ຂ່າວຫຼ້າສຸດ

ບຳລຸງວຽກງານ ປກຊ-ປກສ ໃຫ້ການນຳຂັ້ນນະຄອນຫຼວງ

750 15 ສ.ຫ. 2019 ຂ່າວໜ້າ​ໜຶ່ງ
ບຳລຸງວຽກງານ ປກຊ-ປກສ ໃຫ້ການນຳຂັ້ນນະຄອນຫຼວງ

    ຊຸດ​ເຝິກ­ອົບ­ຮົມ​ບຳ­ລຸງ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ (ປກຊ-ປກສ) ໃຫ້​ແກ່​ພະ­ນັກ­ງານ​ການ​ນຳ  (ເປົ້າ​ໝາຍ 3) ຂັ້ນ​ນະ­ຄອນ­ຫຼວງ​ວຽງ​ຈັນ ຊຸດ​ທີ I ໄດ້​ເປີດ​ຂຶ້ນ​ວັນ​ທີ 14 ສິງ­ຫາ 2019 ທີ່​ກອງ​ບັນ­ຊາ​ການ​ທະ­ຫານ ນະ­ຄອນ­ຫຼວງ​ວຽງ​ຈັນ  ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ ພົ​ຈວ ສີ​ພອນ ຈັນ​ສົມ​ວົງ ຫົວ­ໜ້າ​ການ­ເມືອງ ກອງ​ບັນ­ຊາ​ການ​ທະ­ຫານ ນະ­ຄອນ­ຫຼວງ​ວຽງ​ຈັນ ແລະ ທ່ານ ພົ​ຈວ ບຸບ­ຜາ ສີ​ພົມ­ມາ ຫົວ­ໜ້າ​ກອງ​ບັນ­ຊາ​ການ ປກສ ນະ­ຄອນ­ຫຼວງ​ວຽງ​ຈັນ ຕະ­ຫຼອດ​ຮອດ​ສຳ​ມະ​ນາ​ກອນ​ທີ່​ມາ​ຈາກ​ບັນ­ດາ​ພະ­ແນກ­ການ ແລະ ຂະ­ແໜງ­ການ​ກ່ຽວ­ຂ້ອງ​ອ້ອມ​ຂ້າງ​ນະ­ຄອນ­ຫຼວງ​ວຽງ​ຈັນ​ເຂົ້າ​ຮ່ວມ.

    ທ່ານ ພັອ ສີ ທະ­ວີ​ໄຊ ຫົວ­ໜ້າ​ການ​ທະ­ຫານ ກອງ​ບັນ­ຊາ​ການ​ທະ­ຫານ​ນະ­ຄອນ­ຫຼວງ​ກ່າວ​ວ່າ: ການ​ອົບ­ຮົມ​ໃນ​ຄັ້ງ​ນີ້​ແມ່ນ​ຈະ​ດຳ­ເນີນ​ໄປ​ເປັນ​ເວ­ລາ 20 ວັນ ເຊິ່ງ​ບັນ­ດາ​ການ​ນຳ​ຈະ​ໄດ້​ຮຽນ​ຮູ້​ບາງ​ທັດ­ສະ­ນະ​ພື້ນ­ຖານ​ຂອງ​ພັກ​ຕໍ່​ວຽກ​ງານ​ການ​ທະ­ຫານ​ທ້ອງ­ຖິ່ນ​ໃນ​ໄລ­ຍະ​ໃໝ່ ບາງ​ບັນ­ຫາ​ກ່ຽວ​ກັບ​ການ​ສະ­ກັດ​ກັ້ນ​ຕ້ານ​ຍຸດ​ທະ​ສາດ​ການ​ຫັນ­ປ່ຽນ​ໂດຍ​ສັນ­ຕິ-ກໍ່​ກະ­ບົດ​ການ​ລຸກ​ຮື້​ຂຶ້ນ​ຂອງ​ອິດ​ທິ​ກຳ­ລັງ​ປໍ​ລະ​ປັກ ສົງ­ຄາມ​ປະ­ຊາ­ຊົນ ປົກ​ປັກ​ຮັກ­ສາ​ປະ­ເທດ​ຊາດ ບົດ­ບາດ​ທີ່​ເປັນ​ເສ­ນາ​ທິ​ການ​ຂອງ​ບັນ­ດາ​ອົງ­ການ ພະ­ແນກ­ການ ອົງ​ການ­ຈັດ­ຕັ້ງ​ມະ­ຫາ­ຊົນ​ຂັ້ນ​ເມືອງ​ຕໍ່​ວຽກ​ງານ​ປ້ອງ​ກັນ​ຊາດ ພັດ­ທະ­ນາ​ເສດ­ຖະ­ກິດ-ສັງ­ຄົມ ຕິດ​ພັນ​ກັບ​ວຽກ​ງານ ປກຊ-ປກສ ຢູ່​ຂັ້ນ​ເມືອງ ກໍ່­ສ້າງ​ທ່າ​ສະ​ໝາມ​ສົງ­ຄາມ​ປະ­ຊາ­ຊົນ3 ຂັ້ນ ວ່າ​ດ້ວຍ​ການ­ຈັດ­ຕັ້ງ​ການ­ເຄື່ອນ­ໄຫວ​ຂອງ​ກຳ­ລັງ​ກອງ​ຫຼອນ ປກສ ບ້ານ ກຸ່ມ​ບ້ານ ກຳ­ລັງ​ປ້ອງ​ກັນ​ພາຍ​ໃນ ແລະ ກຳ­ລັງ​ປ້ອງ​ກັນ​ຕົວ ວ່າ​ດ້ວຍ​ການ​ສ້າງ​ຄອບ­ຄົວ ແລະ ບ້ານ​ປ້ອງ​ກັນ​ຊາດ​ເຂັ້ມ­ແຂງ ການ​ກໍ່­ສ້າງ​ທ່າ​ສະ­ໜາມ​ສູ້​ຮົບ​ປ້ອງ​ກັນ​ບໍ­ລິ­ເວນ​ເມືອງ ນະ­ຄອນ ຄວາມ​ຮັບ​ຮູ້​ລວມ​ກ່ຽວ​ກັບ​ຄວາມ​ສະ­ຫງົບ ແລະ ວຽກ​ງານ​ປ້ອງ​ກັນ​ຄວາມ​ສະ­ຫງົບ​ຂອງ​ຊາດ ວຽກ​ງານ​ຕ້ານ​ອາ​ຊະ​ຍາ​ກຳ ແລະ ສິ­ລະ​ປະ­ຍຸດ​ປືນ AK ແລະ ປືນ K59.

