ຂ່າວຫຼ້າສຸດ

ສ ເກົາຫຼີ ສະໜອງທຶນ 10,42 ຕື້ກີບ ຟື້ນຟູຫຼັງໄພພິບັດ

412 13 ສ.ຫ. 2019 ຂ່າວໜ້າ​ໜຶ່ງ
ສ ເກົາຫຼີ ສະໜອງທຶນ 10,42 ຕື້ກີບ ຟື້ນຟູຫຼັງໄພພິບັດ

    ພິ­ທີ​ລົງ​ນາມ​ຂໍ້​ຕົກ­ລົງ​ການ​ສະ­ໜອງ​ທຶນ​ສຳ­ລັບ​ກິດ­ຈະ­ກຳ​ປີ 2019 ພາຍ​ໃຕ້​ແຜນ​ງານ​ຟື້ນ​ຟູ​ຫຼັງ​ໄພ​ພິບັດ​ແບບ​ປະ­ສົມ​ປະ­ສານ ​ຢູ່​ແຂວງ​ອັດ​ຕະ​ປື (2019-2023) ຈັດ​ຂຶ້ນ​ວັນ​ທີ 9 ສິງ­ຫາ 2019 ຢູ່​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ລະ­ຫວ່າງ​ທ່ານ ວິ­ໄລ​ພົງ ສີ​ສົມ​ຫວັງ ວ່າ­ການ​ຫົວ­ໜ້າ​ກົມ​ສັງ ຄົມ​ສົງ­ເຄາະ ກະ­ຊວງ ຮສສ ແລະ ທ່ານ ຊັງ​ຊູ ໂອ ຜູ້­ຕາງ­ໜ້າ​ອົງ­ການ​ຮ່ວມ​ມື​ສາ­ກົນ ສ ເກົາ­ຫຼີ ມີ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ ຮສສ ທ່ານ ຊິນ ຊ່ອງ ຊຸນ ເອກ​ອັກ​ຄະ​ລັດ​ຖະ​ທູດ ສ ເກົາ­ຫຼີ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ຄຳ​ແພງ ໄຊ​ສົມ​ແພງ ກ່າວ​ວ່າ: ປັດ­ຈຸ­ບັນ ພັກ ແລະ ລັດ­ຖະ­ບານ​ລາວ ກຳ­ລັງ​ສຸມ​ໃສ່​ຊ່ວຍ­ເຫຼືອ​ບັນ­ເທົາ​ທຸກ​ເພີ່ມ​ເຕີມ ແລະ ເລັ່ງ​ໃສ່​ປະ­ຕິ­ບັດ​ການ​ຟື້ນ​ຟູ​ຄືນ­ໃໝ່​ບັນ­ດາ​ສິ່ງ​ທີ່​ເສຍ​ຫາຍ​ຈາກ​ໄພ­ພິ­ບັດ​ໂດຍ​ສະ­ເພາະ ການ​ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ແລະ ໂຄງ​ລ່າງ​ພື້ນ­ຖານ​ຕ່າງໆ​ຢູ່​ເມືອງ​ສະ  ໜາມ​ໄຊ ເຊິ່ງ​ກຳ­ລັງ​ດຳ­ເນີນ​ການ​ຊ່ວຍ­ເຫຼືອ​ບັນ­ເທົາ​ທຸກ ແລະ ເລັ່ງ​ໃສ່​ການ​ຟື້ນ​ຟູ​ຮີບ​ດ່ວນ ເປັນ­ຕົ້ນ ການ​ສ້າງ​ທີ່­ຢູ່​ອາ­ໄສ​ຊົ່ວ­ຄາວ ແລະ ຖາ­ວອນ ຈັດ​ສັນ​ທີ່​ດິນ​ທຳ​ມາ​ຫາ​ກິນ​ໃຫ້​ປະ­ຊາ­ຊົນ ສ້ອມ­ແປງ ແລະ ສ້າງ​ເສັ້ນ­ທາງ ຈັດ​ຫາ​ວຽກ​ເຮັດ​ງານ​ທຳ​ໃຫ້​ປະ­ຊາ­ຊົນ ຊ່ວຍ­ເຫຼືອ​ດ້ານ​ການ​ແພດ ການ​ສຶກ​ສາ ແລະ ອື່ນໆ ສຳ­ລັບ​ການ​ຊ່ວຍ­ເຫຼືອ​ຂອງ ສ ເກົາ­ຫຼີ ຄັ້ງ​ນີ້ ເປັນ​ການ​ປະ­ກອບ­ສ່ວນ​ສຳ­ຄັນ​ໃນ​ການ​ພັດ­ທະ­ນາ  ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໃຫ້​ດີ​ຂຶ້ນ ເປັນ­ຕົ້ນ ດ້ານ​ວຽກ​ງານ​ສາ­ທາ­ລະ­ນະ​ສຸກ ການ​ສົ່ງ­ເສີມ​ວຽກ​ງານ​ກະ­ສິ­ກຳ ການ​ສຶກ​ສາ ການ​ເຝິກ​ວິ­ຊາ​ຊີບ ການ​ປົກ​ປ້ອງ ແລະ ຊ່ວຍ­ເຫຼືອ​ເດັກ.

    ທ່ານ ຊິນ ຊ່ອງ ຊຸນ ກ່າວ​ວ່າ: ການ​ສະ­ໜອງ​ທຶນ​ຄັ້ງ​ນີ້ ມີ​ມູນ​ຄ່າ 1.200.000 ໂດ​ລາ​ສະ­ຫະ­ລັດ ຫຼື ປະ­ມານ 10,42 ຕື້​ກີບ ເຊິ່ງ​ເປັນ​ທຶນ​ຊ່ວຍ­ເຫຼືອ​ຂອງ​ລັດ­ຖະ­ບານ ກໍ​ຄື ປະ­ຊາ­ຊົນ ສ ເກົາ­ຫຼີ ຜ່ານ ອົງ­ການ​ກອຍ​ກາ ປະ­ຈຳ​ລາວ ເພື່ອ​ຊ່ວຍ­ເຫຼືອ​ຈັດ​ກິດ­ຈະ­ກຳ​ພາຍ​ໃຕ້ ແຜນ​ງານ​ຟື້ນ​ຟູ​ຫຼັງ​ໄພ­ພິ­ບັດ​ແບບ​ປະ­ສົມ​ປະ­ສານ ຢູ່​ເມືອງ​ສະ­ໜາມ​ໄຊ ໂຄງ­ການ​ນີ້​ມີ​ຄວາມ​ສຳ­ຄັນ​ເພື່ອ​ສະ­ໜັບ­ສະ­ໜູນ​ລັດ­ຖະ­ບານ​ລາວ ໃນ​ການ​ຟື້ນ​ຟູ​ຫຼັງ​ໄພ­ພິ­ບັດ ທັງ​ເປັນ​ການ​ສ້າງ​ຄວາມ​ເຂັ້ມ­ແຂງ​ດ້ານ​ບຸ​ຄະ­ລາ​ກອນ ເຕັກ­ນິກ​ວິ­ຊາ​ການ​ໃນ​ວຽກ​ງານ​ຕ່າງໆ ໂດຍ​ສະ­ເພາະ ຢູ່​ຂັ້ນ​ບ້ານ ເມືອງ ແລະ ຂັ້ນ​ແຂວງ.

ຂ່າວທີ່ກ່ຽວຂ້ອງ