ຂ່າວຫຼ້າສຸດ

ສື່ອອນລາຍ ຕ້ອງຈົດທະບຽນໃຫ້ຖືກຕ້ອງ ເພື່ອຮັບປະກັນການປົກປ້ອງ ແລະ ໄດ້ຮັບຂໍ້ມູນທີ່ສະດວກ

452 13 ສ.ຫ. 2019 ຂ່າວໜ້າ​ໜຶ່ງ
ສື່ອອນລາຍ ຕ້ອງຈົດທະບຽນໃຫ້ຖືກຕ້ອງ ເພື່ອຮັບປະກັນການປົກປ້ອງ ແລະ ໄດ້ຮັບຂໍ້ມູນທີ່ສະດວກ

    ທ່ານ ປິ່ນ​ປາ­ຖະ­ໜາ ພັນ­ທະ​ມາ­ລີ ຫົວ­ໜ້າ​ກົມ​ສື່​ມວນ​ຊົນ​ລາວ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້​ວ່າ: ວັນ​ທີ 13 ສິງ­ຫາ 1950 ພັກ​ປະ­ຊາ­ຊົນ ປະ­ຕິ­ວັດ​ລາວ ໄດ້​ຕົກ­ລົງ​ສ້າງ­ຕັ້ງ​ອົງ­ການ​ສື່​ມວນ​ຊົນ​ລາວ ພ້ອມ​ດ້ວຍ​ການ​ພິມ​ຈຳ­ໜ່າຍ ເພື່ອ​ຮັບ​ໃຊ້​ໃຫ້​ກອງ​ປະ­ຊຸມ​ແນວ​ລາວ​ອິດ­ສະ­ຫຼະ​ຢູ່​ໃນ​ເຂດ​ປົດ​ປ່ອຍ ມາ​ຮອດ​ປີ 2008 ສະ­ພາ​ແຫ່ງ​ຊາດ​ໄດ້​ຮັບ­ຮອງ​ເອົາ​ກົດ­ໝາຍ​ວ່າ​ດ້ວຍ​ສື່​ມວນ​ຊົນ ເຊິ່ງ​ມີ​ມາດ­ຕາ 1 ຕົກ­ລົງ​ເອົາ​ວັນ​ທີ 13 ສິງ­ຫາ ເປັນ​ວັນ​ສື່​ມວນ​ຊົນ​ລາວ ເຊິ່ງ​ກົງ​ກັບ​ວັນ​ສ້າງ­ຕັ້ງ​ແນວ​ລາວ​ອິດ­ສະ­ຫຼະ ກໍ​ຄື ວັນ​ສ້າງ­ຕັ້ງ​ໜັງ­ສື­ພິມ​ລາວ​ອິດ­ສະ­ຫຼະ​ຂອງ​ການ​ປະ­ຕິ­ວັດ​ລາວ ເປັນ​ຂີດ​ໝາຍ​ສຳ­ຄັນ​ແຫ່ງ​ການ​ສ້າງ­ຕັ້ງ​ສື່​ມວນ​ຊົນ​ປະ­ຕິ­ວັດ​ລາວ ມາ​ຮອດ​ປີ 2019 ພໍ­ດີ​ຄົບ­ຮອບ 69 ປີ​ແຫ່ງ​ການ​ກຳ­ເນີດ ແລະ ເຕີບ​ໃຫຍ່​ຂະ­ຫຍາຍ­ຕົວ​ຂອງ​ສື່​ມວນ​ຊົນ​ລາວ.

