ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 14-08-2019

625 14 ສ.ຫ. 2019 ຫົວຂໍ້ຂ່າວອື່ນໆ

    ພົບ​ກັນ​ວັນ​ນີ້ ມີ​ເລື່ອງ​ກ່ຽວ​ກັບ​ຂະ​ບວນ​ການ​ປົກ​ປ້ອງ​ໝີ​ຢູ່​ຈີນ ເລື່ອງ​ແຜນ​ລ້ຽງ​ໝູ ເພື່ອ​ສົ່ງ​ອອກ​ຢູ່​ອິນ​ໂດ​ເນ​ເຊຍ ແລະ ຂ່າວ​ກ່ຽວ​ກັບ​ຫວຽດ­ນາມ ຈະ​ໃຊ້​ເຄື່ອງ­ມື​ທັນ​ສະ­ໄໝ ເພື່ອ​ບັນ­ທຶກ​ປະ­ຫວັດ​ພະ­ຍາດ​ຂອງ​ພົນ­ລະ­ເມືອງ.

    ທີ່ ສປ ຈີນ: ເມື່ອ​ສັງ­ຄົມ​ໂລກ​ຈະ­ເລີນ​ກ້າວ­ໜ້າ​ຂຶ້ນ ຈິດ­ໃຈ​ຂອງ​ຄົນ​ເຮົາ (ຊາວ​ໂລກ) ກໍ​ຈະ­ເລີນ​ເປັນ​ເງົາ​ຕາມ​ຕົວ​ໄປ​ນຳ ນ້ຳ­ໃຈ​ມະ­ນຸດ­ສະ­ທຳ​ກໍ​ຄ່ອຍ​ເຊື່ອມ​ສານ ກວມ​ເອົາ​ບັນ­ດາ​ສັດ​ທີ່​ມີ​ສາຍ​ພົວ­ພັນ​ໃກ້​ສິດ​ກັບ​ມະ­ນຸດ ເຊັ່ນ: ໝາ ແມວ ແລະ ບັນ­ດາ​ສັດ​ທີ່​ຖືກ​ເຂັ່ນ­ຂ້າ​ຂູດ​ຮີດ​ຈາກ​ມະ­ນຸດ​ຢູ່​ຫຼາຍໆ​ປະ­ເທດ​ກໍ​ເກີດ​ມີ​ຂະ​ບວນ​ການ​ປົກ​ປ້ອງ​ສິດ­ທິ​ຂອງ​ສັດ ໂດຍ​ໄດ້​ກຳ­ນົດ​ເປັນ​ມາດ​ຕະ­ການ​ທາງ​ກົດ­ໝາຍ​ຄັກ­ແນ່ ສຳ­ລັບ​ຢູ່ ສປ ຈີນ ເມື່ອ​ປະ­ມານ 4 ປີ­ຜ່ານ­ມາ ກໍ​ເກີດ​ມີ​ຂະ​ບວນ​ການ​ຮຽກ­ຮ້ອງ​ໃຫ້​ຍົກ­ເລີກ​ການ​ດູດ​ເອົາ​ນ້ຳ­ບີ​ຂອງ​ໝີ ເພື່ອ​ເອົາ​ມາ​ປະ­ກອບ​ເປັນ​ຢາ​ແຜນ​ບູ­ຮານ​ທີ່​ເຄີຍ​ປະ­ຕິ­ບັດ​ມາ​ໄດ້​ຫຼາຍ­ເຊັ່ນ­ຄົນ​ແລ້ວ ອອກ​ໜ້າ​ພາ​ທາງ​ຕ້ານ​ການ​ລ້ຽງ​ໝີ​ໄວ້​ເພື່ອ​ດູດ​ເອົາ​ບີ​ຂອງ​ພວກ​ມັນ​ມາ​ປຸງ​ຢາ​ນີ້ ແມ່ນ​ມູນ​ນິ­ທິ​ຮັກ​ສັດ​ປະ­ຈຳ​ນະ­ຄອນ­ຫຼວງ​ປັກ​ກິ່ງ ທີ່​ໄດ້​ເປັນ​ເຈົ້າ​ການ​ເຮັດ​ການ​ສຳ​ຫຼວດ​ຄຳ​ເຫັນ​ຂອງ​ສັງ­ຄົມ​ກ່ຽວ​ກັບ​ບັນ­ຫາ​ດັ່ງ­ກ່າວ ຜົນ​ການ​ສຳ​ຫຼວດ​ຄຳ​ເຫັນ​ຊີ້​ອອກ​ວ່າ ກວ່າ 80% ຂອງ​ຜູ້​ຖືກ​ສຳ­ພາດ​ເຫັນ​ດີ​ໃຫ້​ຍົກ­ເລີກ​ການ​ລ້ຽງ​ໝີ​ໄວ້​ເພື່ອ​ດູດ​ເອົາ​ນ້ຳ­ບີ 97% ໃຫ້​ຄຳ​ເຫັນ​ວ່າ ການ​ທີ່​ບໍ­ລິ­ສັດ​ການ​ຢາ­ດູດ​ເອົາ​ນ້ຳ­ບີ​ໝີ​ມາ​ປຸງ​ແຕ່ງ​ເປັນ​ຢາ​ນັ້ນ ແມ່ນ​ການ​ກະ­ທຳ​ທີ່​ໂຫດ­ຮ້າຍ​ປ່າ​ເຖື່ອນ​ທີ່​ສຸດ 83,9% ສະ­ເໜີ​ໃຫ້​ຢຸດ​ໂດຍ​ດ່ວນ​ການ​ດູດ​ເອົາ​ນ້ຳ­ບີ​ໝີ ກວ່າ 70% ຂອງ​ຜູ້​ຕອບ​ຄຳ​ຖາມ​ສຳ­ພາດ​ຈຳ­ນວນ 1.800 ຄົນ ບອກ​ວ່າ ພວກ​ເຂົາ​ບໍ່​ເຄີຍ​ນຳ​ໃຊ້​ຜະ­ລິດ​ຕະ​ພັນ​ທີ່​ມີ​ສ່ວນ​ປະ­ສົມ​ຂອງ​ບີ​ໝີ​ຈັກ​ເທື່ອ ແລະ ໄດ້​ປະ­ຕິ­ຍານ​ວ່າ​ຈະ​ບໍ່​ຍອມ​ນຳ​ໃຊ້​ໃນ​ອະ­ນາ­ຄົດ.

