ອ່າວ​ຮາ​ລອງ ຂອງ​ຫວຽດນາມ ຫ້າມ​ນຳ​ໃຊ້​ຜະລິດ​ຕະ​ພັນ​ຢາງ​ທີ່​ໃຊ້​ເທື່ອ​ດຽວ

230 19 ສ.ຫ. 2019 ຂ່າວຕ່າງປະເທດ
ອ່າວ​ຮາ​ລອງ ຂອງ​ຫວຽດນາມ ຫ້າມ​ນຳ​ໃຊ້​ຜະລິດ​ຕະ​ພັນ​ຢາງ​ທີ່​ໃຊ້​ເທື່ອ​ດຽວ

    ທ່ານ ຟ້າມ ດິ່ງ ຮວິ່ງ ຮອງ​ຫົວໜ້າ​ຜູ້​ປະຈຳການ ຂອງ​ຄະນະ​ຄຸ້ມ​ຄອງ​ອ່າວ​ຮ້າ​ລອງ (ຮາ​ລອງ ເບ) ທີ່​ຂຶ້ນ​ກັບ​ແຂວງ ກວາງ​ນິງ ຂອງ​ຫວຽດນາມ ແຈ້ງ​ໃຫ້​ຮູ້​ວ່າ ນັບ​ແຕ່​ວັນ​ທີ 1 ກັນຍາ ປີ​ນີ້​ເປັນຕົ້ນ​ໄປ ແທນ​ທີ່​ໃຫ້​ແກ່​ການ​ນຳ​ໃຊ້​ຜະລິດ​ຕະ​ພັນ​ຢາງ​ທີ່​ໃຊ້​ເທື່ອ​ດຽວ​ນັ້ນ ບັນດາ​ຫົວໜ່ວຍ​ທຸລະ​ກິດ ທີ່​ເຄື່ອນ​ໄຫວ​ຢູ່​ໃນ​ເຂດ​ອ່າວ​ຮາ​ລອງ ຈະ​ໄດ້​ໃຊ້​ຜະລິດ​ຕະ​ພັນ​ທີ່​ເຮັດ​ດ້ວຍ​ເຈ້ຍ ແກ້ວ ວັດ​ສະ​ດຸ​ຊີວະ​ພາບ​ທີ່​ເປັນ​ມິດ​ກັບ​ສິ່ງແວດລ້ອມ ແລະ ຍ່ອຍ​ສະຫຼາຍ​ໄດ້​ງ່າຍ.

    ຄະນະ​ຄຸ້ມ​ຄອງ​ອ່າວ​ຮາ​ລອງ ພວມ​ຊຸກຍູ້​ວຽກ​ງານ​ໂຄສະນາ ແລະ  ແຈ້ງ​ໃຫ້​ນັກ​ທ່ອງ​ທ່ຽວ ມີ​ຄວາມ​ຈຳກັດ​ໃນ​ການ​ໃຊ້​ຂວດ​ຢາງ ແລະ ຖົງ​ຢາງ ໃນ​ເວລາ​ທີ່​ຢ້ຽມ​ຊົມ​ອ່າວ​ດັ່ງກ່າວ. ໃນ​ຂະນະ​ດຽວ​ກັນ ບັນດາ​ຫົວໜ່ວຍ​ທຸລະ​ກິດ​ທີ່​ເຄື່ອນ​ໄຫວ​​​ຢູ່​ໃນ​ອ່າວ​ຮາ​ລອງ ກໍ​ໄດ້​ເປັນ​ເຈົ້າ​ການ​ໃນ​ການ​ຊື້​ຈອກ ແລະ ທໍ່ດູດ ເພື່ອ​ດື່ມນ້ຳ ທີ່​ເຮັດ​ດ້ວຍ​ເຈ້ຍ ພ້ອມ​ດ້ວຍ​ຖົງ​ເຈ້ຍ​ເພື່ອ​ໃສ່​ສິ່ງ​ຂອງ​ເພື່ອ​ຮັບ​ໃຊ້​ນັກ​ທ່ອງ​ທ່ຽວ. ທັນທີ​ທີ່​ໄປ​ຮອດ​ທ່າ​ກຳປັ່ນ ນັກ​ທ່ອງ​ທ່ຽວ​ຈະ​ໄດ້​ຮັບ​ການ​ແນະນຳ​ຈາກ​ພະນັກງານ​ປະຈຳ​ທ່າ​ກຳປັ່ນ ຄະນະ​ຄຸ້ມ​ຄອງ​ອ່າວ​ຮາ​ລອງ ແລະ ພະນັກງານ​ປະຈຳ​ກຳປັ່ນ ກ່ຽວ​ກັບ​ການ​ບໍ່​ນຳ​ໃຊ້​ຂວດ​ຢາງ ແລະ  ບໍ່​ນຳ​ໃຊ້​ເຄື່ອງໃຊ້​ຢາງ​ທີ່​ໃຊ້​ເທື່ອ​ດຽວ.

    ມາດ​ຕະການ​ດັ່ງກ່າວ ນັບ​ວ່າ​ເປັນ​ການ​ດຳເນີນ​ການ​ທີ່​ຕັ້ງໜ້າ ປະກອບສ່ວນ​ຫຼຸດຜ່ອນ​ຜົນ​ກະທົບ​ໃນ​ທາງ​ລົບ​ຂອງ​ຂີ້​ເຫຍື້ອ​ປະເພດ​ຢາງ ທີ່​ມີ​ຕໍ່​ພາບ​ພົດ ແລະ  ສິ່ງແວດລ້ອມ​ຂອງ​ອ່າວ​ຮາ​ລອງ ຊ່ວຍ​ໃຫ້​ສະພາບ​ແວດ​ລ້ອມ​ຂອງ​ການທ່ອງທ່ຽວ​ໄດ້​ຮັບ​ໃຊ້​ນັກ​ທ່ອງ​ທ່ຽວ​ໃຫ້​ມີ​ຄວາມ​ສະອາດ ແລະ  ມີ​ສີຂຽວ​ເພີ່ມ​ຂຶ້ນ.

    ຂ່າວ​ແຈ້ງວ່າ ຫຼັງ​ຈາກ​ວັນ​ທີ 1 ກັນຍາ​ໜ້າ​ນີ້​ແລ້ວ ຄະນະ​ຄຸ້ມ​ຄອງ​ອ່າວ​ຮາ​ລອງ ຈະ​ໄດ້​ສ້າງຕັ້ງ​ຄະນະ​ກວດກາ​ລະຫວ່າງ​ຂະແໜງການ ເພື່ອ​ຕິດຕາມ ກວດກາ ການ​ປະຕິບັດ​ກ່ຽວ​ກັບ​ການ​ງົດ​ການ​ນຳ​ໃຊ້​ຜະລິດ​ຕະ​ພັນ​ຢາງ​ທີ່​ໃຊ້​ເທື່ອ​ດຽວ ຢູ່​ໃນ​ສະຖານທີ່​ເຮັດ​ທຸລະ​ກິດ ແລະ ການ​ບໍລິການ​ແຫ່ງ​ຕ່າງໆ  ຢູ່​ໃນ​ອ່າວ​ຮາ​ລອງ.

ຂ່າວທີ່ກ່ຽວຂ້ອງ