ຂ່າວຫຼ້າສຸດ

ເທຄວັນໂດ ຊີງຂັນທ່ານເຈົ້າຄອງ ນວ ກຽມຈັດທ້າຍເດືອນນີ້

382 19 ສ.ຫ. 2019 ວົງຈອນກີລາ
ເທຄວັນໂດ ຊີງຂັນທ່ານເຈົ້າຄອງ ນວ ກຽມຈັດທ້າຍເດືອນນີ້

    ພິ­ທີ​ຖະ­ແຫຼງ​ຂ່າວ ການ​ແຂ່ງ­ຂັນ​ເທ​ຄວັນ​ໂດ ຊີງ​ຂັນ​ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ຄັ້ງ​ທີ II ຈັດ​ຂຶ້ນ​ວັນ​ທີ 15 ສິງ­ຫາ 2019 ຢູ່​ຫ້ອງ​ປະ­ຊຸມ​ຊັ້ນ 3 ເຂດ​ເຈົ້າ​ອາ​ນຸ​ວົງ ໂດຍ​ມີ​ທ່ານ ກະ­ເສມ ອິນ​ທະ­ລາ ຮອງ​ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ລາວ ທ່ານ ຈັນ­ທະ​ວົງ ປັນ­ຍາ​ສິ­ລິ ເລ­ຂາ­ທິ­ການ ສະ­ຫະ­ພັນ​ກີ­ລາ​ເທ​ຄວັນ​ໂດ​ແຫ່ງ​ຊາດ​ລາວ ພ້ອມ​ດ້ວຍ​ຄະ­ນະ​ບໍ­ລິ­ຫານ​ສະ­ຫະ­ພັນ ຄູ​ເຝິກ ແລະ ນັກ­ກີ­ລາ ເຂົ້າ​ຮ່ວມ.

    ທ່ານ ຈັນ­ທະ​ວົງ ປັນ­ຍາ​ສິ­ລິ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້ ກໍ​ເພື່ອ​ເປັນ​ການ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ວັນ​ສຳ­ຄັນ​ຕ່າງໆ​ຂອງ​ຊາດ ໂດຍ​ສະ­ເພາະ​ວັນ​ຍຶດ​ອຳ­ນາດ 23 ສິງ­ຫາ ຄົບ­ຮອບ 44 ປີ ທັງ​ເປັນ​ການ​ພັດ­ທະ­ນາ ແລະ ຍົກ​ລະ­ດັບ​ຄວາມ​ສາ­ມາດ ໃຫ້​ແກ່​ນັກ​ກີ​ທົ່ວ​ປະ­ເທດ​ໄດ້​ມາ​ແລກ­ປ່ຽນ​ປະ­ສົບ​ການ ສ້າງ​ຄວາມ​ສາ­ມັກ­ຄີ ຄວາມ​ມີ​ນ້ຳ­ໃຈ​ນັກ­ກີ­ລາ ພ້ອມ​ທັງ​ເປັນ​ການ​ຄັດ​ເລືອກ​ເອົາ​ນັກ­ກີ­ລາ​ທີ່​ມີ​ພອນ​ສະ­ຫວັນ​ດີ­ເດັ່ນ ເພື່ອ​ສ້າງ​ເປັນ​ນັກ­ກີ­ລາ​ທີມ​ຊາດ ແລະ ຖື​ເອົາ​ການ​ແຂ່ງ­ຂັນ​ຄັ້ງ​ນີ້ ເປັນ​ການ​ຄັດ​ເລືອກ ທົດ​ສອບ​ນັກ­ກີ­ລາ​ທີມ​ຊາດ ກຽມ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ທີ່​ປະ­ເທດ​ຟິ​ລິບ​ປິນ ເປັນ​ເຈົ້າ­ພາບ ທ້າຍ​ປີ​ນີ້.

    ສຳ­ລັບ​ການ​ແຂ່ງ­ຂັນ​ຄັ້ງ​ນີ້ ຈະ​ຈັດ​ຂຶ້ນ​ໃນ​ວັນ​ທີ 24-25 ສິງ­ຫາ 2019 ຢູ່​ເດີ່ນ​ກີ­ລາ​ໃນ​ຮົ່ມ​ບູ​ຢອງ  (ເຂດ​ດົງ​ໂດກ) ເຊິ່ງ​ຈະ​ມີ​ການ​ແຂ່ງ­ຂັນ​ທັງ​ໝົດ 6 ຮຸ່ນ ຄື:ຮຸ່ນ​ອາ­ຍຸ 8 ປີ 10 ປີ 15 ປີ 17 ປີ ແລະ ຮຸ່ນ​ທົ່ວ​ໄປ ມາ​ຮອດ​ປັດ­ຈຸ­ບັນ ມີ 23 ສະ­ໂມ­ສອນ ແລະ ປະ­ເທດ​ເພື່ອ​ບ້ານ ແຈ້ງ​ເຈດ​ຈຳ­ນົງ​ເຂົ້າ​ຮ່ວມ ປະ­ມານ 400 ກວ່າ​ຄົນ.

ຂ່າວທີ່ກ່ຽວຂ້ອງ