ຮອງນາຍົກ ລົງເຄື່ອນໄຫວຢ້ຽມຢາມ ແລະ ເຮັດວຽກທີ່ເມືອງວຽງໄຊ

805 13 ສ.ຫ. 2019 ຂ່າວໜ້າ​ໜຶ່ງ
ຮອງນາຍົກ ລົງເຄື່ອນໄຫວຢ້ຽມຢາມ ແລະ ເຮັດວຽກທີ່ເມືອງວຽງໄຊ

    ວັນ​ທີ 11 ສິງ­ຫາ 2019 ທ່ານ ບຸນ​ທອງ ຈິດ​ມະ­ນີ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກວດ­ກາ​ສູນ​ກາງ​ພັກ ປະ­ທານ​ອົງ­ການ​ກວດ­ກາ​ລັດ­ຖະ­ບານ ແລະ ຫົວ­ໜ້າ​ອົງ­ການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ພ້ອມ​ຄະ­ນະ​ຢ້ຽມ­ຢາມ ແລະ ເຮັດ​ວຽກ​ຢູ່​ເມືອງ​ວຽງ​ໄຊ ແຂວງ​ຫົວ­ພັນ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ວັນ​ໄຊ ແພງ​ຊຸມ​ມາ ເລ­ຂາ​ພັກ​ແຂວງ ເຈົ້າ­ແຂວງ​ຫົວ­ພັນ ມີ​ຄະ­ນະ​ພັກ ຄະ­ນະ​ນຳ​ຂອງ​ເມືອງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ.

