ຂ່າວຫຼ້າສຸດ

ເຈົ້າຄອງ ລົງຊຸກຍູ້ການຜະລິດກະສິກຳເປັນສິນຄ້າ ຢູ່ເມືອງໄຊທານີ ແລະ ປາກງື່ມ

754 15 ສ.ຫ. 2019 ຂ່າວໜ້າ​ໜຶ່ງ
ເຈົ້າຄອງ ລົງຊຸກຍູ້ການຜະລິດກະສິກຳເປັນສິນຄ້າ ຢູ່ເມືອງໄຊທານີ ແລະ ປາກງື່ມ

    ເພື່ອ​ສະ­ແດງ​ຄວາມ​ຫ່ວງ​ໃຍ ແລະ ຊຸກ­ຍູ້​ສົ່ງ­ເສີມ​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ​ຂອງ​ຜູ້​ປະ­ກອບ​ການ ແລະ ປະ­ຊາ­ຊົນ​ບັນ­ດາ­ເຜົ່າ​ຢູ່​ໃນ​ນະ­ຄອນ­ຫຼວງ​ວຽງ​ຈັນ ໂດຍ​ສະ­ເພາະ ການ​ຜະ­ລິດ​ກະ­ສິ­ກຳ​ປູກ­ຝັງ-ລ້ຽງ­ສັດ​ຢູ່​ບ້ານ​ແສນ​ອຸ­ດົມ ແລະ ບ້ານ​ທ່າ​ເດື່ອ​ສິງ​ຫອມ ໃຫ້​ດີ​ຂຶ້ນ ວັນ​ທີ 14 ສິງ­ຫາ 2019 ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ ພ້ອມ​ດ້ວຍ​ຄະ­ນະ ໄດ້​ລົງ​ເຄື່ອນ​ໄຫວ​ຢ້ຽມ­ຢາມ​ຊຸກ­ຍູ້​ບໍ­ລິ­ສັດ ໄຊ​ພອນ XP ບ້ານ​ແສນ​ອຸ­ດົມ ເມືອງ​ໄຊ​ທາ­ນີ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ໄຊ​ພອນ ພຸດ​ທະ​ວົງ ປະ­ທານ​ບໍ­ລິ­ສັດ ໄຊ​ພອນ XP ພ້ອມ​ດ້ວຍ​ຄອບ­ຄົວ ແລະ ພະ­ນັກ­ງານ​ພາຍ​ໃນ​ບໍ­ລິ­ສັດ.

    ການ​ລົງ​ຊຸກ­ຍູ້​ຄັ້ງ​ນີ້ ທ່ານ​ເຈົ້າ​ຄອງ​ພ້ອມ​ຄະ­ນະ ໄດ້​ຢ້ຽມ​ຊົມ​ເນື້ອ­ທີ່​ການ​ປູກ ແລະ ການ​ເກັບ​ກ່ຽວ​ຫຍ້າ​ດ້ວຍ​ກົນ​ຈັກ​ທັນ​ສະ­ໄໝ ພ້ອມ​ທັງ​ໄດ້​ຮັບ​ລາຍ​ງານ​ສະ­ພາບ​ການ​ຜະ­ລິດ​ຫຍໍ້​ຈາກ​ທ່ານ ໄຊ​ພອນ ພຸດ​ທະ​ວົງ ເຫັນ​ວ່າ​ບໍ­ລິ­ສັດ​ມີ​ເນື້ອ­ທີ່​ປູກ​ຫຍ້າ​ທັງ​ໝົດ​ມີ 255 ເຮັກ­ຕາ ເລີ່ມ​ປູກ​ປີ 2017 ເປັນ­ຕົ້ນ​ມາ ແລະ ຫຍ້າ​ທີ່​ບໍ­ລິ­ສັດ​ປູກ ປະ­ເພດ​ຫຍ້າ​ກິນ​ນີ້​ມຳ​ບາ​ຊ່າ​ເປັນ​ຫຍ້າ​ທີ່​ປູກ​ໃຫຍ່​ໄວ 40 ວັນ ສາ­ມາດ​ຕັດ​ເທື່ອ​ໜຶ່ງ ຜົນ​ຜະ­ລິດ​ເນື້ອ­ທີ່ 1 ເຮັກ­ຕາ ໄດ້ 80 ໂຕນ ບໍ­ລິ­ສັດ​ວາງ​ແຜນ​ປູກ​ຫຍ້າ​ໃຫ້​ໄດ້ 200 ເຮັກ­ຕາ ໃນ​ນັ້ນ ຈະ​ຜະ­ລິດ​ຫຍ້າ​ໄດ້ 16.000 ໂຕນ ສາ­ມາດ​ລ້ຽງ​ງົວ​ໄດ້ 2.000 ໂຕ ສຳ­ລັບ​ແນວ​ພັນ​ຊື້​ຢູ່​ພາຍ​ໃນ​ປະ­ເທດ 1 ກິ​ໂລ ລາ­ຄາ 70.000 ກີບ ພ້ອມ​ນີ້ ປະ­ທານ​ບໍ­ລິ­ສັດ ຍັງ​ໄດ້​ສະ­ເໜີ​ຕໍ່​ທ່ານ​ເຈົ້າ​ຄອງ​ໃຫ້​ຊ່ວຍ​ຊອກ​ຕະ­ຫຼາດ​ຮອງ​ຮັບ ແລະ ບັນ­ຫາ​ອື່ນໆ​ອີກ​ຈຳ­ນວນ​ໜຶ່ງ.

