ຂ່າວຫຼ້າສຸດ

ເທຄວັນໂດ ສ ເກົາຫຼີ ຢ້ຽມຢາມໂຄງການພັດທະນານັກກີລາລາວ

751 16 ສ.ຫ. 2019 ວົງຈອນກີລາ
ເທຄວັນໂດ ສ ເກົາຫຼີ ຢ້ຽມຢາມໂຄງການພັດທະນານັກກີລາລາວ

    ທ່ານ ຈອຍ ແມນ​ໂຮ (Choi Manho) ເລ­ຂາ­ທິ­ການ​ຂອງ​ສະ­ມາ­ຄົມ​ສົ່ງ­ເສີມ ເທ​ຄວັນ​ໂດ​ວັດທະ­ນະ​ທຳ ຈາກ ສ ເກົາ­ຫຼີ ຫຼື ເທ​ຄວັນ​ໂດ ເຟັກ​ຄັອບ (Peace Corps) ມາ​ຢ້ຽມ­ຢາມ ແລະ ຕິດ ຕາມ​ໂຄງ­ການ​ຮ່ວມ​ມື ລາວ-ເກົາ­ຫຼີ ກໍ​ຄື ສະ­ຫະ­ພັນ​ກີ­ລາ​ເທ​ຄວັນ​ໂດ​ແຫ່ງ​ຊາດ​ລາວ ແລະ ສະ­ມາ­ຄົມ ສົ່ງ­ເສີມ​ເທ​ຄວັນ​ໂດ​ວັດ­ທະ­ນະ­ທຳ ຈາກ ສ ເກົາ­ຫຼີ ເມື່ອ​ວັນ​ທີ 12 ສິງ­ຫາ 2019 ທີ່​ໂຮງ­ແຮມ​ລາວ ພລາ​ຊາ ໂດຍ​ມີ​ທ່ານ ຈັນ­ທະ​ວົງ ປັນ­ຍາ​ສິ­ລິ ເລ­ຂາ­ທິ­ການ ສະ­ຫະ ພັນ​ກີ­ລາ​ເທ​ຄວັນ​ໂດ​ແຫ່ງ​ຊາດ​ລາວ ພ້ອມ​ດ້ວຍ​ຄະ­ນະ​ບໍ­ລິ­ຫານ​ສະ­ຫະ­ພັນ ແລະ ທ່ານ ກິມ​ຈົງ​ວູ ຫົວ­ໜ້າ​ຄູ​ເຝິກ ເທ​ຄວັນ​ໂດ​ທີມ​ຊາດ​ລາວ ໃຫ້­ການ​ຕ້ອນ­ຮັບ​ຢ່າງ​ອົບ​ອຸ່ນ.

