ຫາງ​ສຽງ​ຮົງ​ກົງ​ບໍ່​ເຫັນ​ພ້ອມ​ກັບ​ການ​ໃຊ້​ຄວາມ​ຮຸນ​ແຮງ

532 20 ສ.ຫ. 2019 ຂ່າວຕ່າງປະເທດ
ຫາງ​ສຽງ​ຮົງ​ກົງ​ບໍ່​ເຫັນ​ພ້ອມ​ກັບ​ການ​ໃຊ້​ຄວາມ​ຮຸນ​ແຮງ

     ຂ່າວສານ​ຊິນ​ຮວາ ລາຍ​ງານ​ວ່າ ເມື່ອ​ວັນ​ທີ 17 ສິງຫາ​ນີ້ ມີ 470.000 ກວ່າ​ຄົນ ໄດ້​ເຂົ້າ​ຮ່ວມ​ງານ​ໂຮມ​ຊຸມນຸມ ແລະ ເດີນ​ຂະ​ບວນ ຢູ່​ໃນ​ສວນ​ສາທາລະນະ ທາ​ມາ (Tamar) ຢູ່​ໃນ​ເຂດ​ບໍລິຫານ​ພິເສດ​ຮົງ​ກົງ (ຈີນ) ເພື່ອ​ຄັດຄ້ານ​ຕໍ່​ການ​ໃຊ້​ຄວາມ​ຮຸນ​ແຮງ ແລະ ຮຽກຮ້ອງ​ໃຫ້​ສ້າງ​ສັນຕິພາບ ແລະ ຄວາມ​ໝັ້ນຄົງ​ຢູ່​ທີ່​ນັ້ນ.

     ໃນ​ວັນ​ທີ 17 ສິງຫາ​ເຊັ່ນ​ກັນ ສື່​ມວນ​ຊົນ​ສຳຄັນ​ຕ່າງໆ ແລະ  ບຸກຄົນ​ວົງ​ການ​ຕ່າງໆ​ໃນ​ຮົງ​ກົງ ໄດ້​ພາກັນ​ອອກສຽງ ສະແດງ​ຄວາມ​ເຫັນ​ທີ່​ຕ້ານ​ຄວາມ​ຮຸນ​ແຮງ ປົກ​ປັກ​ຮັກສາ​ການ​ປົກຄອງ​ດ້ວຍ​ກົດໝາຍ  ແລະ  ສະແຫວງຫາ​ຄວາມ​ສະຫງົບ ພ້ອມ​ທັງ​ຮຽກຮ້ອງ​ໃຫ້​ວົງ​ການ​ຕ່າງໆ​ໃນ​ສັງຄົມ​ຢຸດຕິ​ການ​ໃຊ້​ກຳລັງ​ຮຸນ​ແຮງ ປົກ​ປັກ​ຮັກສາ ນະໂຍບາຍ “ປະເທດ​ດຽວ​ສອງ​ລະບອບ” ເພື່ອ​ເຮັດ​ໃຫ້​ຮົງ​ກົງ ຟື້ນ​ຟູ​ການ​ພັດທະນາ​ຢ່າງ​ເປັນ​ປົກກະຕິ​ໂດຍ​ໄວ.

    ໜັງສືພິມ ເວີນ​ໄວ ໃນ​ຮົງ​ກົງ ໄດ້​ພິມ​ບົດ​ຄວາມ​ໂດຍ​ຂຽນ​ວ່າ ການ​ໃຊ້​ກຳລັງ​ຮຸນ​ແຮງ​ຜິດ​ກົດໝາຍ​ນັບ​ມື້​ນັບ​ຮ້າຍ​ແຮງ​ຂຶ້ນ ເຮັດ​ໃຫ້​ທົ່ວ​ຮົງ​ກົງ​ຖືກ​ກະທົບກະເທືອນ. ເມື່ອ​ຮັບ​ຮູ້​ເຖິງ​ຈິດໃຈ​ສຳຄັນ​ຂອງ​ລັດຖະບານ​ສູນ​ກາງ ໃນ​ການ​ປົກ​ປັກ​ຮັກສາ​ສະຖານະ​ການ​ຂອງ​ຮົງ​ກົງ​ແລ້ວ ສຽງ​ຮຽກຮ້ອງ​ທີ່ “ຕ້ານ​ກຳລັງ​ຮຸນ​ແຮງ ປົກ​ປັກ​ຮັກສາ​ການ​ປົກຄອງ​ດ້ວຍ​ກົດໝາຍ  ແລະ  ຊ່ວຍເຫຼືອ​ຮົງ​ກົງ” ຂອງ​ວົງ​ການ​ຕ່າງໆ​ຂອງ​ຮົງ​ກົງ ນັບ​ມື້​ນັບ​ແຮງ​ຂຶ້ນ. ບຸກຄົນ​ດີເດັ່ນ​ໃນ​ວົງ​ການ​ການ​ຄ້າ ບຸກຄົນ​ໃນ​ວົງ​ການ​ຕ່າງໆ ແລະ  ມວນ​ຊົນ​ທັງຫຼາຍ​ຂອງ​ຮົງ​ກົງ ໄດ້​ກ່າວ​ປະນາມ​ການ​ໃຊ້​ກຳລັງ​ຮຸນ​ແຮງ.

    ໜັງສືພິມ ການ​ຄ້າ​ຮົງ​ກົງ​ລາຍ​ວັນ ພິມ​ບົດ​ວິຈານ ຊີ້​ອອກ​ວ່າ ການ​ໃຊ້​ກຳລັງ​ຮຸນ​ແຮງ​ຜິດ​ກົດໝາຍ ແລະ  ລົບ​ກວນ​ປະຊາຊົນ​ເປັນ​ເວລາ​ດົນ​ນານ​ມາ​ນັ້ນ ໄດ້​ທຳ​ລາຍການ​ພັດທະນາ​ເສດຖະກິດ ແລະ  ກະທົບກະເທືອນ​ຊີວິດ​ການ​ເປັນ​ຢູ່​ຂອງ​ປະຊາຊົນ​ຮົງ​ກົງ​ຢ່າງ​ໜັກໜ່ວງ. ການ​ຢຸດ​ການ​ຮຽນ​ການ​ສອນ​ໂດຍ “ບໍ່​ມີ​ເວລາ​ຈຳກັດ” ຕາມ​ແຜນ ແລະ  ການ​ກະ​ທຳຮ້າຍ​ແຮງ​ທີ່​ທຳລາຍ​ຜົນ​ປະໂຫຍດ​ຮົງ​ກົງ ຄວນ​ຢຸດ​ເຊົາ​ໃນ​ທັນທີ. ການ​ຢຸດ ໃຊ້​ກຳລັງ​ຮຸນ​ແຮງ ກັບ​ຄືນ​ສູ່​ການ​ປົກຄອງ​ດ້ວຍ​ກົດໝາຍ ເປັນ​ບາດກ້າວ​ຈຳເປັນ​ສຳລັບ​ຮົງ​ກົງ ໃນ​ການ​ຟື້ນ​ຟູ​ຄວາມ​ເປັນ​ປົກກະຕິ ທັງ​ເປັນ​ເງື່ອນໄຂ​ທີ່​ຮັບປະກັນ​ໃຫ້​ຮົງ​ກົງ​ຈະເລີນ​ຮຸ່ງເຮືອງ ແລະ  ຄວາມ​ໝັ້ນຄົງ​ຂອງ​ຮົງ​ກົງ​ໃນ​ອະນາຄົດ.

ຂ່າວທີ່ກ່ຽວຂ້ອງ