ​ລວມ​ມາ​ໃຫ້​ບັນ­ດາ​ທ່ານ​ຜູ້​ອ່ານ​ວັນ​ນີ້ ປະ­ກອບ​ດ້ວຍ​ຂ່າວ​ກ່ຽວ​ກັບ​ນະ­ໂຍ­ບາຍ​ຂີ່​ລົດ​ລ້າ​ສຳ­ລັບ​ແມ່­ຍິງ​ອິນ​ເດຍ ຕໍ່​ໃສ່​ເລື່ອງ​ປາ​ກິດ​ສະ­ຖານ ຖືກ​ປັບ­ໄໝ​ຍ້ອນ​ລົ້ມ​ເລີກ​ສັນ­ຍາ​ສຳ​ປະ­ທານ​ຂຸດ​ຄົ້ນ​ບໍ່​ແຮ່.

    ທີ່​ອິນ​ເດຍ: ຄະ­ດີ​ລວນ​ລາມ​ທາງ​ເພດ ກໍ​ຄື ເຫດ​ຂົ່ມ­ຂືນ​ຝືນ​ໃຈ​ແມ່­ຍິງ​ຢູ່​ອິນ​ເດຍ ໂດຍ​ສະ­ເພາະ ແມ່ນ​ໃນ​ກະ​ໂຕ​ນະ­ຄອນ­ຫຼວງ​ນິວ​ເດລີ​ນັ້ນ ໄດ້​ກາຍ­ເປັນ​ບັນ­ຫາ​ຮ້ອນ​ທີ່​ທາງ​ການ​ອິນ​ເດຍ​ເລັ່ງ​ແກ້​ໄຂ​ດ່ວນ ດ້ວຍ​ວິ­ທີ​ການ​ຕ່າງໆ ເພື່ອ​ຄວາມ​ປອດ​ໄພ​ຂອງ​ແມ່­ຍິງ​ເວ­ລາ​ໂດຍ­ສານ ດ້ວຍ​ພາ­ຫະ­ນະ​ສາ­ທາ­ລະ­ນະ ໃນ​ປີ 2012 ນັກ​ສຶກ​ສາ​ຍິງ​ຄົນ​ໜຶ່ງ​ຖືກ​ກຸ່ມ​ແກ້ງ​ຂົ່ມ­ຂືນ​ລວມ​ໝູ່​ຢູ່​ລົດ​ໂດຍ­ສານ ແລະ ຂ້າ​ຖິ້ມ ຊຶ່ງ​ໄດ້​ກໍ່­ໃຫ້­ເກີດ​ຫາງ​ສຽງ​ຟົດ​ເດືອດ​ໃນ ທົ່ວ​ສັງ­ຄົມ​ອິນ​ເດຍ ກ່ຽວ​ກັບ​ຄວາມ​ປອດ​ໄພ​ຂອງ ແມ່­ຍິງ ຈາກ​ຜົນ​ສະ­ທ້ອນ​ດັ່ງ­ກ່າວ ທາງ​ການ​ນະ ຄອນ​ຫຼວງ​ນິວ​ເດລີ ຈຶ່ງ​ອອກ​ມາດ​ຕະ­ການ​ອັນ​ຈຳ­ເປັນ ເພື່ອ​ປົກ​ປ້ອງ​ແມ່­ຍິງ​ໜຶ່ງ​ໃນ​ບັນ­ດາ​ມາດ​ຕະ­ການ ກໍ​ຄື ເລັ່ງ​ຕິດ​ຕັ້ງ​ກ້ອງ​ວົງ​ຈອນ​ປິດ ຈຳ­ນວນ 150.000 ໜ່ວຍ ຢູ່​ທົ່ວ​ໂຕ​ນະ­ຄອນ­ຫຼວງ​ໃຫ້​ສຳ­ເລັດ​ພາຍ​ໃນ​ປີ​ນີ້ ນອກ­ຈາກ​ນັ້ນ ກໍ​ຍັງ​ຈະ​ເລີ່ມ​ໂຄງ­ການ​ບໍ­ລິ­ການ “ຂີ່​ລົດ​ໂດຍ­ສານ​ບໍ່​ເສຍ​ເງິນ” ສຳ­ລັບ​ແມ່­ຍິງ​ພາຍ​ໃນ​ນະ­ຄອນ­ຫຼວງ​ເກືອບ 1 ລ້ານ​ຄົນ ຊຶ່ງ​ຄາດ​ວ່າ​ຈະ​ເລີ່ມ​ດຳ­ເນີນ​ການ​ພາຍ​ໃນ​ໄຕ​ມາດ​ທີ 3 ຂອງ​ປີ​ນີ້ ເປົ້າ​ໝາຍ​ຕົ້ນ­ຕໍ​ຂອງ​ໂຄງ­ການ​ໃຊ້ ລົດ​ໂດຍ­ສານ​ຟຼີ​ສຳ­ລັບ​ແມ່­ຍິງ​ຈຳ­ນວນ​ປະ­ມານ 850.000 ຄົນ​ນີ້ ແມ່ນ​ເພື່ອ​ຮັບ­ປະ­ກັນ​ຄວາມ​ປອດ​ໄພ​ຈາກ​ການ​ໃຊ້​ຄວາມ​ຮຸນ​ແຮງ​ທາງ​ເພດ​ຕໍ່​ເພດ​ຍິງ ແລະ ເພື່ອ​ບັນ­ເທົາ​ມົນ​ລະ​ພິດ​ທາງ​ອາ­ກາດ​ຈາກ​ຄວັນ​ລົດ ນະ­ຄອນ­ຫຼວງ ຊຶ່ງ​ມີ​ຄົນ​ອາ­ໄສ​ຢູ່​ເກືອບ 20 ລ້ານ​ຄົນ​ແຫ່ງ​ນີ້ ຢືນ​ຢູ່​ໃນ​ແຖວ​ໜ້າ​ຂອງ​ບັນ­ດາ​ນະ­ຄອນ​ທີ່​ປະ​ເຊີນ​ກັບ​ມົນ​ລະ​ພິດ​ໜັກ­ໜ່ວງ​ທີ່​ສຸດ​ຂອງ​ໂລກ.