    ທ່ານ ຈັນ­ທະ​ວົງ ປັນ­ຍາ​ສິ­ລິ ໃຫ້​ຮູ້​ວ່າ: ການ​ມາ​ຢ້ຽມ­ຢາມ​ສະ­ຫະ­ພັນ​ເທ​ຄວັນ​ໂດ​ແຫ່ງ​ຊາດ​ລາວ ຄັ້ງ​ນີ້ ແມ່ນ​ມີ​ຈຸດ­ປະ­ສົງ​ເປົ້າ​ໝາຍ ຢາກ​ມາ​ກວດ­ກາ ແລະ ຕິດ­ຕາມ​ໂຄງ­ການ​ຮ່ວມ​ມື​ສົ່ງ­ເສີມ​ການ​ພັດ­ທະ­ນາ​ກີ­ລາ​ເທ​ຄວັນ​ໂດ ອາ​ຊຽນ-ສ ເກົາ­ຫຼີ ກໍ​ຄື ລະ­ຫວ່າງ ສ ເກົາ­ຫຼີ ສປປ ລາວ ກຳ­ປູ­ເຈຍ ໄທ ແລະ ສີ​ລັງ­ກາ ໂດຍ​ການ​ຮ່ວມ​ມື​ລາວ-ສ ເກົາ­ຫຼີ ໃນ​ຄັ້ງ​ນີ້ ແມ່ນ​ໄດ້​ເລີ່ມ​ຕົ້ນ​ມາ​ແຕ່​ປີ 2011 ຕະ­ຫຼອດ​ໄລ­ຍະ 8 ປີ­ຜ່ານ­ມາ ເທ​ຄວັນ​ໂກ​ລາວ​ເຮົາ ໄດ້​ຮັບ​ການ​ຊ່ວຍ­ເຫຼືອ ຈາກ​ສະ­ມາ­ຄົມ​ດັ່ງ­ກ່າວ​ຫຼາຍ​ດ້ານ ໂດຍ​ສະ­ເພາະ ໄດ້​ຮັບ​ການ​ຍົກ​ລະ­ດັບ​ຄວາມ​ຮູ້​ຄວາມ​ສາ­ມາດ​ຈາກ​ບັນ­ດາ​ອາ­ສາ​ສະ ໝັກ ເທ​ຄວັນ​ໂດ ສ ເກົາ­ຫຼີ ທີ່​ສົ່ງ ມາ​ທຸກ​ປີ ແລະ ສະ­ເພາະ​ປີ​ນີ້ ກໍ​ສືບ­ຕໍ່​ສົ່ງ 4 ຄົນ ມາ​ຖ່າຍ​ທອດ​ຄວາມ​ຮູ້​ຄວາມ ສາ­ມາດ​ໃນ​ການ​ຫຼິ້ນ ກີ­ລາ​ເທ​ຄວັນ​ໂດ​ລະ­ດັບ​ນາໆຊາດ ເປັນ​ເວ­ລາ 45 ວັນ ໃຫ້​ແກ່​ນັກ­ກີ­ລາ​ເທ​ຄວັນ​ໂດ​ລາວ ຈາກ 7 ສະ­ໂມ­ສອນ​ໂດຍ​ກົງ ເຊິ່ງ​ປະ­ກອບ​ມີ​ສະ­ໂມ­ສອນ​ເທ​ຄວັນ​ໂດ ກະ­ຊວງ​ປ້ອງ​ກັນ​ຄວາມ​ສະ­ຫງົບ ຫຼື ປກສ ສະ­ໂມ­ສອນ ລ້ານ​ຊ້າງ ສະ­ໂມ­ສອນ​ຕາ­ວັນ ສະ­ໂມ­ສອນ​ພີ​ເອັນ​ເອັດ ສະ­ໂມ­ສອນ​ນັນ​ດາ ແລະ ສະ­ໂມ­ສອນ​ທິ້ງ ໂດຍ​ໄດ້​ເລີ່ມ​ຕົ້ນ​ຍົກ ລະ­ດັບ​ມາ​ຕັ້ງ­ແຕ່​ເດືອນ​ກໍ­ລະ­ກົດ​ຜ່ານ​ມາ.

    ເປົ້າ​ໝາຍ​ໃນ​ການ​ມາ​ຢ້ຽມ­ຢາມ ຂອງ​ທ່ານ​ເລ­ຂາ­ທິ­ການ​ຂອງ​ສະ­ມາ­ຄົມ​ສົ່ງ­ເສີມ​ເທ​ຄວັນ​ໂດ ວັດ­ທະ­ນະ­ທຳ​ຈາກ ສ ເກົາ­ຫຼີ ແມ່ນ​ໄດ້​ສືບ­ຕໍ່​ຢ້ຽມ­ຢາມ​ໂຄງ­ການ​ດັ່ງ­ກ່າວ​ທີ່ 3 ປະ­ເທດ ຫຼັງ​ຈາກ​ມາ ສປປ ລາວ ກໍ​ໄດ້​ອອກ​ເດີນ­ທາງ ໄປ​ປະ­ເທດ​ກຳ­ປູ­ເຈຍ ກ່ອນ​ຈະ​ກັບ​ມາ​ຢ້ຽມ­ຢາມ​ໄທ ແລະ ສຸດ​ທ້າຍ​ກໍ​ໄປ​ຢ້ຽມ­ຢາມ​ປະ­ເທດ​ສີ​ລັງ­ກາ.

ຂ່າວທີ່ກ່ຽວຂ້ອງ