ສາລະວັນ ອອກໃບຢັ້ງຢືນແຫຼ່ງກໍາເນີດສິນຄ້າສົ່ງອອກ

661 14 ສ.ຫ. 2019 ຂ່າວໜ້າ​ໜຶ່ງ
ສາລະວັນ ອອກໃບຢັ້ງຢືນແຫຼ່ງກໍາເນີດສິນຄ້າສົ່ງອອກ

    ກອງ​ປະ­ຊຸມ​ໃຫຍ່ ຄັ້ງ​ທີ IV ຂອງ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ ແຂວງ​ສາ­ລະ​ວັນ ຈັດ​ຂຶ້ນ​ວັນ​ທີ 13 ສິງ­ຫາ 2019 ຢູ່​ແຂວງ​ດັ່ງ­ກ່າວ ໂດຍ​ມີ​ທ່ານ ວິ­ຊຽນ ນະ​ວິ​ກຸນ ຮອງ​ເຈົ້າ­ແຂວງ​ສາ­ລະ​ວັນ ທ່ານ  ຄຳ​ຜ່ານ ສີ​ລາ​ດີ ຫົວ­ໜ້າ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ແຂວງ​ສາ­ລະ​ວັນ ພ້ອມ​ດ້ວຍ​ຕາງ­ໜ້າ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ບົວ​ລາ ຈັນ­ທະ​ສອນ ຄະ­ນະ​ບໍ­ລິ­ຫານ​ງານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ (ສຄອ) ແຂວງ​ສາ­ລະ​ວັນ ກ່າວ​ວ່າ: ສຄອ ແຂວງ​ສາ­ລະ​ວັນ ມີ​ຄະ­ນະ​ບໍ­ລິ­ຫານ​ງານ 17 ທ່ານ ສະ­ມາ­ຊິກ​ຂຶ້ນ​ກັບ 7 ໜ່ວຍ​ໃນ 8 ເມືອງ ຄື: ໂຮງ­ງານ​ຖ່ານ​ຂາວ​ເພັດ​ໄພ­ລິນ ເມືອງ​ນະ­ຄອນ​ເພັງ ບໍ­ລິ­ສັດ​ປາກ​ຊ່ອງ​ພັດ­ທະ­ນາ ມີ​ສຳ­ນັກ­ງານ​ຢູ່​ເມືອງ​ເລົ່າ​ງາມ ບໍ­ລິ­ສັດ​ຂົນ­ສົ່ງ​ໂດຍ­ສານ​ບັນ­ດິດ ຕັ້ງ​ຢູ່​ບ້ານ​ຫຼັກ 2 ເມືອງ​ສາ­ລະ​ວັນ ວິ​ສາ​ຫະ​ກິດ ຄອນ​ມະ­ນີ ບຸບ­ຜາ​ວັນ ຕົວ​ແທນ​ຈຳ­ໜ່າຍ​ເບຍ​ລາວ ສາ­ຂາ​ສາ­ລະ​ວັນ ເມືອງ​ສາ­ລະ​ວັນ ໂຮງ­ງານ​ຜະ­ລິດ​ຖ່ານ​ຂາວ​ສະ​ຕານ​ດາດ​ອຸ­ດົມ​ສັກ ເມືອງ​ວາ­ປີ ສະ​ຖາ​ບັນ​ການ​ເງິນ​ຈຸ​ລະ​ພາກ​ທີ່​ບໍ່​ຮັບ​ເງິນ​ຝາກ ຈັນ​ຈະ­ເລີນ ສ່ວນ​ບຸກ­ຄົນ ບ້ານ​ນາ​ປົ່ງ ເມືອງ​ຄົງ​ເຊ​ໂດນ ແລະ ບໍ­ລິ­ສັດ​ພົນ​ໄຊ​ກໍ່­ສ້າງ​ເຄ­ຫາ​ສະ­ຖານ​ຈຳ­ກັດ​ຜູ້​ດຽວ ບ້ານ​ຫຼັກ 2 ເມືອງ​ສາ­ລະ​ວັນ.

