ຂ່າວຫຼ້າສຸດ

ນາຊາຍທອງ ນຳພາປະຊາຊົນທຳລາຍແຫຼ່ງເພາະພັນຍຸງລາຍ

713 15 ສ.ຫ. 2019 ຂ່າວໜ້າ​ໜຶ່ງ

    ເພື່ອ​ເປັນ​ການ​ຄວບ​ຄຸມ ແລະ ປ້ອງ​ກັນ​ພະ­ຍາດ​ໄຂ້­ຍຸງ​ລາຍ​ທີ່​ໄດ້​ເກີດ​ການ​ລະ­ບາດ ທາງ​ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ນາ​ຊາຍ​ທອງ ໂດຍ​ໄດ້​ຮັບ​ການ​ຊີ້​ນຳ​ຈາກ​ອຳ­ນາດ​ການ​ປົກ­ຄອງ​ເມືອງ ກໍ​ຄື ພະ​ແນກ​ສາ­ທາ­ລະ­ນະ​ສຸກ ນະ­ຄອນ­ຫຼວງ​ວຽງ​ຈັນ ໃຫ້​ສ້າງ​ຂະ​ບວນ​ການ​ຕະ­ລຸມ­ບອນ​ນຳ­ພາ​ປະ­ຊາ­ຊົນ​ທຳ­ລາຍ​ແຫຼ່ງ​ເພາະ​ພັນ​ໜອນ​ນ້ຳ​ຍຸງ​ລາຍ​ເປັນ​ປະ­ຈຳ​ທຸກໆ​ອາ­ທິດ ຈຶ່ງ​ພາ­ໃຫ້​ຄວາມ​ໜາ​ແໜ້ນ​ຂອງ​ໜອນ​ຍຸງ​ຫຼຸດ​ລົງ​ກວ່າ​ເຄິ່ງ​ໜຶ່ງ ແລະ ຈຳ­ນວນ​ຄົນ​ເຈັບ​ພະ­ຍາດ​ໄຂ້­ຍຸງ​ລາຍ​ກໍ​ຫຼຸດ​ລົງ​ເຊັ່ນ​ດຽວ​ກັນ.

    ທ່ານ ດຣ ຄຳ​ພັນ ຂັນ​ຕິ​ລາດ ຮອງ​ຫົວ­ໜ້າ​ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ໄດ້​ໃຫ້​ສຳ­ພາດ ວັນ​ທີ 13 ສິງ­ຫາ ນີ້​ວ່າ: ພາຍ­ຫຼັງ​ທີ່​ສະ­ພາບ​ໄຂ້­ຍຸງ​ລາຍ​ໄດ້​ມີ​ການ​ລະ­ບາດ​ເກີດ​ຂຶ້ນ ເພື່ອ​ປ້ອງ​ກັນ ແລະ ຫຼຸດ­ຜ່ອນ​ຈຳ­ນວນ​ກໍ­ລະ­ນີ​ເກີດ​ຂຶ້ນ​ໃໝ່​ຂອງ​ພະ­ຍາດ​ດັ່ງ­ກ່າວ ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ຈຶ່ງ​ໄດ້​ຈັດ​ເຝິກ­ອົບ­ຮົມ​ວິ­ທີ​ການ​ປ້ອງ​ກັນ​ພະ­ຍາດ​ໄຂ້­ຍຸງ​ລາຍ​ໃຫ້ ອສບ ໃນ 54 ບ້ານ​ທົ່ວ​ເມືອງ ຈຳ­ນວນ 444 ຄົນ ພາຍ­ຫຼັງ​ສຳ­ເລັດ​ການ​ເຝິກ­ອົບ­ຮົມ ອສບ ໄດ້​ຮ່ວມ​ກັບ​ພະ­ນັກ­ງານ​ສາ­ທາ­ລະ­ນະ​ສຸກ​ລົງ​ໄປ​ນຳ­ພາ​ປະ­ຊາ­ຊົນ​ຕະ­ລຸມ­ບອນ​ທຳ­ລາຍ​ແຫຼ່ງ​ເພາະ​ພັນ​ໜອນ​ນ້ຳ​ຍຸງ​ລາຍ​ເປັນ​ປະ­ຈຳ​ທຸກໆ​ອາ­ທິດ ຈຶ່ງ​ສົ່ງ​ຜົນ​ໃຫ້​ມາ​ຮອດ​ປັດ­ຈຸ­ບັນ​ຄວາມ​ໜາ​ແໜ້ນ​ຂອງ​ໜອນ​ຍຸງ​ສາ­ມາດ​ຫຼຸດ​ລົງ​ກວ່າ​ເຄິ່ງ​ໜຶ່ງ ຖ້າ​ທຽບ­ໃສ່​ໄລ­ຍະ​ເດືອນ​ກໍ­ລະ­ກົດ​ຜ່ານ​ມາ ແຕ່​ກໍ​ຍັງ​ມີ​ບາງ​ບ້ານ​ທີ່​ຍັງ​ມີ​ຄວາມ​ໜາ​ແໜ້ນ​ຂອງ​ໜອນ​ຍຸງ ແລະ ຍັງ​ມີ​ກໍ­ລະ­ນີ​ຄົນ​ເຈັບ​ເກີດ​ຂຶ້ນ​ໃໝ່​ທີ່​ຕ້ອງ​ໄດ້​ສືບ­ຕໍ່​ເຝົ້າ​ລະ­ວັງ ແລະ ຕະ­ລຸມ­ບອນ​ທຳ­ລາຍ​ແຫຼ່ງ​ເພາະ​ພັນ​ໜອນ​ຍຸງ ຄື: ບ້ານ​ນາ​ສ້ຽວ ນາ​ຄູນ ຫ້ວຍ​ນ້ຳ​ເຢັນ ສົງ​ເປືອຍ​ເໜືອ ສົງ​ເປືອຍ​ໃຕ້ ອີ​ໄລ​ເໜືອ ອີ​ໄລ​ໃຕ້ ບ້ານ​ຖ້ຳ ແລະ ບ້ານ​ໂພ​ໄຊ ເຊິ່ງ​ທາງ​ຫ້ອງ­ການ​ສາ­ທາ­ລະ­ນະ​ສຸກ ແລະ ອສບ ຈະ​ສືບ­ຕໍ່​ນຳ­ພາ​ປະ­ຊາ­ຊົນ​ສ້າງ​ຂະ​ບວນ​ການ​ທຳ­ລາຍ​ແຫຼ່ງ​ເພາະ​ພັນ​ໜອນ​ຍຸງ.