    ນັບ​ແຕ່​ມື້​ສ້າງ­ຕັ້ງ ມາ​ຮອດ​ປີ 1975 ເປັນ​ປີ​ສະ­ຖາ­ປະ­ນາ ສປປ ລາວ ໄດ້​ຢັ້ງ­ຢືນ​ວ່າ​ສື່​ມວນ​ຊົນ​ລາວ​ມີ​ບົດ­ບາດ​ສຳ­ຄັນ​ຍິ່ງ​ໃນ​ການ​ປຸກ­ລະ­ດົມ​ຂົນ­ຂວາຍ ເຮັດ​ໜ້າ­ທີ່​ຈັດ​ຕັ້ງ​ປະ­ຕິ­ບັດ​ຂະ​ບວນ​ການ​ປະ­ຕິ­ວັດ ໃນ​ເມື່ອ​ກ່ອນ ກໍ​ຄື ການ​ປະ­ຕິ­ບັດ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ປະ­ເທດ​ຊາດ​ໃນ​ປັດ­ຈຸ­ບັນ ໃນ​ນີ້ ສື່​ມວນ​ຊົນ​ລາວ​ໄດ້​ຂະ­ໜານ​ນາມ​ວ່າ​ເປັນ​ນັກ­ຮົບ​ປະ­ຈັນ­ບານ​ໃນ​ສະ­ໜາມ​ການ­ເມືອງ ແລະ ໃນ​ການ​ປະ­ຕິ­ບັດ​ພາ­ລະ­ກິດ​ປ່ຽນ­ແປງ​ໃໝ່ ໂດຍ​ປະ­ຕິ­ບັດ​ຕາມ​ມາດ​ຕະ­ການ 4 ບຸກ​ທະ­ລຸ ໃນ​ການ​ຫັນ​ເອົາ​ປະ­ເທດ​ກາຍ­ເປັນ​ປະ­ເທດ​ທີ່​ມີ​ຄວາມ​ມັ່ງ​ຄັ່ງ​ເຂັ້ມ­ແຂງ ອຸ­ດົມ­ສົມ­ບູນ ສັງ­ຄົມ​ມີ​ຄວາມ​ຍຸ­ຕິ​ທຳ ມີ​ປະ­ຊາ­ທິ­ປະ­ໄຕ ແລະ ຈະ­ເລີນ​ສີ­ວິ­ໄລ ພ້ອມ​ນີ້ ສື່​ມວນ​ຊົນ​ລາວ​ຍັງ​ເປັນ​ກະ­ບອກ​ສຽງ​ທີ່​ແຫຼມ​ຄົມ ແລະ ໄວ້­ໃຈ​ຂອງ​ພັກ ເປັນ​ເວ­ທີ​ແຫ່ງ​ການ​ສົ່ງ­ເສີມ​ປະ­ຊາ­ທິ­ປະ­ໄຕ ເຄື່ອນ​ໄຫວ​ພາຍ​ໃຕ້​ການ​ຊີ້​ນຳ​ຂອງ​ພັກ ການ​ຄຸ້ມ​ຄອງ​ຂອງ​ລັດ ທຸກ​ການ­ເຄື່ອນ­ໄຫວ​ຂອງ​ສື່​ມວນ​ຊົນ​ລາວ ແມ່ນ​ປະ­ຕິ­ບັດ​ຕາມ​ກົດ­ໝາຍ ແລະ ລະ­ບຽບ​ການ ເຊິ່ງ​ນອກ­ຈາກ​ເຮັດ​ໜ້າ­ທີ່​ເປັນ​ກະ­ບອກ​ສຽງ​ຂອງ​ພັກ​ແລ້ວ ຍັງ​ໄດ້​ສົ່ງ­ເສີມ​ໃຫ້​ປະ­ຊາ­ຊົນ​ບັນ­ດາ­ເຜົ່າ​ໄດ້​ສະ­ແດງ​ຄວາມ​ຄິດ​ເຫັນ ສ່ອງ​ແສງ​ວິ­ທີ​ການ​ດຳ­ລົງ​ຊີ­ວິດ ການ​ທຳ​ມາ​ຫາ​ກິນ​ຂອງ​ເຂົາ­ເຈົ້າ ແລະ ອື່ນໆ.