    ໂອ­ກາດ​ການ​ລົງ​ຢ້ຽມ­ຢາມ ແລະ ເຮັດ​ວຽກ​ໃນ​ຄັ້ງ​ນີ້ ທ່ານ​ຮອງ​ນາ­ຍົກ​ໄດ້​ຮັບ​ຟັງ​ການ​ລາຍ​ງານ​ການ​ກະ­ກຽມ​ກອງ​ປະ­ຊຸມ​ໃຫຍ່ III ຂັ້ນ​ໂດຍ​ສັງ­ເຂບ ຈາກ​ທ່ານ ພອນ​ສຸກ ອິນ​ທະ​ວົງ ເລ­ຂາ​ພັກ​ເມືອງ ເຈົ້າ­ເມືອງ​ວຽງ​ໄຊ ຈາກ​ນັ້ນ ກໍ​ໄດ້​ຮັບ​ຟັງ​ການ​ລາຍ​ງານ​ສະ­ພາບ​ຜົນ​ກະ­ທົບ​ຈາກ​ພາ­ຍຸ​ໝູນ​ວິ­ພາ ທີ່​ເກີດ​ຂຶ້ນ​ຢູ່​ເມືອງ​ວຽງ​ໄຊ ໃນ​ລະ­ຫວ່າງ​ວັນ​ທີ 2-5 ສິງ­ຫາ ນີ້ ເຊິ່ງ​ມີ 29 ບ້ານ​ໄດ້​ຮັບ​ຜົນ​ກະ­ທົບ​ຈາກ​ພາ­ຍຸ​ດັ່ງ­ກ່າວ ໄດ້​ສ້າງ​ຜົນ​ເສຍ​ຫາຍ​ອັນ​ໜັກ­ໜ່ວງ​ຕໍ່​ປະ­ຊາ­ຊົນ​ຊາວ​ເມືອງ​ວຽງ​ໄຊ ໂດຍ​ສະ­ເພາະ ບັນ­ດາ​ບ້ານ​ທີ່­ຢູ່​ຂອບ​ເຂດ​ຊາຍ​ແດນ ເມືອງ​ກວັນ​ເຊີນ ແຂວງ​ແທັງ​ຮວ່າ ສສ ຫວຽດ­ນາມ ຢູ່​ຕາມ​ລ້ອງ​ນ້ຳ​ງາ ນ້ຳ​ພູນ ນ້ຳ​ສິມ ແລະ ນ້ຳ​ໂສຍ ສຳ­ລັບ​ບ້ານ​ທີ່​ໄດ້​ຮັບ​ຜົນ​ກະ­ທົບ​ຮ້າຍ​ແຮງ​ກວ່າ​ໝູ່​ແມ່ນ​ບ້ານ​ຫີນ​ດຳ ບ້ານ​ນາ​ຮາມ ບ້ານ​ຄຳ​ນາງ ເຊິ່ງ​ມີ​ດິນ​ເຈື່ອນ​ໄຫຼ​ລົງ​ມາ​ທັບ​ເຮືອນ​ປະ­ຊາ­ຊົນ​ຢູ່​ບ້ານ​ຫີນ​ດຳ  2 ຫຼັງ ບ້ານ​ຄຳ​ນາງ 2 ຫຼັງ ແລະ  ບ້ານ​ນາ​ຮາມ 1 ຫຼັງ ເຮັດ​ໃຫ້​ມີ​ຜູ້​ສູນ­ຫາຍ​ຈຳ­ນວນ 7 ຄົນ ບາດ­ເຈັບ 5 ຄົນ ແລະ ເສຍ​ຊີ­ວິດ 1 ຄົນ ເສັ້ນ­ທາງ​ເປ່​ເພ 4 ເສັ້ນ ຄື: ເສັ້ນ­ທາງ​ພູນ​ໃໝ່-ຄຳ​ນາງ ເສັ້ນ­ທາງ ກ້າງ​ໂຄ້ງ-ບ້ານ​ບໍ ເສັ້ນ­ທາງ​ກອງ 11-ຫ້ວຍ​ຕຸງ ແລະ ເສັ້ນ­ທາງ​ດ່ານ​ສາ­ກົນ​ນ້ຳ​ໂສຍ-ບ້ານ​ໂສຍ ຄອງ­ເໝືອງ​ເປ່​ເພ່ 33 ເສັ້ນ ຝາຍ​ເປ່​ເພ 12 ແຫ່ງ ເນື້ອ­ທີ່​ນາ​ຖືກ​ນ້ຳ​ຖ້ວມ ນ້ຳ​ເຊາະ​ເຈື່ອນ​ເສຍ​ຫາຍ ປະ­ມານ 98 ເຮັກ­ຕາ ເນື້ອ­ທີ່​ໄຮ່​ເຂົ້າ​ເສຍ​ຫາຍ 2 ເຮັກ­ຕາ ສັດ​ໃຫຍ່ ງົວ-ຄວາຍ 18 ໂຕ ຫົວ​ປັ່ນ​ໄຟ​ນ້ຳ​ຢອດ ເສຍ​ຫາຍ 80 ເຄື່ອງ ນອກ​ນີ້ ກໍ​ຍັງ​ມີ​ປະ­ເພດ​ສັດ­ລ້ຽງ​ຂອງ​ປະ­ຊາ­ຊົນ​ເສຍ​ຫາຍ​ຈຳ­ນວນ​ຫຼວງ­ຫຼາຍ ຄາດ​ຄະ­ເນ​ຄວາມ​ເສຍ​ຫາຍ​ໃນ​ເບື້ອງ​ຕົ້ນ​ຈາກ​ໄພ­ພິ­ບັດ​ໃນ​ຄັ້ງ​ນີ້ ທົ່ວ​ເມືອງ​ວຽງ​ໄຊ​ທັງ​ໝົດ​ປະ­ມານ 13 ຕື້​ກວ່າ​ກີບ ຕໍ່​ກັບ​ສະ­ພາບ​ການ​ດັ່ງ­ກ່າວ ພາຍ­ຫຼັງ​ທີ່​ໄດ້​ຮັບ​ແຈ້ງ​ຂ່າວ ຈາກ​ກອງ­ຮ້ອຍ​ທະ­ຫານ​ຊາຍ​ແດນ 215 ວ່າ​ເກີດ​ມີ​ພາ­ຍຸ​ຂັ້ນ​ຮ້າຍ​ແຮງ​ຢູ່​ເຂດ​ນ້ຳ​ງາ ແລະ ມີ​ດິນ​ເຈື່ອນ​ທັບ​ຄົນ ທາງ​ຄະ­ນະ​ປະ­ຈຳ​ພັກ​ເມືອງ​ກໍ​ໄດ້​ຮີບ​ຮ້ອນ​ຈັດ​ກຳ­ລັງ​ເຂົ້າ​ຊ່ວຍ­ເຫຼືອ​ທັນ­ທີ ໂດຍ​ການ​ສົມ­ທົບ​ກັບ​ກອງ​ທະ­ຫານ ແລະ ປະ­ຊາ­ຊົນ​ຊອກ​ຄົ້ນ​ຜູ້​ສູນ­ຫາຍ ແຕ່​ກໍ​ບໍ່​ທັນ​ພົບ​ຮ່ອງ­ຮອຍ​ຂອງ​ຜູ້​ສູນ­ຫາຍ ຈຶ່ງ​ໄດ້​ເຮັດ​ໜັງ­ສື​ສະ­ເໜີ​ຫາ​ການ​ນຳ​ເມືອງ​ກວັນ​ເຊິນ ສສ ຫວຽດ­ນາມ ໃຫ້​ຊ່ວຍ​ຄົ້ນ​ຫາ​ຜູ້​ສູນ­ຫາຍ ທີ່​ອາດ​ຖືກ​ກະ­ແສ­ນ້ຳ​ພັດ​ໄຫຼ​ລົງ​ໄປ ຮອດ​ເຂດ​ເມືອງ​ກວັນ​ເຊິນ ສສ ຫວຽດ­ນາມ.