    ທີ່ ອິນ​ໂດ​ເນ​ເຊຍ: ມີ​ຂ່າວ​ວ່າ ໃນ​ທ້າຍ​ເດືອນ​ພຶດ­ສະ­ພາ​ປີ​ນີ້ ທາງ​ກະ­ຊວງ​ກະ­ສິ­ກຳ​ອິນ​ໂດ​ເນ​ເຊຍ ໄດ້​ລິ​ເລີ່ມ​ແນວ​ຄິດ​ຢາກ​ລ້ຽງ​ໝູ​ໃນ​ເຂດ​ທີ່​ຊຸມ​ຊົນ​ສ່ວນ​ໃຫຍ່​ນັບ­ຖື​ສາ­ສະ­ໜາ​ເຢ​ຊູ (ຄຣິດ​ສ) ທີ່​ເມືອງ​ນູ​ຊາ​ເຕັກ​ກາ​ຣາ ເພາະ​ຖ້າ​ລ້ຽງ​ໝູ​ຢູ່​ເຂດ​ຊຸມ​ຊົນ​ນັບ­ຖື​ສາ­ສະ­ໜາ​ອິດ​ສະ​ລາມ​ນັ້ນ ຈະ​ກາຍ­ເປັນ​ບັນ­ຫາ​ແຕະ­ຕ້ອງ​ເລື່ອງ​ການ​ເຊື່ອ​ຖື ອິນ​ໂດ​ເນ​ເຊຍ ເປັນ​ປະ­ເທດ​ທີ່​ມີ​ຊາວ​ມຸດ​ສະ​ລິມ (ຄົນ​ນັບ­ຖື​ສາ­ສະ­ໜາ​ອິດ​ສະ​ລາມ) ຫຼາຍ​ເປັນ​ອັນ​ດັບ​ທີ 1 ຂອງ​ໂລກ ແນວ​ຄິດ​ທີ່​ຢາກ​ລ້ຽງ​ໝູ​ຢູ່​ເມືອງ​ນູ​ຊາ​ເຕັງ​ກາ​ຣາ​ນີ້​ແມ່ນ​ເພື່ອ​ສົ່ງ​ອອກ​ໄປ ສປ ຈີນ ທີ່​ພວມ​ປະ­ສົບ​ກັບ​ບັນ­ຫາ​ຂາດ­ແຄນ​ຊີ້ນ​ໝູ ຍ້ອນ​ພະ­ຍາດ​ອະ­ຫິ​ວາ​ໝູ ອາ​ຟຣິ​ກາ​ລະ­ບາດ ໃນ 3?4 ປີ­ຜ່ານ­ມາ ຈຳ­ນວນ​ໝູ​ລ້ຽງ​ທີ່​ອິນ​ໂດ​ເນ​ເຊຍ​ນັ້ນ​ມີ​ຈຳ­ນວນ 8,5 ລ້ານ​ໂຕ ໃນ­ຕໍ່­ໜ້າ​ຖ້າ​ຂໍ້​ລິ​ເລີ່ມ​ດັ່ງ­ກ່າວ​ກາຍ­ເປັນ​ຈິງ ອິນ​ໂດ​ເນ​ເຊຍ​ກໍ​ຈະ​ສາ­ມາດ​ຕີ​ຕະ­ຫຼາດ​ຊີ້ນ​ໝູ​ຢູ່ ຈີນ ຫວຽດ­ນາມ ກຳ­ປູ­ເຈຍ ແລະ ມຽນ​ມາ.

