ໃນນ້ຳມີຢາ ໃນນາມີໜີ້

2.511 19 ສ.ຫ. 2019 ນານາສາລະ

    ປົກ­ກະ­ຕິ​ພວກ​ເຮົາ​ກໍ​ຈະ​ໄດ້​ຍິນ​ວ່າ ໃນ​ນ້ຳ​ມີ​ປາ ໃນ​ນາ​ມີ​ເຂົ້າ ເຊິ່ງ​ຄວາມ​ຈິງ​ກໍ​ຍັງ​ມີ​ຢູ່ ແຕ່​ສິ່ງ​ທີ່​ມີ​ປາ­ກົດ​ເພີ່ມ​ຂຶ້ນ​ມາ​ຕື່ມ ກໍ​ຄື ໃນ​ນ້ຳ​ມີ​ສານ​ເຄ​ມີ ແລະ ໃນ​ທົ່ງ​ນາ​ຄື​ທີ່​ດິນ​ປູກ­ຝັງ​ລ້ຽງ​ຊີ­ວິດ ຫຼາຍ ຕອນ​ກໍ​ມີ​ໜີ້​ທີ່​ເກີດ​ຈາກ​ຫຼາຍ​ກໍ­ລະ­ນີ ເຊັ່ນ: ໜີ້ ເກີດ​ຈາກ​ເອົາ​ຊັບ​ສິນ​ໄປ​ຈຳ­ນຳ​ເພື່ອ​ເອົາ​ເງິນ​ມາ ລົງ­ທຶນ ຫຼື ເກີດ​ຈາກ​ການ​ເຈັບ​ໄຂ້​ເຂົ້າ​ໂຮງ­ໝໍ ບໍ່ ມີ​ເງິນ​ປິ່ນ­ປົວ ຈຶ່ງ​ຈຳ­ເປັນ​ເອົາ​ຜືນ​ດິນ​ທີ່​ມີ​ຢູ່​ໄປ​ຢືມ​ເງິນ​ເຂົາ​ມາ​ໃຊ້.

    ຜູ້​ມີ​ພື້ນ­ຖານ​ມາ​ຈາກ​ກະ­ເສດ​ບໍ່​ຄວນ​ເບິ່ງ​ຂ້າມ ຫຼື ຖື​ເບົາ​ລະ­ຫວ່າງ ນ້ຳ ແລະ ດິນ ເພາະ​ມີ​ພຽງ ຄຳ​ວ່າ ດິນ ກໍ​ຍັງ​ເປັນ​ເລື່ອງ​ໃຫຍ່​ສຳ­ຄັນ​ທີ່​ສຸດ​ໃນ​ຊີ­ວິດ​ແລ້ວ ເຊິ່ງ​ອະ­ດີດ​ຜ່ານ​ມາ​ຄົນ​ລາວ​ອາດ​ບໍ່​ມີ​ບັນ­ຫາ​ເລື່ອງ​ທີ່​ດິນ ແຕ່​ປັດ­ຈຸ­ບັນ​ນີ້​ຂ່າວ​ເລື່ອງ​ພະ­ນັກ­ງານ​ກ່ຽວ­ຂ້ອງ​ກັບ​ທີ່​ດິນ​ບໍ່​ຢາກ​ແກ້​ບັນ­ຫາ ຫຼື ອອກ​ໜັງ­ສື​ໃບ​ຕາ­ດິນ​ກໍ​ຍັງ​ຊຳ​ເຮື້ອ ແກ້​ກັນ​ບໍ່​ຕົກ ຢ່າ​ລືມ​ວ່າ​ປະ­ຊາ­ຊົນ ແລະ ສັງ­ຄົມ​ຕິດ­ຕາມ​ຢູ່   ເພາະ​ມັນ​ກ່ຽວ­ຂ້ອງ​ກັບ​ຜົນ​ປະ­ໂຫຍດ​ຂອງ​ຄົນ ສ່ວນ​ໃຫຍ່ ເລື່ອງ​ຂອງ​ດິນ ແລະ ນ້ຳ​ໃນ​ການ​ປະ­ກອບ​ອາ­ຊີບ​ສຳ­ລັບ​ຄົນ​ລາວ​ຍັງ​ຖື​ວ່າ​ເປັນ​ປັດ​ໄຈ ທີ​ໜຶ່ງ​ທີ່​ຈະ​ພົ້ນ​ຈາກ​ຄວາມ­ທຸກ​ຍາກ ແລະ ການ​ສຶກ​ສາ​ອົບ­ຮົມ​ບໍ່​ໃຫ້​ຜູ້­ກ່ຽວ​ເກີດ​ຄວາມ​ຂີ້­ຄ້ານ​ມັກ­ງ່າຍ​ກໍ​ແມ່ນ​ສິ່ງ​ບໍ່​ຄວນ​ເບິ່ງ​ຂ້າມ.