    ພ້ອມ​ນີ້ ທ່ານ​ເຈົ້າ​ຄອງ ນວ ໄດ້​ໃຫ້​ກຽດ​ໂອ້​ລົມ ກ່ອນ​ອື່ນ​ທ່ານ​ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ທ່ານ ໄຊ​ພອນ ພຸດ​ທະ​ວົງ ທີ່​ເວົ້າ​ແທ້​ທຳ​ຈິງ ຈັດ​ຕັ້ງ​ປະ­ຕິ­ບັດ​ໃຫ້​ເກີດ​ຜົນ​ປະ­ໂຫຍດ ເປັນ​ຕົວ​ແບບ​ທີ່​ດີ​ໃຫ້​ກັບ​ຟາມ​ອື່ນໆ ແລະ ຊົມ­ເຊີຍ​ສາ­ມາດ​ບຸກ​ທະ­ລຸ​ດ້ານ​ກະ­ສິ­ກຳ ສຳ­ລັບ​ຄຳ​ສະ­ເໜີ​ຈະ​ມອບ​ໃຫ້​ພາກ­ສ່ວນ​ກ່ຽວ­ຂ້ອງ​ຊອກ​ຫາ​ຕະ­ຫຼາດ​ໃຫ້ ພ້ອມ​ນີ້ ທ່ານ​ເຈົ້າ​ຄອງ ນວ ໄດ້​ເນັ້ນ​ໃຫ້​ບໍ­ລິ­ສັດ​ເຮັດ​ບໍ­ລິ­ການ​ແບບ​ປະ­ສົມ​ປະ­ສານ ການ­ທ່ອງ­ທ່ຽວ ຕິດ​ພັນ​ກັບ​ການ​ກະ­ສິ­ກຳ ເພື່ອ​ເຮັດ​ໃຫ້​ທຸ­ລະ​ກິດ​ມີ​ທ່າ­ແຮງ​ຫຼາຍ​ດ້ານ ແລະ ມີ​ຄວາມ​ຍືນ​ຍົງ​ຕະ­ຫຼອດ​ໄປ.