    ທີ່ ຫວຽດ­ນາມ: ອີງ​ຕາມ​ແຫຼ່ງ​ຂ່າວ​ຫວຽດ­ນາມ ໃນ​ທ້າຍ​ເດືອນ​ມິ­ຖຸ­ນາ​ປີ​ນີ້ ພວກ​ເຮົາ​ໄດ້​ຮູ້​ກ່ຽວ​ກັບ​ຜົນ­ສຳ­ເລັດ​ຂອງ​ຫວຽດ­ນາມ ໃນ​ການ​ພັດ­ທະ­ນາ​ລະ­ບົບ​ເກັບ​ກຳ​ຂໍ້​ມູນ​ສຸ­ຂະ­ພາບ​ຂອງ​ພົນ­ລະ­ເມືອງ​ຫວຽດ­ນາມ ດ້ວຍ​ລະ­ບົບ​ເອ​ເລັກ​ໂຕຣ​ນິກ ແລະ ລະ­ບົບ​ດັ່ງ­ກ່າວ​ກໍ​ຖືກ​ຮັບ­ຮອງ​ເອົາ​ໃນ​ເດືອນ​ກໍ­ລະ­ກົດ​ປີ​ນີ້ ການ​ເກັບ​ກຳ ແລະ ບັນ­ທຶກ​ຂໍ້​ມູນ​ສຸ­ຂະ­ພາບ​ດ້ວຍ​ລະ­ບົບ​ເອ​ເລັກ​ໂຕຣ​ນິກ ແມ່ນ​ການ​ພັດ­ທະ­ນາ​ຊອບ​ແວ​ທີ່​ເຮັດ​ໜ້າ­ທີ່​ບັນ­ທຶກ​ປະ­ຫວັດ​ກ່ຽວ​ກັບ​ສຸ­ຂະ­ພາບ​ຂອງ​ຜູ້​ເຈັບ­ເປັນ ຊຶ່ງ​ມາ​ຮອດ​ປັດ­ຈຸ­ບັນ​ນີ້​ໄດ້​ນຳ​ໃຊ້​ຢູ່​ບັນ­ດາ​ສູນ​ສຸ­ຂະ­ພາບ​ໃນ 31 ຕົວ​ເມືອງ ແລະ ແຂວງ​ແລ້ວ ເປົ້າ​ໝາຍ​ການ​ສ້າງ​ລະ­ບົບ​ເກັບ​ກຳ​ຂໍ້​ມູນ​ສຸ­ຂະ­ພາບ​ດ້ວຍ​ລະ­ບົບ​ເອ​ເລັກ​ໂຕຣ​ນິກ​ນີ້ ແມ່ນ​ເພື່ອ​ໃຫ້​ພົນ­ລະ­ເມືອງ​ທຸກ​ຄົນ​ມີ​ຂໍ້​ມູນ​ສຸ­ຂະ­ພາບ​ຕະ­ຫຼອດ​ຊີ­ວິດ ໂດຍ​ອີງ­ໃສ່​ຂໍ້​ມູນ​ດັ່ງ­ກ່າວ ແພດ​ໝໍ​ກໍ​ຈະ​ສາ­ມາດ​ຊ່ວຍ​ຄົນ​ເຈັບ​ໄດ້​ຢ່າງ​ທັນ​ການ ແລະ ບົ່ງ​ພະ­ຍາດ​ຢ່າງ​ຖືກ­ຕ້ອງ ໃນ​ປັດ­ຈຸ­ບັນ ຂະ­ແໜງ​ສາ­ທາ­ລະ­ນະ​ສຸກ​ຫວຽດ­ນາມ ພວມ​ຢູ່​ໃນ​ຂັ້ນ​ຕອນ​ພັດ­ທະ­ນາ​ລະ­ບົບ​ຮັກ­ສາ​ສຸ­ຂະ­ພາບ ອັດ​ສະ​ລິ​ຍະ (ສະ­ມາດ?Smart) ໃນ​ສາມ​ດ້ານ​ໄປ​ພ້ອມໆ​ກັນ ລວມ​ມີ​ລະ­ບົບ​ການ​ຄຸ້ມ​ຄອງ ໂຮງ­ພະ­ຍາ­ບານ ແລະ ການ​ຄຸ້ມ​ຄອງ​ຂໍ້​ມູນ​ການ​ແພດ.

ຂ່າວທີ່ກ່ຽວຂ້ອງ