ຂ່າວຫຼ້າສຸດ

ອັກຄີ​ໄພ​ຢູ່​ໃນ​ປະ​ເທດ​ຕ່າງໆ

523 14 ສ.ຫ. 2019 ຂ່າວຕ່າງປະເທດ
ອັກຄີ​ໄພ​ຢູ່​ໃນ​ປະ​ເທດ​ຕ່າງໆ

   ເຈົ້າ​ໜ້າທີ່​ກ່ຽວຂ້ອງ ແຈ້ງ​ໃຫ້​ຮູ້​ວ່າ ໄດ້​ຮັບ​ແຈ້ງ​ການ​ກ່ຽວ​ກັບ​ເຫດການ​ໄຟ​ໄໝ້ ຊຶ່ງ​ເກີດ​ຂຶ້ນ​ເມື່ອ​ວັນ​ທີ 11 ສິງຫາ​ນີ້ ຢູ່​ທີ່​ສູນ​ລ້ຽງ​ເດັກ​ໃນ​ເວລາ​ກາງເວັນ​ແຫ່ງ​ໜຶ່ງ ໃນ​ລັດ ເພນ​ຊິນ​ວາ​ເນຍ (ສ ອາ​ເມ​ຣິ​ກາ) ສົ່ງ​ຜົນ​ໃຫ້​ເດັກນ້ອຍ​ເສຍ​ຊີວິດ​ຢ່າງ​ໜ້ອຍ 5 ຄົນ.

    ເຈົ້າ​ໜ້າທີ່​ດັບ​ເພີງ ເວົ້າ​ວ່າ ເຫດການ​ໄຟ​ໄໝ້​ດັ່ງກ່າວ ເກີດ​ຂຶ້ນ​ຢູ່​ໃນ​ອາຄານ​ສູງ 3 ຊັ້ນ ເຮັດ​ໃຫ້​ຫຼາຍ​ຄົນ​ຖືກ​ຕິດ​ຄ້າງ​ຢູ່​ດ້ານ​ໃນ ແລະ ຜູ້​ທີ່​ເສຍ​ຊີວິດ​ເປັນ​ເດັກນ້ອຍ ໃນ​ໄວ​ແຕ່ 8 ເດືອນ ຫາ 7 ປີ.  ໃນ​ຂະນະ​ດຽວ​ກັນ ສື່​ມວນ​ຊົນ​ໃນ​ທ້ອງຖິ່ນ ລາຍ​ງານ​ວ່າ ສູນ​ລ້ຽງ​ເດັກ​ດັ່ງກ່າວ ໄດ້​ຮັບ​ໃບ​ອະນຸຍາດ​ເຄື່ອນ​ໄຫວ ໄປ​ຮອດ​ເດືອນ​ມີນາ ປີ 2020.

    ໃນ​ຕອນ​ຄ່ຳ​ຂອງ​ວັນ​ດຽວ​ກັນ ໂຮງໝໍ​ແມ່ ແລະ ເດັກ​ແຫ່ງ​ໜຶ່ງ ຢູ່​ໃນ​ນະຄອນຫຼວງ ແຮນ​ຊິງ​ກີ (ປະເທດ​ໂຮນ​ລັງ) ຕ້ອງ​ໄດ້​ອົບ​ພະ​ຍົບ​ຍ້ອນ​ເກີດ​ໄຟ​ໄໝ້ ຊຶ່ງ​ມີ​ຕົ້ນ​ໄຟ​ມາ​ຈາກ​ທໍ່​ສົ່ງ​ຂີ້​ເຫຍື້ອ ເຮັດ​ໃຫ້​ເກີດ​ຄັວນ​ແຜ່​ອອກ​ໄປ​ສູ່​ຫຼາຍ​ຊັ້ນ​ຂອງ​ອາຄານ. ເຈົ້າ​ໜ້າທີ່​ຮັກສາ​ຄວາມ​ສະຫງົບ​ໃນ​ໂຮງໝໍ​ດັ່ງກ່າວ​ເວົ້າ​ວ່າ ຍັງ​ບໍ່​ທັນ​ໄດ້​ຮັບ​ແຈ້ງ​ການ. ກ່ຽວ​ກັບ​ການ​ເສຍ​ຊີວິດ ຫຼື​ບາດເຈັບ ທີ່​ເກີດ​ຈາກ​ອັກຄີ​ໄພ​ເທື່ອ​ນີ້.

    ໂຮງໝໍ​ແມ່ ແລະ ເດັກ ທີ່​ເກີດ​ອັກຄີ​ໄພ​ດັ່ງກ່າວ ເຂົ້າ​ສູ່​ການເຄື່ອນໄຫວ ເມື່ອ​ປີ 1934 ແລະ ກໍ​ເຄີຍ​ເປັນ​ໂຮງໝໍ​ແມ່ ແລະ ເດັກ ທີ່​ມີ​ຂະໜາດ​ໃຫຍ່​ສຸດ​ໃນ​ເອີ​ຣົບ ໃນ​ເວລາ​ນັ້ນ. ໃນ​ຫຼາຍ​ປີ​ມໍ່ໆມານີ້ ຖັນ​ແຖວ​ພະນັກງານ​ແພດ​ໝໍ ຢູ່​ໃນ​ໂຮງໝໍ​ດັ່ງກ່າວ ມັກ​ພາກັນ​ສ່ອງ​ແສງ​ເຖິງ​ຄຸນ​ນະ​ພາບ​ອາກາດ​ທີ່​ບໍ່​ຄ່ອຍ​ດີ ແລະ ເກີດ​ມີ​ເຊື້ອ​ລາ​ຢູ່​ໃນ​ໂຮງໝໍ​ແຫ່ງ​ນີ້. ຕົວ​ເລກ​ຢ່າງ​ເປັນ​ທາງ​ການ ໃຫ້​ຮູ້​ວ່າ ໃນ​ແຕ່​ລະ​ປີ ຢູ່​ໃນ​ໂຮງໝໍ​ແມ່ ແລະ ເດັກ​ດັ່ງກ່າວ ມີ​ຜູ້​ໃຫ້​ກຳເນີດ​ລູກ 9.000 ລາຍ.

    ທີ່​ອິນ​ເດຍ ອົງການ​ດັບ​ເພີງ ເດລີ ແຈ້ງ​ໃຫ້​ຮູ້​ວ່າ ມີ​ຜູ້​ເສຍ​ຊີວິດ​ຢ່າງ​ໜ້ອຍ 6 ຄົນ ໃນ​ນັ້ນ​ມີ​ແມ່ຍິງ 2 ຄົນ ແລະ ເດັກນ້ອຍ 3 ຄົນ ແລະ ມີ​ຜູ້​ໄດ້​ຮັບ​ບາດເຈັບ​ອີກ 11 ຄົນ ຈາກ​ເຫດການ​ໄຟ​ໄໝ້ ເກີດ​ຂຶ້ນ​ຢູ່​ໃນ​ອາຄານ​ສູງ 5 ຊັ້ນ ໃນ​ເຂດ​ທິດຕາເວັນອອກ​ສ່ຽງ​ໃຕ້ ເດລີ ເມື່ອ​ເວລາ​ເຊົ້າ​ຕູ່​ຂອງ​ວັນ​ທີ 6 ສິງຫາ​ທີ່​ຜ່ານ​ມາ.

ຂ່າວທີ່ກ່ຽວຂ້ອງ