    ໃນ​ໂອ­ກາດ​ດັ່ງ­ກ່າວ ທ່ານ ສີ​ຫຸນ ສິດ­ທິ​ລື​ໄຊ ກໍ​ໄດ້​ເນັ້ນ​ໃຫ້​ບັນ­ດາ​ການ​ນຳ​ທີ່​ອົບ­ຮົມ​ໃນ​ຄັ້ງ​ນີ້​ຈົ່ງ​ຍົກ​ສູງ​ຄວາມ​ຮັບ­ຜິດ­ຊອບ​ເປັນ​ເຈົ້າ​ການ ເອ­ກະ​ພາບ ປະ­ດິດ​ສ້າງ​ເຂົ້າ​ໃນ​ການ​ຄົ້ນ­ຄວ້າ​ຮ່ຳ­ຮຽນ​ທິດ​ສະ​ດີ​ຫຼັກ­ການ ມີ​ການ​ສົມ​ທຽບ​ກັບ​ບົດ­ຮຽນ​ຕົວ​ຈິງ​ຂອງ​ອົງ­ການ ກົມ​ກອງ​ທ້ອງ­ຖິ່ນ ຈາກ​ນັ້ນ ຕ້ອງ​ປັບ­ປຸງ​ໄດ້​ທັດ­ສະ­ນະ​ແນວ­ທາງ​ການ​ພັດ­ທະ­ນາ​ຕໍ່​ໄປ​ໃຫ້​ສອດ­ຄ່ອງ​ກັບ​ຍຸດ​ທະ​ສາດ​ການ​ປົກ​ປັກ​ຮັກ­ສາ​ປະ­ເທດ​ຊາດ​ໃນ​ໄລ­ຍະ​ໃໝ່ ພາຍ­ຫຼັງ​ສຳ­ເລັດ​ການ​ບຳ­ລຸງ​ແລ້ວ ໃຫ້​ສ້າງ​ໄດ້​ທັດ­ສະ­ນະ​ຄວາມ​ຮັບ​ຮູ້​ເຂົ້າ­ໃຈ​ຕໍ່​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ​ທີ່​ຖືກ­ຕ້ອງ ເປັນ​ເອ­ກະ​ພາບ​ໃນ​ທົ່ວ​ທ້ອງ­ຖິ່ນ ແລະ ສູນ​ກາງ ເສີມ​ຂະ­ຫຍາຍ​ໄດ້​ພາ­ລະ​ບົດ­ບາດ​ເປັນ​ເສ­ນາ​ທິ​ການ​ທາງ​ດ້ານ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ​ໃຫ້​ແກ່​ທ້ອງ­ຖິ່ນ​ຕົນ.

ຂ່າວທີ່ກ່ຽວຂ້ອງ