    ໃນ​ໄລ­ຍະ​ໃໝ່​ການ​ບໍ­ລິ­ໂພກ​ຂໍ້​ມູນ​ຂ່າວ­ສານ ໄດ້​ມີ​ການ​ປ່ຽນ­ແປງ​ຈາກ​ການ​ບໍ­ລິ­ໂພກ ຜ່ານ​ໜັງ­ສື­ພິມ ໂທລະ­ພາບ ວິ­ທະ­ຍຸ ແລະ ໂທລະ​ໂຄ່ງ ໄປ​ບໍ­ລິ­ໂພກ​ຜ່ານ​ສື່​ແບບ​ໃໝ່ ຜ່ານ​ໜ້າ​ຈໍ​ໂທລະ­ສັບ​ມື​ຖື ເຊິ່ງ​ປັດ­ຈຸ­ບັນ​ທຸກ​ສື່​ຂອງ​ລາວ​ໄດ້​ມີ​ການ​ຫັນ​ໄປ​ສູ່​ອອນ​ລາຍ ໂດຍ​ມີ​ເວັບ​ໄຊ ເຟ​ສ​ບຸກ ເພື່ອ​ນຳ​ສະ­ເໜີ​ຜະ­ລິດ​ຕະ​ພັນ​ຂອງ​ຕົນ​ໃນ​ການ​ເປັນ​ສື່​ກາງ​ເຫດ­ການ​ຕ່າງໆ ແຕ່ງ​ເຖິງ​ຈະ​ນຳ​ສະ­ເໜີ​ຂ່າວ​ຜ່ານ​ຊ່ອງ​ທາງ​ໃດ​ກໍ​ຕາມ ສຳ­ຄັນ​ຜູ້­ນຳ​ສະ­ເໜີ​ຂ່າວ​ຕ້ອງ​ກຳ​ແໜ້ນ 5 ເງື່ອນ­ໄຂ​ຂອງ​ສື່​ຫຼັກ ທີ່​ໄດ້​ຈົດ​ທະ­ບຽນ​ຖືກ­ຕ້ອງ​ຕາມ​ກົດ­ໝາຍ​ວ່າ​ດ້ວຍ​ສື່​ມວນ​ຊົນ ຄື: ກຳ­ນົດ​ຈຸດ­ປະ­ສົງ ອຸ­ດົມ​ການ​ຂອງ​ສື່​ມວນ​ຊົນ​ທີ່​ຕົນ​ຈະ​ເຮັດ ຕ້ອງ​ມີ​ໂຄງ​ປະ­ກອບ​ເນື້ອ​ໃນ​ທີ່​ແນ່­ນອນ​ໃນ​ການ​ລົງ​ເລິກ​ແຕ່​ລະ​ດ້ານ​ໃຫ້​ລະ­ອຽດ ການ­ຈັດ­ຕັ້ງ ແລະ ບຸ​ຄະ­ລາ​ກອນ​ຂອງ​ອົງ­ການ​ຕ້ອງ​ບອກ​ຢ່າງ​ລະ­ອຽດ​ຕາມ​ກົດ­ໝາຍ​ສື່​ມວນ​ຊົນ ເງິນ​ທຶນ​ໃນ​ການ​ບໍ­ລິ­ຫານ ແຫຼ່ງ​ທີ່​ມາ​ຂອງ​ເງິນ ແລະ ໜ້າ­ທີ່​ຂໍ້​ມູນ​ຂ່າວ­ສານ​ຕ້ອງ​ສອດ­ຄ່ອງ​ກັບ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ກໍ​ຄື ແຜນ​ພັດ­ທະ­ນາ​ວຽກ​ງານ​ສື່​ມວນ​ຊົນ​ຂອງ​ລາວ ພ້ອມ​ນີ້ ກໍ​ຂໍ​ຮຽກ­ຮ້ອງ​ໃຫ້​ສື່​ອອນ​ລາຍ ມາ​ຈົດ​ທະ­ບຽນ​ໃຫ້​ຖືກ­ຕ້ອງ ເພື່ອ​ຮັບ­ປະ­ກັນ​ການ​ປົກ​ປ້ອງ ແລະ ໄດ້​ຮັບ​ການ​ສະ­ໜັບ​ສະ ໜູນ​ດ້ານ​ຂໍ້​ມູນ​ຂ່າວ­ສານ​ທີ່​ສະ­ດວກ​ສະ­ບາຍ.

ຂ່າວທີ່ກ່ຽວຂ້ອງ