ກອງທັບ ສ ອາ​ເມຣິກາ ຕ້ອງ​ໄດ້​ງົດ​ການ​ເຄື່ອນ​ໄຫວ​ການບິນ​ຢູ່​ໃນ​ອີຣັກ

530 20 ສ.ຫ. 2019 ຂ່າວຕ່າງປະເທດ
ກອງທັບ ສ ອາ​ເມຣິກາ ຕ້ອງ​ໄດ້​ງົດ​ການ​ເຄື່ອນ​ໄຫວ​ການບິນ​ຢູ່​ໃນ​ອີຣັກ

    PressTV ລາຍ​ງານ​ວ່າ ກອງທັບ ສ ອາ​ເມ​ຣິ​ກາ ຕ້ອງ​ໄດ້​ປະຕິບັດ​ຕາມ​ການ​ສະເໜີ​ຂອງ​ທາງ​ການ​ອີ​ຣັກ ກ່ຽວ​ກັບ​ການ​ງົດ​ການເຄື່ອນໄຫວ​ຂອງ​ບັນດາ​ເຮືອບິນ ເອ​ລີ​ກອບ​ແຕ ແລະ ອຸປະກອນ​ການບິນ​ແບບ​ບໍ່​ມີ​ຄົນ​ຂັບ ຜ່ານ​ເຂດ​ທ້ອງຟ້າ​ຂອງ​ອີ​ຣັກ ຫຼັງ​ຈາກ​ທີ່​ນາຍົກລັດຖະມົນຕີ​ອີ​ຣັກ ອັບ​ເດລ ອັບ​ດູນ ມາ​ດີ ມີ​ຄຳ​ແຈ້ງ​ເຕືອນ​ອອກ​ມາ​ວ່າ ບັນດາ​ເຮືອບິນ​ທີ່​ລະເມີດ ອາດ​ຈະ​ກາຍເປັນ​ເປົ້າ​ໝາຍ​ຂອງ​ລະບົບ​ປ້ອງ​ກັນ​ອາກາດ​ຂອງ​ອີ​ຣັກ.

    ໃນ​ອາທິດ​ທີ່​ຜ່ານ​ມາ ເຈົ້າ​ໜ້າທີ່​ບັນຊາ​ການ​ລະດັບ​ສູງ​ຂອງ ສ ອາ​ເມ​ຣິ​ກາ ໄດ້​ປະຊຸມ​ຮ່ວມ​ກັບ​ລັດຖະມົນຕີ​ປ້ອງ​ກັນ​ປະເທດ ຂອງ​ປະເທດ​ເຈົ້າ​ບ້ານ (ອີ​ຣັກ) ເພື່ອ​ປຶກສາ​ຫາລື​ກ່ຽວ​ກັບ​ການ​ສະເໜີ​ແນະ​ເມື່ອ​ບໍ່​ດົນ​ມາ​ນີ້ ຂອງ​ນາຍົກລັດຖະມົນຕີ ມາ​ດີ ກ່ຽວ​ກັບ​ການ​ໃຫ້​ງົດ​ທຸກໆ​ຖ້ຽວ​ບິນ​ການ​ທະຫານ​ຜ່ານ​ເຂດ​ທ້ອງຟ້າ​ອີ​ຣັກ ຫຼັງ​ຈາກ​ເກີດ​ເຫດ​ລະເບີດ​ທີ່​ຍັງ​ບໍ່​ທັນ​ໄດ້​ຮັບ​ການ​ກຳນົດ ຢູ່​ທີ່ ແຄມ ອາ​​ລ-ຊັກ (Camp al-Saqr) ໃນ​ບໍລິເວນ​ນອກ​ນະຄອນຫຼວງ​ແບກ​ແດດ.

    ກອງ​ກຳລັງ​ປະສານ​ງານ​ການເຄື່ອນໄຫວ​ຮ່ວມ​ຂອງ ສ ອາ​ເມ​ຣິ​ກາ ມີ​ແຈ້ງ​ການ​ອອກ​ມາ​ວ່າ ກອງ​ກຳລັງ​ປະສົມ​ທີ່​ມີ ສ ອາ​ເມ​ຣິ​ກາ ເປັນ​ແກນ​ນຳ ໄດ້​ປະຕິບັດ​ທັນທີ​ຕາມ​ການ​ສະເໜີ​ແນະ​ຂອງ​ນາຍົກລັດຖະມົນຕີ​ອີ​ຣັກ.

ຂ່າວທີ່ກ່ຽວຂ້ອງ