ຂ່າວຫຼ້າສຸດ

ສັກ​ຢາ​ກັນ​ພະຍາດ​ອີ​ໂບ​ລາ​ເປັນ​ການ​ສຸກ​ເສີນ​ຢູ່​ໃນ ​ສປ ກົງ​ໂກ

533 14 ສ.ຫ. 2019 ຂ່າວຕ່າງປະເທດ
ສັກ​ຢາ​ກັນ​ພະຍາດ​ອີ​ໂບ​ລາ​ເປັນ​ການ​ສຸກ​ເສີນ​ຢູ່​ໃນ ​ສປ ກົງ​ໂກ

   ອົງການ​ອະນາໄມ​ໂລກ (WTO) ແຈ້ງ​ໃຫ້​ຮູ້ເມື່ອ​ວັນ​ທີ 11 ສິງຫາ​ນີ້​ວ່າ ໄດ້​ສັກ​ຢາ​ກັນ​ພະຍາດ​ເປັນ​ການ​ສຸກ​ເສີນ​ໃຫ້​ແກ່ 1.300 ກວ່າ​ຄົນ ທີ່​ມີ​ຄວາມ​ສ່ຽງ​ສຳ​ພັດ​ກັບ​ໄວ​​ຣັສ​ອີ​ໂບ​ລາ (Ebola) ຢູ່​ໃນ​ນະຄອນ ໂກ​ມາ ຂອງ​ສາທາລະນະ​ລັດ ປະຊາທິປະໄຕ ກົງ​ໂກ (​ສປ ກົງ​ໂກ) ຊຶ່ງ​ເປັນ​ການ​ປະກອບສ່ວນ​ເຂົ້າ​ໃນ​ການ​ຫຼຸດຜ່ອນ​ຄວາມ​ກັງວົນ ກ່ຽວ​ກັບ​ຄວາມ​ສ່ຽງ​ແຜ່​ລາມ​ຂອງ​ພະຍາດ​ນີ້.

    ຂ່າວ​ແຈ້ງວ່າ ການ​ລະບາດ​ຂອງ​ພະຍາດ​ອີ​ໂບ​ລາ ແກ່ຍາວ​ເປັນ​ເວລາ 1 ປີ​ທີ່​ຜ່ານ​ມາ ຢູ່​ທາງ​ພາກ​ຕາເວັນ​ອອກ​ຂອງ ​ສປ ກົງ​ໂກ ໄດ້​ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ແລ້ວ​ຢ່າງ​ໜ້ອຍ 1.800 ຄົນ ແລະ ໄດ້​ກາຍເປັນ​ການ​ລະບາດ​ຮ້າຍ​ແຮງ​ເປັນ​ງວດ​ທີ 2 ໃນ​ປະຫວັດສາດ.

    ນະຄອນ ໂກ​ມາ ມີ​ປະຊາກອນ 2 ລ້ານ​ຄົນ ເປັນ​ສູນ​ທາງ​ຜ່ານ​ຂອງ​ການ​ຄົມມະນາຄົມ​ຢ່າງ​ຄັບຄັ່ງ ຕັ້ງ​ຢູ່​ຫ່າງ​ຈາກ​ຊາຍ​ແດນ​ຂອງ​ຣູ​ອັນ​ດາ ພຽງ 7​ກມ. ນະຄອນ ໂກ​ມາ ຢູ່​ໃນ​ພາວະ​ແຈ້ງ​ເຕືອນ ມາ​ເປັນ​ເວລາ​ໜຶ່ງ​ອາທິດ​ແລ້ວ ຫຼັງ​ຈາກ​ທີ່​ມີ​ກຳມະກອນ​ບໍ່​ແຮ່ ເສຍ​ຊີວິດ 1 ຄົນ  ຍ້ອນ​ພະຍາດ​ອີ​ໂບ​ລາ.

    ກຳມະກອນ​ຄົນ​ດັ່ງກ່າວ ດຳລົງ​ຊີວິດ​ຢູ່​ໃນ​ຄອບຄົວ​ທີ່​ມີ​ຫຼາຍ​ຄົນ ແລະ ຄົນ​ເຫຼົ່ານັ້ນ​ໄດ້​ສຳ​ພັດ​ກັບ​ອີກ​ຫຼາຍ​ຄົນ ໃນ​ໄລຍະ​ມໍ່ໆມານີ້. WHO ໃຫ້​ຮູ້​ວ່າ ເກືອບ​ໝົດ​ທຸກ​ຄົນ​ທີ່​ສົງ​ໃສ​ວ່າ​ໄດ້​ສຳ​ພັດ​ກັບ​ຄົນ​ໃນ​ຄອບຄົວ​ຂອງ​ກຳມະກອນ​ທີ່​ເສຍ​ຊີວິດ​ດັ່ງກ່າວ ພ້ອມ​ດ້ວຍ​ບັນດາ​ພະນັກງານ​ການ​ແພດ ແມ່ນ​ໄດ້​ສັກ​ຢາ​ກັນ​ພະຍາດ​ອີ​ໂບ​ລາ​ນັ້ນ​ແລ້​​ວ.

 

ຂ່າວທີ່ກ່ຽວຂ້ອງ