    ສຳ­ລັບ​ວຽກ​ງານ​ປິ່ນ­ປົວ​ໃນ​ໄລ­ຍະ​ຜ່ານ​ມາ ໄດ້​ຈັດ​ເຝິກ­ອົບ­ຮົມ​ໃຫ້ ໝໍ ພະ­ຍາ­ບານ ເພື່ອ​ໃຫ້​ມີ​ຄວາມ​ພ້ອມ​ໃນ​ການ​ຮັບ​ມື​ປິ່ນ­ປົວ​ຄົນ​ເຈັບ​ພະ­ຍາດ​ດັ່ງ­ກ່າວ ມາ​ຮອດ​ປັດ­ຈຸ­ບັນ​ຄົນ​ເຈັບ​ໄຂ້­ຍຸງ​ລາຍ​ໄດ້​ຫຼຸດ​ລົງ​ເຫຼືອ​ພຽງ 3-4 ຄົນ​ຕໍ່​ມື້​ທີ່​ເຂົ້າ​ມາ​ນອນ​ປິ່ນ­ປົວ ທຽບ­ໃສ່​ໄລ­ຍະ​ເດືອນ​ກໍ­ລະ­ກົດ​ຜ່ານ​ມາ ມີ​ຄົນ​ເຈັບ​ເຂົ້າ​ມາ​ປິ່ນ­ປົວ​ເຖິງ 20-30 ຄົນ​ຕໍ່​ມື້ ເວົ້າ​ລວມ​ແລ້ວ ສະ­ພາບ​ການ​ເກີດ​ຂຶ້ນ​ຂອງ​ພະ­ຍາດ​ໄຂ້­ຍຸງ​ລາຍ​ພາຍ​ໃນ​ເມືອງ​ນາ​ຊາຍ​ທອງ​ແມ່ນ​ມີ​ທ່າ​ອ່ຽງ​ຫຼຸດ​ລົງ ປັດ­ຈຸ­ບັນ​ມີ​ຄົນ​ເຈັບ​ສະ​ສົມ ຈຳ­ນວນ 209 ຄົນ ເສຍ​ຊີ­ວິດ 1 ຄົນ ເຊິ່ງ​ຖື​ໄດ້​ວ່າ​ເມືອງ​ນາ​ຊາຍ​ທອງ​ເປັນ​ເມືອງ​ທີ່​ມີ​ຄົນ​ເຈັບ​ໜ້ອຍ​ທີ່​ສຸດ​ໃນ​ບັນ­ດາ 9 ເມືອງ​ໃນ​ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