    ທີ່​ປາ​ກິດ​ສະ­ຖານ: ມີ​ຂ່າວ​ຕ່າງ­ປະ­ເທດ​ຫວ່າງ​ບໍ່​ດົນ​ມາ​ນີ້ ໄດ້​ເວົ້າ​ເຖິງ​ບັນ­ຫາ​ທີ່​ປະ­ເທດ​ປາ​ກິດ​ສະ­ຖານ­ທີ່​ຕ້ອງ​ໄດ້​ຈ່າຍ​ຄ່າ​ຊົດ​ເຊີຍ​ຄວາມ​ເສຍ​ຫາຍ​ເກືອບ 6 ຕື້​ໂດ​ລາ​ສະ­ຫະ­ລັດ ໃຫ້​ແກ່ 3 ບໍ­ລິ­ສັດ​ຂຸດ​ຄົ້ນ​ແຮ່​ຄຳ 3 ບໍ­ລິ­ສັດ ໃນ​ນັ້ນ 2 ບໍ­ລິ­ສັດ​ເປັນ​ຂອງ​ກາ​ນາ​ດາ ແລະ ອີກ​ໜຶ່ງ​ບໍ­ລິ­ສັດ​ຂອງ​ປະ­ເທດ​ຈີ​ເລ ເມື່ອ​ກວ່າ 10 ປີ​ຢ້ອນ​ຫຼັງ ໄດ້​ມີ​ການ​ຄົ້ນ​ພົບ​ບໍ່​ຄຳ ແລະ ບໍ່​ທອງ​ຂະ­ໜາດ​ໃຫຍ່​ຢູ່​ແຂວງ​ບາ​ລູ​ຈິ​ສະ­ຖານ ທາງ​ທິດ­ຕາ­ເວັນ­ຕົກ​ສຽງ​ໃຕ້​ຂອງ​ປາ​ກິດ​ສະ­ຖານ ຕໍ່​ມາ​ລັດ­ຖະ­ບານ​ກໍ​ໄດ້​ອະ­ນຸ­ຍາດ​ໃຫ້ 3 ບໍ­ລິ­ສັດ​ດັ່ງ­ກ່າວ​ສຳ​ປະ­ທານ​ຂຸດ​ຄົ້ນ​ບໍ່​ແຮ່​ທີ່​ຄົ້ນ​ພົບ ແຕ່​ແລ້ວ​ເຫດ​ບໍ່​ຄາດ​ຝັນ​ກໍ​ເກີດ​ຂຶ້ນ ເມື່ອ​ອຳ­ນາດ​ປົກ­ຄອງ​ທ້ອງ­ຖິ່ນ​ແຂວງ​ບາ​ລູ​ຈິ​ສະ­ຖານ ປະ­ຕິ­ເສດ​ທີ່​ຈະ​ອອກ​ໃບ​ອະ­ນຸ­ຍາດ​ຂຸດ​ຄົ້ນ​ໃຫ້ 3 ບໍ­ລິ­ສັດ ຍ້ອນ

ບັນ­ຫາ​ສິ່ງ­ແວ­ດລ້ອມ ແລະ ຜົນ​ກະ­ທົບ​ອື່ນໆ​ຈາກ ການ​ຂຸດ​ຄົ້ນ ບັນ­ຫາ​ຂັດ​ແຍ່ງ​ໄດ້­ແກ່​ຍາວ​ມາ​ເປັນ ເວ­ລາ​ຫຼາຍ​ປີ ໃນ​ທີ່​ສຸດ ອົງ­ການ​ສານ​ສູງ​ສຸດ​ຂອງ ປາ​ກິດ​ສະ­ຖານ ກໍ​ໄດ້​ປະ­ກາດ​ໃຫ້­ການ​ຕົກ­ລົງ​ອະ­ນຸ­ຍາດ​ຂຸດ​ຄົ້ນ​ບໍ່​ແຮ່​ດັ່ງ­ກ່າວ​ເປັນ​ໂມ­ຄະ ເຫດ­ການ ນີ້​ຄວນ​ເປັນ​ບົດ­ຮຽນ​ແສບ​ໃນ​ການ​ຕົກ­ລົງ​ໃຫ້​ຕ່າງ ປະ­ເທດ​ສຳ​ປະ­ທານ​ຂຸດ​ຄົ້ນ​ບໍ່​ແຮ່ ຫຼື ຊັບ­ພະ­ຍາ­ກອນ​ທຳ​ມະ​ຊາດ​ອື່ນໆ ເພາະ​ຖ້າ​ບໍ່​ລ່ອງ​ຊ່ອງ​ກັນ​ລະ­ຫວ່າງ​ສູນ​ກາງ​ກັບ​ທ້ອງ­ຖິ່ນ​ແລ້ວ ແນ່­ນອນ​ຜົນ​ຮ້າຍ​ກໍ​ຕ້ອງ​ຕາມ​ມາ ແລະ ປະ­ເທດ​ຊາດ​ກໍ​ຈະ​ເສຍ​ຜົນ​ປະ­ໂຫຍດ​ຢ່າງ​ຫຼວງ­ຫຼາຍ.

ຂ່າວທີ່ກ່ຽວຂ້ອງ