    ບັນ­ຫາ​ເລື່ອງ​ດິນ ເລື່ອງ​ອອກ​ໃບ​ຕາ­ດິນ ເລື່ອງ ຄອບ​ຄອງ ຫຼື ພັດ­ທະ­ນາ​ທີ່​ດິນ​ເຮັດ​ການ​ປູກ­ຝັງ ທັງ​ໝົດ​ນີ້​ຄື​ເລື່ອງ​ຊີ­ວິດ​ປາກ​ທ້ອງ​ຂອງ​ປະ­ຊາ­ຊົນ ຂະ­ນະ​ດຽວ​ກັນ ເລື່ອງ​ການ​ຄຸ້ມ​ຄອງ ຫຼື ຫ້າມ​ບໍ່​ໃຫ້​ນຳ​ໃຊ້​ສານ​ເຄ​ມີ ກໍ​ແມ່ນ​ນະ­ໂຍ­ບາຍ ໜຶ່ງ​ທີ່​ສຳ­ຄັນ​ສຳ­ລັບ​ຄວາມ​ປອດ​ໄພ​ດ້ານ​ສຸ­ຂະ­ພາບ​ຂອງ​ຄົນ​ໃນ​ຊາດ ຍົກ​ຕົວ­ຢ່າງ: ຖ້າ­ວ່າ​ຊາວ ກະ­ສິ­ກອນ​ນຳ​ໃຊ້​ສານ​ເຄ​ມີ​ບໍ່​ຖືກ​ວິ­ທີ ຫຼື ໃຊ້​ແບບ ບໍ່​ເໝາະ​ສົມ ອາດ​ເກີດ​ອັນ­ຕະ­ລາຍ​ຕໍ່​ສຸ­ຂະ­ພາບ ແລະ ຊີ­ວິດ​ທັງ​ຕົນ ແລະ ຄົນ​ອ້ອມ​ຂ້າງ ເຊັ່ນ: ໃຊ້​ຢາ​ຂ້າ​ຫຍ້າ ແລະ ສານ​ເຄ​ມີ​ກຳ­ຈັດ​ສັດ­ຕູ​ພືດ   ເຊິ່ງ​ກໍ່­ໃຫ້­ເກີດ​ສິ່ງ­ແວ­ດລ້ອມ​ເປັນ​ພິດ ສົ່ງ​ຜົນ​ເສຍ ຫາຍ​ຕໍ່​ຄົນ ແລະ ສັດ.

    ໃນ​ນ້ຳ​ບໍ່​ຄວນ​ມີ​ຢາ ໃນ​ນາ​ຄວນ​ປາ­ສະ­ຈາກ​ໜີ້ ເພາະ​ຖ້າ​ຜືນ​ດິນ​ມີ​ໜີ້ ຫຼື ປະ­ຊາ­ຊົນ​ຂາດ​ດິນ​ປະ ກອບ​ອາ­ຊີບ ກໍ​ຈະ​ເກີດ​ວົງ​ຈອນ​ອຸ­ບາດ ເພາະ ການ​ລະ­ເລີຍ​ໃຫ້​ນາຍ­ທຶນ​ເຮັດ​ຕາມ­ໃຈ​ກໍ​ຈະ​ເຮັດ ໃຫ້​ປະ­ຊາ­ຊົນ​ເສຍ­ປຽບ ຫຼື ວ່າ​ດິນ​ຕອນ​ດຽວ​ທີ່​ມີ​ຢູ່​ກໍ​ຍັງ​ປາ­ກົດ​ມີ​ກຳ­ມະ­ສິດ​ທັບ​ຊ້ອນ​ແບບ​ນີ້​ກໍ ໜ້າ​ຄິດ​ຢູ່​ບໍ່​ໜ້ອຍ !.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