ເຫດການ​ຮຸນ​ແຮງ​ຢູ່​ໃນ​ອາ​ຟະ​ກາ​ນິດ​ສະຖານ

263 20 ສ.ຫ. 2019 ຂ່າວຕ່າງປະເທດ
ເຫດການ​ຮຸນ​ແຮງ​ຢູ່​ໃນ​ອາ​ຟະ​ກາ​ນິດ​ສະຖານ

    ວັນ​ທີ 18 ສິງຫາ​ນີ້ ປະທານາທິບໍດີ ອາ​ຟະ​ກາ​ນິດ​ສະຖານ ອາ​ສຣາ​​ຟ ກາ​ນີ ໄດ້​ກ່າວ​ປະນາມ​ຕໍ່​ເຫດການ​ໂຈມ​ຕີ ທີ່​ມຸ່ງ​ໃສ່​ງານ​ແຕ່ງດອງ​ລາຍ​ໜຶ່ງ ຢູ່​ໃນ​ນະຄອນຫຼວງ​ກາ​ບູນ ເມື່ອ​ຄ່ຳ​ຄືນ​ຂອງ​ວັນ​ທີ 17 ສິງຫາ ທີ່​ໄດ້​ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 63 ຄົນ ແລະ ບາດເຈັບ​ອີກ 180 ກວ່າ​ຄົນ.

    ປະທານາທິບໍດີ ກາ​ນີ ລົງ​ພິມ​ຂໍ້ຄວາມ​ຜ່ານ​ສື່​ສັງຄົມ Twitter ໂດຍ​ໄດ້​ກ່າວ​ປະນາມ​ຢ່າງ​ສຸດ​ຂີດ​ຕໍ່​ເຫດການ​ໂຈມ​ຕີ​ຢ່າງ​ປ່າ​ເຖື່ອນ ທີ່​ແນໃສ່​ງານ​ແຕ່ງດອງ​ດັ່ງກ່າວ ພ້ອມ​ກັນ​ນັ້ນ​ທ່ານ​ກໍ​ໄດ້​ສະແດງ​ຄວາມ​ເສົ້າ​ເສຍ​ໃຈ ໄປ​ຍັງ​ຄອບຄົວ​ຂອງ​ບັນດາ​ຜູ້​ເສຍ​ຊີວິດ. ໃນ​ຂະນະ​ດຽວ​ກັນ ປະທານາທິບໍດີ ກາ​ນີ ກໍ​ໄດ້​ຮຽກຮ້ອງ​ໃຫ້​ຈັດ​ປະຊຸມ​ພິເສດ​ດ້ານ​ການ​ຮັກສາ​ຄວາມ​ສະຫງົບ ເພື່ອ​ກວດກາ​ຢ່າງ​ຖີ່​ຖ້ວນ ແລະ ສະກັດ​ກັ້ນ ບໍ່​ໃຫ້​ເກີດ​ເຫດການ​ຄື​ແນວ​ນັ້ນ​ຂຶ້ນ​ມາ​ອີກ.

    ໃນ​ຖະແຫຼງການ​ທີ່​ມີ​ອອກ​ມາ​ເມື່ອ​ວັນ​ທີ 18 ສິງຫາ​ນີ້ ອົງການ​ກໍ່​ການ​ຮ້າຍ ລັດ​ອິດ​ສະ​ລາມ (IS) ໄດ້​ອ້າງ​ຄວາມ​ຮັບຜິດຊອບ ວ່າ​ເປັນ​ຝ່າຍ​ລົງມື​ກໍ່​ເຫດການ​ຮຸນ​ແຮງ​ດັ່ງກ່າວ.

ຂ່າວທີ່ກ່ຽວຂ້ອງ