    ສຄອ ແຂວງ​ສາ­ລະ​ວັນ ໄດ້​ຊຸກ­ຍູ້​ສົ່ງ­ເສີມ​ຜະ­ລິດ​ສິນ­ຄ້າ ສົ່ງ​ອອກ​ພາຍ​ໃນ ແລະ ຕ່າງ­ປະ­ເທດ ເຊິ່ງ​ສິນ­ຄ້າ​ສ່ວນ​ໃຫຍ່​ເປັນ​ປະ­ເພດ​ສິນ­ຄ້າ​ກະ­ສິ­ກຳ ອຸດ­ສາ­ຫະ­ກຳ​ປຸງ​ແຕ່ງ ແລະ ເຄື່ອງ​ປ່າ​ຂອງ​ດົງ ໃນ​ນີ້ ສາ­ມາດ​ອອກ​ໃບ­ຢັ້ງ­ຢືນ​ແຫຼ່ງ​ກຳ­ເນີດ​ສິນ­ຄ້າ​ສົ່ງ​ອອກ​ໄດ້ 70 ຊຸດ ມູນ​ຄ່າ 3,79 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 27 ຕື້​ກີບ ໃນ​ນີ້ ຂີງ​ອົບ​ແຫ້ງ 117,04 ໂຕນ ມູນ​ຄ່າ 18 ຕື້​ກີບ ໝາກ­ກ້ວຍ 1.600 ໂຕນ ມູນ​ຄ່າ 3,5 ຕື້​ກີບ ໄມ້-ຜະ­ລິດ​ຕະ​ພັນ​ໄມ້ 325,12 ແມັດ​ກ້ອນ ມູນ​ຄ່າ 1,8 ຕື້​ກີບ ຖ່ານ​ຂາວ 1.504,61 ໂຕນ ມູນ​ຄ່າ 1,6 ຕື້​ກີບ    ໝາກ­ກ້ຽງ 571 ກິ​ໂລ ມູນ​ຄ່າ 56 ລ້ານ​ກີບ ຫອມ​ເຮືອດ 4,53 ໂຕນ ມູນ​ຄ່າ 900 ລ້ານ​ກີບ ເຂົ້າ­ສານ​ຈ້າວ 32 ໂຕນ ມູນ​ຄ່າ 250 ລ້ານ​ກີບ ໝາກ­ພ້າວ 17,86 ໂຕນ ມູນ​ຄ່າ 41 ລ້ານ​ກີບ ໂດຍ​ສົ່ງ​ໄປ​ຍີ່­ປຸ່ນ ມູນ​ຄ່າ 24 ຕື້​ກີບ ສປ ຈີນ 8 ຕື້​ກີບ ສ ເກົາ­ຫຼີ 430 ລ້ານ​ກີບ ນອກ​ນີ້ ຍັງ​ໄດ້​ເອົາ­ໃຈ­ໃສ່​ເຈລະ­ຈາ ແລະ ປົກ​ປ້ອງ​ຜົນ​ປະ­ໂຫຍດ​ອັນ​ຊອບ​ທຳ​ຂອງ​ທຸ­ລະ​ກິດ ແລະ ອື່ນໆ ເຮັດ​ໃຫ້­ການ​ດຳ­ເນີນ​ທຸ­ລະ​ກິດ​ເຕີບ​ໃຫຍ່​ຂະ­ຫຍາຍ­ຕົວ ແລະ ມີ​ຜົນ­ສຳ­ເລັດ​ເປັນ​ກ້າວໆ ນຳ​ເອົາ​ຜົນ​ປະ­ໂຫຍດ​ມາ­ສູ່​ປະ­ເທດ​ຊາດ ກໍ​ຄື ແຂວງ​ສາ­ລະ​ວັນ ຄຽງ​ຄູ່​ກັນ​ນີ້ ກໍ​ຍັງ​ມີ​ດ້ານ​ຄົງ​ຄ້າງ ເປັນ­ຕົ້ນ ການ­ເຄື່ອນ­ໄຫວ​ບໍ່​ທັນ​ແຂງ­ແຮງ ມີ​ລັກ­ສະ­ນະ​ເບົາ­ບາງ ການ​ແບ່ງ​ຄວາມ​ຮັບ­ຜິດ­ຊອບ​ໃຫ້​ຄະ­ນະ​ບໍ­ລິ­ຫານ​ບໍ່​ທັນ​ຂາດ​ຕົວ ການ­ເຄື່ອນ­ໄຫວ​ຂາດ​ການ​ກວດ­ກາ ຕິດ­ຕາມ ແລະ ສະ­ຫຼຸບ​ຕີ​ລາ­ຄາ ບໍ່​ທັນ​ສາ­ມາດ​ຍາດ​ແຍ່ງ​ເອົາ​ການ​ດຶງ​ດູດ​ການ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ ຜະ­ລິດ​ຕະ​ພັນ​ສິນ­ຄ້າ​ທີ່​ສົ່ງ​ອອກ ຍັງ​ບໍ່​ທັນ​ເປັນ​ສຳ­ເລັດ​ຮູບ ແລະ ອື່ນໆ.

    ໂອ­ກາດ​ນີ້ ຍັງ​ໄດ້​ປ່ອນ​ບັດ​ຄັດ​ເລືອກ​ຄະ­ນະ​ບໍ­ລິ­ຫານ​ງານ ສຄອ ແຂວງ​ສາ­ລະ​ວັນ ຊຸດ​ໃໝ່ 28 ທ່ານ ໂດຍ​ເລືອກ​ເອົາ​ທ່ານ ອິນ​ແປງ ຊາ​ມຸນ­ຕີ ປະ­ທານ​ບໍ­ລິ­ສັດ​ປາກ​ຊ່ອງ​ພັດ­ທະ­ນາ (ສາ­ຂາ​ແຂວງ​ສາ­ລະ​ວັນ) ເປັນ​ປະ­ທານ ທ່ານ ບົວ​ລາ ຈັນ­ທະ​ສອນ ອຳ­ນວຍ​ການ​ໂຮງ­ແຮມ​ສິນ​ສະ­ໄໝ ເປັນ​ຮອງ​ປະ­ທານ ທ່ານ ແກ້ວ​ອຸ­ດອນ ໜໍ່​ນາ​ການ ປະ­ທານ​ສະ­ມາ­ຄົມ​ໂຮງ­ສີ ແລະ ເກັບ​ຊື້​ເຂົ້າ ທ່ານ ພອນ​ທະ­ວີ ສີ​ລາ​ດວງ​ໃຈ ອຳ­ນວຍ​ການ​ບໍ­ລິ­ສັດ​ພອນ​ທະ­ວີ​ກໍ່­ສ້າງ-ຊົນ­ລະ­ປະ­ທານ ແລະ ທ່ານ​ນາງ ວັງ​ຈັນ ພັນ­ທະ​ວົງ ບໍ­ລິ­ສັດ​ສຸກ​ໃຈ​ສາ­ລະ​ວັນ ເປັນ​ຄະ­ນະ ທ່ານ ບຸນ​ເຖິງ ເທບ​ສຸ­ວັນ ຮອງ​ປະ­ທານ​ກຸ່ມ​ເກັບ​ຊື້​ສິນ­ຄ້າ​ກະ­ສິ­ກຳ​ເມືອງ​ເລົ່າ​ງາມ ເປັນ​ປະ­ທານ​ກວດ­ກາ.

ຂ່າວທີ່ກ່ຽວຂ້ອງ