ຂ່າວຫຼ້າສຸດ

ປັນຈັກສີລັດລາວ ຈະສົ່ງນັກກີລາ 10 ຄົນ ຮ່ວມຊີງແຊັມໂລກ

314 20 ສ.ຫ. 2019 ວົງຈອນກີລາ
ປັນຈັກສີລັດລາວ ຈະສົ່ງນັກກີລາ 10 ຄົນ ຮ່ວມຊີງແຊັມໂລກ

    ທ່ານ ຮ້ອຍ​ເອກ ທິບ​ພົງ​ພັດ ມະ​ນິ​ວົງ ເລ­ຂາ­ທິ­ການ​ສະ­ຫະ­ພັນ​ປັນ​ຈັກ​ສີ​ລັດ​ແຫ່ງ​ຊາດ​ລາວ ໃຫ້​ສຳ­ພາດ​ຕໍ່​ສື່​ມວນ​ຊົນ ໃນ​ວັນ​ທີ 16 ສິງ­ຫາ 2019 ໃຫ້​ຮູ້​ວ່າ: ພາຍ­ຫຼັງ​ທີ່​ໄດ້​ນຳ­ພາ​ທັບ​ນັກ­ກີ­ລາ​ປັນ​ຈັກ​ສີ​ລັດ​ທີມ​ນັກ­ຮຽນ​ລາວ ເຂົ້າ​ຮ່ວມ​ສ້າງ​ຜົນ­ງານ​ຄວ້າ 1 ຫຼຽນ​ເງິນ ແລະ 4 ຫຼຽນ​ທອງ ຖືກ​ຈັດ​ຢູ່​ອັນ​ດັບ​ທີ 8 ຈາກ 10 ປະ­ເທດ​ເຂົ້າ​ຮ່ວມ ໃນ​ງານ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ Xl ທີ່​ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ເມື່ອ​ເດືອນ​ກໍ­ລະ­ກົດ ຜ່ານ​ມາ ກໍ​ໄດ້​ສືບ­ຕໍ່​ນຳ­ພາ​ນັກ­ກີ­ລາ​ຮຸ່ນ​ດາວ​ຮຸ່ງ ເຂົ້າ​ຮ່ວມ​ເຝິກ­ຊ້ອມ​ຮ່ວມ​ກັບ​ນັກ­ກີ­ລາ​ທີມ​ຊາດ​ຮຸ່ນ​ອ້າຍ ທີ່​ສະ­ໂມ­ສອນ​ກີ­ລາ ປັນ​ຈັກ​ສີ​ລັດ ບ້ານ​ຮ່ອງ​ສຸ­ພາບ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ພ້ອມ​ທັງ​ເຄື່ອນ​ໄຫວ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ຕ່າງໆ ຢ່າງ​ເປັນ​ປົກ­ກະ­ຕິ ໂດຍ​ສະ­ເພາະ​ໃນ​ທ້າຍ​ເດືອນ​ກັນ­ຍາ 2019 ທີ່​ຈະ​ມາ​ເຖິງ​ນີ້ ໄດ້​ຂຶ້ນ​ແຜນ​ຫ້າງ​ຫາ​ກະ­ກຽມ​ຈະ​ສົ່ງ​ນັກ­ກີ­ລາ ຈຳ­ນວນ 7 ຄົນ ແລະ ຄະ­ນະ​ນຳ­ພາ 3 ຄົນ ເຂົ້າ​ຮ່ວມ​ການ​ແຂ່ງ­ຂັນ​ກີ­ລາ​ປັນ​ຈັກ​ສີ​ລັດ​ຊີງ​ແຊັມ​ໂລກ ທີ່​ແຂວງ​ພູ​ເກັດ ປະ­ເທດ​ໄທ ຮັບ​ກຽດ​ເຈົ້າ­ພາບ. ຫຼັງ​ຈາກ​ນັ້ນ ກໍ​ຈະ​ໄດ້​ກັບ​ມາ​ເຝິກ­ຊ້ອມ ເພື່ອ​ຫ້າງ​ຫາ​ກະ­ກຽມ​ຄັດ​ເລືອກ​ນັກ­ກີ­ລາ​ຕິດ​ທີມ​ຊາດ​ຊຸດ​ໃຫຍ່ ກຽມ​ສົ່ງ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ XXX ທີ່​ປະ­ເທດ​ຟີ​ລິບ​ປິນ ເປັນ​ເຈົ້າ­ພາບ ໃນ​ທ້າຍ​ປີ​ນີ້.

