ຂ່າວຫຼ້າສຸດ

ສ ​ເກົາຫຼີ - ຟີ​ລິບ​ປິນ ​ເລີ່​​ມ​ການ​ເຈລະຈາ​ຮອບ​ທີ​ສາມ​ກ່ຽວ​ກັບ FTA

831 14 ສ.ຫ. 2019 ຂ່າວຕ່າງປະເທດ
ສ ​ເກົາຫຼີ - ຟີ​ລິບ​ປິນ ​ເລີ່​​ມ​ການ​ເຈລະຈາ​ຮອບ​ທີ​ສາມ​ກ່ຽວ​ກັບ FTA

    ການ​ເຈລະຈາ​ຮອບ​ທີ​ສາມ ກ່ຽວ​ກັບ​ສັນຍາ​ການ​ຄ້າ​ເສລີ (FTA) ລະຫວ່າງ ສ ເກົາຫຼີ ກັບ ຟີ​ລິບ​ປິນ ໄດ້​ເລີ່ມ​ຂຶ້ນ​ຢ່າງ​ເປັນ​ທາງ​ການ ໃນ​ວັນ​ທີ 12 ສິງຫາ​ນີ້ ໂດຍ​ຈັດ​ຂຶ້ນ​ທີ່​ນະຄອນ ບູ​ຊານ ຂອງ ສ ເກົາຫຼີ ແລະ ຄາດ​ວ່າ​ຈະ​ແກ່ຍາວ​ເປັນ​ເວລາ 3 ວັນ.

    ກະຊວງ​ອຸດສາຫະກຳ ການ​ຄ້າ ແລະ ຊັບພະຍາກອນ ຂອງ ສ ເກົາຫຼີ ແຈ້ງ​ໃຫ້​ຮູ້ເມື່ອ​ວັນ​ທີ 11 ສິງຫາ​ນີ້​ວ່າ ໃນ​ການ​ເຈລະຈາ​ຮອບ​ທີ​ສາມ​ນີ້ ສອງ​ຝ່າຍ​ມີ​ກຳນົດ​ປຶກສາ​ຫາລື​ກ່ຽວ​ກັບ​ຂົງເຂດ​ສິນຄ້າ ການ​ບໍລິການ ການ​ລົງທຶນ ການ​ຮ່ວມ​ມື​ທາງ​ດ້ານ​ເສດຖະກິດ ແລະ ເຕັກນິກ  (ECOTECH) ຕະຫຼອດ​ຮອດ​ບັນດາ​ຂໍ້ຄວາມ​ຮ່ວມ​ກັນ​ຂອງ​ສັນຍາ.

    ເມື່ອ​ເດືອນ​ເມສາ​ທີ່​ຜ່ານ​ມາ ລັດຖະມົນຕີ​ການ​ຄ້າ​ຂອງ​ສອງ​ປະເທດ​ດັ່ງກ່າວ ໄດ້​ເຫັນ​ດີ​ເປັນ​ເອກະສັນ​ກັນ ໃນ​ການ​ຊຸກຍູ້​ການ​ເຈລະຈາ FTA ແບບ​ສອງ​ຝ່າຍ. ຕາມ​ນັ້ນແລ້ວ ສອງ​ຝ່າຍ​ໄດ້​ດຳເນີນ​ການ​ເຈລະຈາ​ຮອບ​ທີ​ໜຶ່ງ ແລະ ທີ​ສອງ ຢ່າງ​ເປັນ​ທາງ​ການ ໃນ​ເດືອນ​ມິຖຸນາ ແລະ ເດືອນ​ກໍລະກົດ​ທີ່​ຜ່ານ​ມາ.

    ນອກຈາກ​ນັ້ນແລ້ວ ສ ເກົາຫຼີ ແລະ  ຟີ​ລິບ​ປິນ ກໍ​ໄດ້​ຕົກລົງ​ທີ່​ຈະ​ເຈລະຈາ​ໂດຍ​ສຸມ​ໃສ່​ໃນ​ປີ​ນີ້ ທັງ​ນີ້​ກໍ​ເພື່ອ​ໃຫ້​ບັນລຸ​ໝາກຜົນ ຢູ່​ໃນ​ກອງ​ປະຊຸມ​ສຸດ​ຍອດ​ພິເສດ ລະຫວ່າງ ສ ເກົາຫຼີ ກັບ​ສະມາຄົມ​ບັນດາ​ປະເທດ​ອາຊີ​ຕາເວັນ​ອອກ​ສ່ຽງ​ໃຕ້ (ASEAN) ທີ່​ຄາດ​ວ່າ​ຈະ​ຈັດ​ຂຶ້ນ​ໃນ​ເດືອນ ພະຈິກ​ໜ້າ​ນີ້ ທີ່​ນະຄອນ ບູ​ຊານ.

    ກະຊວງ​ອຸດສາຫະກຳ ການ​ຄ້າ ແລະ ຊັບພະຍາກອນ ຂອງ ສ ເກົາຫຼີ ໃຫ້​ຮູ້​ວ່າ ຟີ​ລິບ​ປິນ ເປັນ​ຄູ່​ຮ່ວມ​ທາງ​ດ້ານ​ການ​ຄ້າ​ໃຫຍ່​ອັນ​ດັບ​ທີ​ຫ້າ​ຂອງ ສ ເກົາຫຼີ ຢູ່​ໃນ ASEAN. ການ​ທີ່​ສຳເລັດ​ການ​ລົງ​ນາມ FTA ຈະ​ເປັນ​ການ​ຊ່ວຍ​ສ້າງ​ປຶກ​ແຜ່ນ ເພື່ອ​ເປີດ​ກວ້າງ​ການ​ລົງທຶນ ແລະ ການ​ຄ້າ​ແບບ​ສອງ​ຝ່າຍ ເຮັດ​ໃຫ້​ເກີດ​ໝາກຜົນ​ອັນ​ເປັນ​ຈຸດ​ໃຈກາງ ໃຫ້​ແກ່​ນະໂຍບາຍ “ທິດໃຕ້​ໃໝ່” ຂອງ​ລັດຖະບານ ສ ເກົາຫຼີ.

ຂ່າວທີ່ກ່ຽວຂ້ອງ