ມາລະຍາດເທິງເຟດບຸກ

2.973 16 ສ.ຫ. 2019 ນານາສາລະ

    ຜູ້​ຂຽນ​ບໍ່​ແມ່ນ​ຜູ້​ຊ່ຽວ­ຊານ​ດ້ານ​ເຟດ​ບຸກ ແຕ່​ຢາກ​ຂຽນ​ເລື່ອງ​ມາ­ລະ­ຍາດ​ເທິງ​ໜ້າ​ເຟດ​ບຸກ ເພາະ​ຢາກ​ໃຫ້​ບາງ​ຄົນ​ທີ່​ຂາດ​ມາ­ລະ­ຍາດ (ບໍ່​ສົນ​ໂລກ) ແຕ່​ພັດ​ຢາກ​ມີ​ໝູ່​ເພື່ອນ​ຄົບ​ຄ້າ​ສະ­ມາ­ຄົມ ທັງໆ​ທີ່​ໂຕ​ເອງ​ມີ​ພຶດ­ຕິ​ກຳ​ບໍ່​ເປັນ​ທີ່​ເຄົາ­ລົບ ມີ​ພຶດ­ຕິ​ກຳ​ເປັນ​ທີ່​ລະ​ແວງ​ສົງ­ໄສ ເພາະ​ເຟດ​ບຸກ​ຂອງ​ຕົນ​ທີ່​ຕັ້ງ​ມາ​ຫຼິ້ນ​ກັບ​ບໍ່​ໃສ່​ຮູບ​ພາບ ແລະ ຂໍ້​ມູນ​ຂອງ​ຕົນ ຫຼື ບາງ​ກໍ­ລະ­ນີ​ຍິ່ງ​ຮ້າຍ​ກວ່າ​ນັ້ນ​ໄປ​ທ່ຽວ​ກັອບ​ປີ້​ຮູບ​ຄົນ​ອື່ນ​ມາ​ໃສ່​ໜ້າ​ເຟດ​ຂອງ​ຕົນ​ກໍ​ມີ.

    ມາ­ລະ­ຍາດ​ເທິງ​ໜ້າ​ເຟດ​ບຸກ​ທີ່​ຜູ້​ເປັນ​ເຈົ້າ​ຂອງ​ເຟດ​ຄວນ​ມີ ກໍ​ຄື: ການ​ໃສ່​ຮູບ​ຂອງ​ຕົນ​ເອງ ແລະ ມີ​ຂໍ້​ມູນ​ຕິດ­ຕໍ່ ທີ່­ຢູ່​ທີ່​ຖືກ­ຕ້ອງ ເວ­ລາ​ເຈົ້າ​ຂອງ​ແອັດ​ໄປ​ຂໍ​ເປັນ​ເພື່ອນ​ກັບ​ຄົນ​ອື່ນ ຜູ້​ຈະ​ຮັບ​ເອົາ​ເປັນ​ເພື່ອນ​ເຂົາ​ຈຶ່ງ​ບໍ່​ລະ​ແວງ​ສົງ­ໄສ ເພາະ​ບາງ​ຄົນ​ນິ­ໄສ​ບໍ່​ດີ ມັກ​ຫາ​ເລື່ອງ ຫຼື ຊູ​ຊີ​ຂີ້­ສໍ້​ຕໍ​ແຫຼ ກໍ​ສ້າງ​ເຟດ​ບຸກ​ແລ້ວ​ເລາະ​ຫາ​ເລື່ອງ​ຜິດ​ກັບ​ຄົນ​ອື່ນ​ຕະ­ຫຼອດ​ເວ­ລາ ໂດຍ​ຢຶດ​ແນວ​ຄິດ​ຂອງ​ຕົນ​ເອງ​ເປັນ​ທີ່​ຕັ້ງ ປະ­ເພດ​ເຈົ້າ​ຂອງ​ເຟດ​ບໍ່​ໃສ່​ຮູບ ແລະ ຂໍ້​ມູນ​ແທ້​ຈິງ​ຂອງ​ຕົນ​ນີ້ ທ່ານ​ຜູ້​ອ່ານ​ລອງ​ເບິ່ງ​ວ່າ​ໃຜ​ຈະ​ກ້າ​ຮັບ​ເປັນ​ໝູ່​ນຳ​ແນ່ ? ຄວາມ​ຈິງ ກໍ​ຄື ຖ້າ​ຕົນ​ເອງ​ທຳ​ໂຕ​ເປັນ​ບຸກ­ຄົນ​ລຶກ​ລັບ​ປານ​ຜີ​ປານ​ເຜດ ແມ້​ແຕ່​ເທວະ​ດາ​ເຂົາ​ກະ​ບໍ່​ກ້າ​ຄົບ​ນຳ​ດອກ !.