    ສຳ­ລັບ​ການ​ເຂົ້າ​ຮ່ວມ​ແຂ່ງ­ຂັນ​ກີ­ລາ​ຊີ­ເກມ ທີ່​ຟີ​ລິບ​ປິນ ສະ­ຫະ­ພັນ​ປັນ​ຈັກ​ສີ​ລັດ​ແຫ່ງ​ຊາດ​ລາວ​ກຳ­ນົດ​ຈະ​ສົ່ງ​ທັບ​ນັກ­ກີ­ລາ​ທັງ​ໝົດ 13 ຄົນ ໃນ​ນັ້ນ ຄະ­ນະ​ນຳ­ພາ ແລະ ຄູ​ເຝິກ 4 ຄົນ ສ່ວນ​ນັກ­ກີ­ລາ 9 ຄົນ ເຂົ້າ​ຮ່ວມ​ແຂ່ງ­ຂັນ​ຄົບ​ທຸກ​ລາຍ­ການ ໃນ​ນັ້ນ ປະ­ເພດ​ຕໍ່­ສູ້ ມີ 5 ລາຍ­ການ ຄື: ປະ­ເພດ​ຕໍ່­ສູ້​ຊາຍ ປະ­ກອບ​ມີ ຮຸ່ນ​ນ້ຳ­ໜັກ 50 ກິ​ໂລ ຮຸ່ນ​ນ້ຳ­ໜັກ 55 ກິ​ໂລ ແລະ ຮຸ່ນ​ນ້ຳ­ໜັກ 60 ກິ​ໂລ ສ່ວນ​ປະ­ເພດ​ຕໍ່­ສູ້​ຍິງ ມີ ຮຸ່ນ​ນ້ຳ­ໜັກ 50 ກິ​ໂລກ ແລະ ຮຸ່ນ​ນ້ຳ­ໜັກ 55 ກິ​ໂລ ຂະ­ນະ​ທີ່​ປະ­ເພດ​ຟ້ອນ​ມີ ປະ­ເພດ​ຟ້ອນ​ດ່ຽວ​ຍິງ-ຊາຍ ແລະ ປະ­ເພດ​ທີມ​ຄູ່​ຍິງ-ຊາຍ.

    ສ່ວນ​ຜົນ­ງານ​ຂອງ​ທັບ​ນັກ­ກີ­ລາ​ປັນ​ຈັກ​ສີ​ລັດ​ທີມ​ຊາດ​ລາວ ຍາດ​ໄດ້ ຄວ້າ 3 ຫຼຽນ​ທອງ ຊີ­ເກມ ຄັ້ງ​ທີ XXlX ທີ່​ປະ­ເທດ​ມາ​ເລ​ເຊຍ ເມື່ອ​ປີ 2017 ຄວ້າ 2 ຫຼຽນ​ທອງ ການ​ແຂ່ງ­ຂັນ​ຊີງ​ແຊັມ​ໂລກ ທີ່​ປະ­ເທດ​ສິງ­ກະ­ໂປ ເມື່ອ​ປີ 2018 ສ້າງ​ປະ­ຫວັດ­ສາດ​ຄວ້າ 1 ຫຼຽນ​ເງິນ ແລະ 2 ຫຼຽນ​ທອງ ງານ​ເອ​ຊຽນ​ເກມ 2018 ທີ່​ປະ­ເທດ​ອິນ​ໂດ​ເນ​ເຊຍ ແລະ ຜົນ­ງານ​ຫຼ້າ​ສຸດ​ກໍ​ສາ­ມາດ​ຍາດ​ໄດ້ 1 ຫຼຽນ​ເງິນ ແລະ 4 ຫຼຽນ​ທອງ ງານ​ກີ­ລາ​ນັກ­ຮຽນ​ອາ​ຊຽນ ທີ່​ເມືອງ​ເຊ​ບາ​ຣັງ ປະ­ເທດ​ອິນ​ໂດ​ເນ​ເຊຍ ເມື່ອ​ເດືອນ​ກໍ­ລະ­ກົດ 2019.

ຂ່າວທີ່ກ່ຽວຂ້ອງ