    ຈາກ​ນັ້ນ ທ່ານ​ເຈົ້າ​ຄອງ ນວ ພ້ອມ​ຄະ­ນະ ໄດ້​ໄປ​ຢ້ຽມ​ຊົມ​ກຸ່ມ​ຜະ­ລິດ​ກະ­ສິ­ກຳ​ຕົວ​ແບບ​ເຊ​ມາ​ອູນ​ດົງ ຢູ່​ຫ້ອງ­ການ​ບ້ານ​ທ່າ​ເດື່ອ​ສິງ​ຫອມ ເມືອງ​ປາກ​ງື່ມ ຖືກ​ຕ້ອນ­ຮັບ​ຈາກ​ທ່ານ ຄຳ​ໝູນ ຕຽງ​ທະ​ລາດ ເຈົ້າ­ເມືອງ​ປາກ​ງື່ມ ພ້ອມ​ດ້ວຍ​ອຳ­ນາດ​ການ​ປົກ­ຄອງ​ບ້ານ ອາ­ສາ​ສະ­ໝັກ ສ ເກົາ­ຫຼີ ແລະ ປະ­ຊາ­ຊົນ​ພາຍ​ໃນ 3 ບ້ານ​ເຂົ້າ​ຮ່ວມ ເຊິ່ງ​ທ່ານ ນົບ­ພະ­ລັດ ພິ­ຈິດ ນາຍ­ບ້ານ​ທ່າ​ເດື່ອ​ສິງ​ຫອມ ໄດ້​ລາຍ​ງານ​ສະ­ພາບ​ອັນ​ພົ້ນ​ເດັ່ນ​ຂອງ​ບ້ານ​ໂດຍ​ຫຍໍ້ ເຫັນ​ວ່າ: ບ້ານ​ທ່າ​ເດື່ອ​ສິງ​ຫອມ ນອນ​ຢູ່​ໃນ​ໜ່ວຍ 3 ກຸ່ມ​ດົງ​ກະ­ລຶມ ມີ​ປະ­ຊາ­ຊົນ​ທັງ​ໝົດ 673 ຄົນ ຍິງ 427 ຄົນ ມີ 13 ໜ່ວຍ ມີ 123 ຄອບ­ຄົວ ມີ 139 ຫຼັງ­ຄາ​ເຮືອນ ມີ​ເນື້ອ­ທີ່​ທຳ​ການ​ຜະ­ລິດ 227 ເຮັກ­ຕາ ໃນ​ນັ້ນ ເນື້ອ­ທີ່​ນາ 127 ເຮັກ­ຕາ ເຮັດ​ນາ­ແຊງ​ໄດ້ 91 ເຮັກ­ຕາ ບ້ານ​ທ່າ​ເດື່ອ​ສິງ​ຫອມ ໄດ້​ຮັບ​ໂຄງ­ການ​ເຊ​ມາ​ອູນ​ດົງ ຂອງ ສ ເກົາ­ຫຼີ ແຕ່​ປີ 2017 ເປັນ­ຕົ້ນ​ມາ ຜົນ​ໄດ້​ຮັບ​ຈາກ​ໂຄງ­ການ​ດັ່ງ­ກ່າວ​ປະ­ກອບ​ມີ 3 ບ້ານ ຄື: ບ້ານ​ທ່າ​ເດື່ອ​ສິງ​ຫອມ ດອນ​ກົກ​ໂພ ແລະ ບ້ານ​ໝາກ​ຮຽວ ທັງ​ສາມ​ບ້ານ​ໄດ້​ຫ້ອງ­ການ​ບ້ານ​ຖາ­ວອນ 2 ຊັ້ນ​ພ້ອມ​ອຸ­ປະ­ກອນ​ຄົບ​ຊຸດ ເສັ້ນ­ທາງ​ຮ່ອມ ສາງ​ເກັບ​ເຂົ້າ­ເປືອກ ປັດ­ຈຸ­ບັນ​ຢູ່​ບ້ານ​ທ່າ​ເດື່ອ​ມີ​ທາງ​ເທ​ເບ​ຕົງ​ຍາວ 150 ແມັດ ສ້ອມ­ແປງ​ອາ­ຄານ​ໂຮງ­ຮຽນ ຊຸກ­ຍູ້​ເສດ­ຖະ­ກິດ ເຮັດ​ໂຄງ­ການ​ສ້າງ​ເຮືອນ​ຮົ່ມ​ຢູ່​ບ້ານ​ດອນ​ກົກ​ໂພ ທ່າ​ເດື່ອ ແລະ ໝາກ​ຮຽວ ກຳ­ລັງ​ລິ​ເລີ່ມ​ເຮັດ​ໂຄງ­ການ​ສາ­ທິດ​ນາ​ຕາມ​ທິດ​ທາງ​ຂອງ​ເຊ​ມາ​ອູນ​ດົງ​ໄດ້​ຮັບ​ຜົນ​ດີ ພາຍ­ຫຼັງ​ໂຄງ­ການ​ນີ້​ເຂົ້າ​ມາ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ແຕ່​ລະ​ບ້ານ​ດີ​ຂຶ້ນ ພິ­ເສດ ບ້ານ​ທ່າ​ເດື່ອ​ມີ​ກຸ່ມ​ຜະ­ລິດ​ຜັກ ກຸ່ມ​ຜະ­ລິດ​ເຂົ້າ​ເປັນ​ສິນ­ຄ້າ ກຸ່ມ​ລ້ຽງ​ແບ້ ກຸ່ມ​ລ້ຽງ​ງົວ ສຳ­ລັບ​ສອງ​ບ້ານ​ປະ­ຊາ­ຊົນ​ໄດ້​ປູກ­ຝັງ-ລ້ຽງ­ສັດ​ປະ­ສົມ​ປະ­ສານ​ກັນ​ໄປ ພ້ອມ​ນີ້ ທ່ານ ນົບ­ພະ­ລັດ ພິ­ຈິດ ໄດ້​ສະ­ເໜີ​ບັນ­ຫາ​ຜົນ​ກະ­ທົບ​ທີ່​ພົບ­ພໍ້​ປະ­ຈຳ​ໃນ​ການ​ທຳ​ການ​ຜະ­ລິດ​ຕໍ່​ທ່ານ​ເຈົ້າ​ຄອງ​ຄື​ບັນ­ຫາ​ໄຟ­ຟ້າ​ບໍ່​ປົກ­ກະ­ຕິ (ຖືກ​ປິດ) ສາ­ເຫດ​ໂຄງ­ການ​ຊົນ­ລະ­ປະ­ທານ​ບ້ານ​ບໍ່​ມີ​ເງິນ​ສະ​ສົມ ຂໍ​ຊ່ວຍ­ເຫຼືອ​ດ້ານ​ງົບ 50% ເສັ້ນ­ທາງ​ລຽບ​ນ້ຳ­ຂອງ​ຍັງ​ເປັນ​ທາງ​ດິນ​ແດງ​ໄປ​ມາ​ບໍ່​ສະ­ດວກ​ທີ່​ກະ­ທົບ​ຕໍ່​ການ​ຂົນ­ສົ່ງ​ສິນ­ຄ້າ​ຂອງ​ປະ­ຊາ­ຊົນ.