    ມາ­ລະ­ຍາດ​ຕໍ່​ມາ​ຂອງ​ຜູ້​ຫຼິ້ນ​ເຟດ ກໍ​ຄື ບໍ່​ຄວນ​ສົ່ງ​ຂໍ້​ມູນ​ທີ່​ຂາດ​ຄວາມ​ຈິງ ຫຼື ຂໍ້​ມູນ ແລະ ຮູບ​ພາບ ວັດ­ຖຸ ຫຼື ສິ່ງ​ມີ​ຊີ­ວິດ​ແບບ​ແປກ​ປະ­ຫຼາດ ແລ້ວ​ອວຍ­ພອນ​ໃຫ້​ກັນ​ວ່າ ຂຶ້ນ​ໜ້າ​ເຟດ​ແລ້ວ​ຜູ້​ນັ້ນ​ລວຍ ເຊິ່ງ​ມາ­ລະ­ຍາດ​ຂໍ້​ນີ້​ຜູ້​ຫຼິ້ນ​ເຟດ​ຄວນ​ຄິດ​ໃຫ້​ແຈ້ງ ເພາະ​ຖ້າ​ພຽງ​ແຕ່​ເຫັນ​ຮູບ​ແລ້ວ​ປາ­ຖະ­ໜາ​ລວຍ ແລ້ວ​ສຳ­ເລັດ​ທາງ​ວິ­ທະ­ຍາ­ສາດ​ກໍ​ເປັນ​ໄປ​ບໍ່​ໄດ້ ເພາະ​ຄວາມ​ສຳ­ເລັດ​ເກີດ​ຈາກ​ການ​ລົງ­ມື​ເຮັດ ບໍ່​ແມ່ນ​ນັ່ງ​ວາດ​ຝັນ ປາ­ຖະ­ໜາ​ເອົາ ມາ­ລະ­ຍາດ​ອື່ນ​ກໍ​ຍັງ​ມີ​ຕາມ​ມາ ເຊັ່ນ: ບໍ່​ຄວນ​ໄປ​ຄອມ​ເມັ້ນ​ເພື່ອ​ຂາຍ​ສິນ­ຄ້າ​ໃນ​ເຟດ ຫຼື ເຟດ​ຄົນ​ອື່ນ ບໍ່​ຄວນ​ແທັກ​ຄົນ​ອື່ນ​ຂາຍ​ສິນ­ຄ້າ ຫຼື ໂຄ­ສະ­ນາ ບໍ່​ຄວນ​ກັອບ​ປີ້​ຮູບ ຫຼື ບົດ​ຄວາມ​ຂອງ​ຄົນ​ອື່ນ ຖ້າ­ວ່າ​ເຮົາ​ມັກ​ກໍ​ຄວນ​ແຊ​ຕໍ່​ເອົາ​ກໍ​ໄດ້ ເພາະ​ມັນ​ເປັນ​ການ​ເຄົາ­ລົບ ແລະ ໃຫ້​ກຽດ​ເຈົ້າ​ຂອງ​ຄວາມ​ຄິດ ຫຼິ້ນ​ເຟດ​ບຸກ​ແບບ​ມີ​ມາ­ລະ­ຍາດ​ເຂົາ​ຈະ​ເອີ້ນ​ວ່າ​ຄົນ !.

    ຂໍ​ສັງ​ລວມ​ວ່າ: ບາງ​ຄົນ​ຫຼິ້ນ​ເຟດ​ບຸກ ຫຼື ເປັນ​ເຈົ້າ​ຂອງ​ເຟດ​ພຽງ​ເພື່ອ​ຢາກ​ໄດ້​ຍອດ​ຂອງ​ການ​ກົດ​ໄລ້ ແຕ່​ບໍ່​ມີ​ອຸ­ດົມ​ການ ຫຼື ເປົ້າ​ໝາຍ​ໃຫ້​ຊີ­ວິດ​ດີ​ຂຶ້ນ ເຊິ່ງ​ຂໍ​ແຕ່​ພຽງ​ຢາກ​ດັງ ເຊິ່ງ​ບາງ​ຄົນ​ມີ​ຍອດ​ກົດ​ໄລ້​ເປັນ​ໝື່ນ​ເປັນ​ແສນ ແຕ່​ຊີ­ວິດ​ຈິງ​ໂຄດ​ເສົ້າ ກົງ­ກັນ­ຂ້າມ​ກັບ​ບາງ​ຄົນ​ບໍ່​ໂດ່ງ​ດັງ ແຕ່​ຊີ­ວິດ​ຈິງ​ພັດ​ມີ​ຄວາມ­ສຸກ ເພາະ​ເຂົາ​ຢູ່​ກັບ​ຄວາມ​ເປັນ​ຈິງ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