    ໂອ­ກາດ​ດຽວ​ກັນ​ນີ້ ທ່ານ​ຮອງ​ນາ­ຍົກ ກໍ​ໄດ້​ຮັບ​ຟັງ​ການ​ລາຍ​ງານ​ສະ­ພາບ​ການ​ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ຈາກ​ທ່ານ​ເຈົ້າ­ເມືອງ​ວຽງ​ໄຊ ແລະ ວິ­ທີ​ການ​ແກ້​ໄຂ​ຜົນ​ກະ­ທົບ​ຈາກ​ໄພ­ພິ­ບັດ​ນ້ຳ​ຖ້ວມ ພ້ອມ​ທັງ​ໃຫ້​ກຽດ​ໂອ້​ລົມ ແລະ ເນັ້ນ​ໜັກ​ໃຫ້​ອຳ­ນາດ​ການ​ປົກ­ຄອງ​ເມືອງ​ວຽງ​ໄຊ ກໍ​ຄື ແຂວງ​ຫົວ­ພັນ ໃຫ້​ເອົາ­ໃຈ­ໃສ່​ສືບ­ຕໍ່​ຄົ້ນ​ຫາ​ຜູ້​ສູນ­ຫາຍ​ຈາກ​ໄພ­ພິ­ບັດ​ທາງ​ທຳ​ມະ​ຊາດ ໂດຍ​ການ​ສົມ­ທົບ​ກັບ​ກຳ­ລັງ​ຫວຽດ­ນາມ​ຊອກ​ຄົ້ນ​ຫາ ທີ່​ຄາດ​ຄະ­ເນ​ວ່າ​ອາດ​ຖືກ​ກະ­ແສ­ນ້ຳ​ພັດ​ໄຫຼ​ລົງ​ໄປ ຮອດ​ເຂດ​ເມືອງ​ກວັນ​ເຊິນ ສສ ຫວຽດ­ນາມ ເອົາ­ໃຈ­ໃສ່​ກວດ­ກາ​ຄືນ​ໃນ​ຄວາມ​ເສຍ​ຫາຍ​ຂອງ​ແຕ່​ລະ​ຄອບ­ຄົວ​ທີ່​ໄດ້​ຮັບ​ຜົນ​ກະ­ທົບ ແລະ ສິ່ງ​ຂອງ​ສາ­ທາ­ລະ­ນະ ເປັນ­ຕົ້ນ ໂຮງ­ຮຽນ ສຸກ­ສາ­ລາ ຫ້ອງ­ການ​ຕ່າງໆ ລວມ​ທັງ​ພື້ນ­ຖານ​ໂຄງ​ລ່າງ ໃຫ້​ຄິດ­ໄລ່​ມູນ​ຄ່າ​ຄວາມ​ເສຍ​ຫາຍ​ຢ່າງ​ລະ­ອຽດ ໃນ​ການ​ຟື້ນ​ຟູ​ບ້ານ​ເຮືອນ​ແມ່ນ​ໃຫ້​ພາ­ກັນ​ຄົ້ນ­ຄວ້າ​ຢ່າງ​ລະ­ອຽດ ວ່າ​ຄວນ​ໄປ​ໃນ​ທິດ​ທາງ​ໃດ ເພື່ອ​ຫາ​ທາງ​ແກ້​ໄຂ​ຊ່ວຍ​ປະ­ຊາ­ຊົນ ພ້ອມ​ທັງ​ໃຫ້­ການ​ຊ່ວຍ­ເຫຼືອ​ທາງ​ດ້ານ​ແຮງ​ງານ ວັດ­ຖຸ​ປັດ​ໄຈ ເຄື່ອງ​ອຸ­ປະ­ໂພກ-ບໍ­ລິ­ໂພກ ແຫຼ່ງ​ທຳ​ການ​ຜະ­ລິດ​ກະ­ສິ­ກຳ-ປູກ­ຝັງ​ລ້ຽງ­ສັດ​ຂອງ​ປະ­ຊາ­ຊົນ ແລະ ເອົາ­ໃຈ­ໃສ່​ເປັນ​ພິ­ເສດ​ໃນ​ການ​ຟື້ນ​ຟູ​ສະ­ພາບ​ຈິດ­ໃຈ​ຂອງ​ພໍ່​ແມ່​ປະ­ຊາ­ຊົນ.

ຂ່າວທີ່ກ່ຽວຂ້ອງ