    ຕອນ​ທ້າຍ ທ່ານ​ເຈົ້າ​ຄອງ ນວ ໄດ້​ມີ​ຄຳ​ເຫັນ​ໂອ້​ລົມ​ຕໍ່​ອຳ­ນາດ​ການ​ປົກ­ຄອງ ແລະ ປະ­ຊາ­ຊົນ ກ່ອນ​ອື່ນ​ທ່ານ​ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ໂຄງ­ການ​ເຊ​ມາ​ອູນ​ດົງ​ທີ່​ໃຫ້­ການ​ສະ­ໜັບ­ສະ­ໜູນ​ຊ່ວຍ­ເຫຼືອ​ພັດ­ທະ­ນາ​ພື້ນ­ຖານ​ໂຄງ​ລ່າງ ແລະ ດ້ານ​ເສດ­ຖະ­ກິດ​ຢູ່ 3 ບ້ານ ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ເຂັ້ມ­ແຂງ​ດີ​ຂຶ້ນ ສຳ­ລັບ​ຂໍ້​ສະ­ເໜີ​ແມ່ນ​ເປັນ​ຂໍ້​ສະ­ເໜີ​ທີ່​ດີ​ເພື່ອ​ນຳ​ຜົນ​ປະ­ໂຫຍດ​ເຂົ້າ​ມາ­ສູ່​ບ້ານ ສ່ວນ​ບັນ­ຫາ​ຢາກ​ໄດ້​ທາງ​ປູ­ຢາງ​ໄລ­ຍະ 23 ກິ­ໂລ­ແມັດ ນະ­ຄອນ­ຫຼວງ​ຍັງ​ພະ­ຍາ­ຍາມ​ຊອກ​ຫາ​ແຫຼ່ງ​ທຶນ​ມາ​ກໍ່­ສ້າງ ຄິດ​ວ່າ​ອີກ​ບໍ່​ດົນ​ຈະ​ໄດ້​ຈັດ​ຕັ້ງ​ປະ­ຕິ­ບັດ ສ່ວນ​ໄຟ­ຟ້າ​ບໍ່​ມາ​ປົກ­ກະ­ຕິ​ນັ້ນ​ຈະ​ແກ້​ໄຂ ພ້ອມ​ນີ້ ທ່ານ​ຍັງ​ໄດ້​ເນັ້ນ​ໃຫ້​ອຳ­ນາດ​ການ​ປົກ­ຄອງ ແລະ ປະ­ຊາ­ຊົນ​ສາມ​ບ້ານ​ໃຫ້​ສືບ­ຕໍ່​ປະ­ຕິ­ບັດ​ໂຄງ­ການ​ເຊ​ມາ​ອູນ​ດົງ​ໃຫ້​ມີ​ຄວາມ​ຍືນ​ຍົງ ແລະ ພັດ­ທະ­ນາ​ຕໍ່​ໄປ​ເລື້ອຍໆ.

ຂ່າວທີ່ກ່ຽວຂ້ອງ