6 ເດືອນຕົ້ນປີ 2019 ແຂວງວຽງຈັນ ສົ່ງອອກສິນຄ້າກະສິກຳໄດ້ 70 ຕື້ກີບ

609 20 ສ.ຫ. 2019 ຂ່າວໜ້າ​ໜຶ່ງ
6 ເດືອນຕົ້ນປີ 2019 ແຂວງວຽງຈັນ ສົ່ງອອກສິນຄ້າກະສິກຳໄດ້ 70 ຕື້ກີບ

    ໃນ​ໄລ­ຍະ​ຜ່ານ​ມາ ອຳ­ນາດ​ການ​ປົກ­ຄອງ​ທຸກ​ຂັ້ນ​ຂອງ​ແຂວງ​ວຽງ​ຈັນ ໄດ້​ລົງ​ຊຸກ­ຍູ້-ສົ່ງ­ເສີມ​ປະ­ຊາຊົນ​ບັນ­ດາ­ເຜົ່າ ໃນ​ການ​ຜະ­ລິດ​ເປັນ​ສິນ­ຄ້າ​ໃຫ້​ນັບ​ມື້​ນັບ​ເພີ່ມ​ຂຶ້ນ ໂດຍ​ສະ­ເພາະ​ການ​ຜະ­ລິດ​ປູກ​ເຂົ້າ​ທີ່​ເປັນ​ທ່າ­ແຮງ​ອັນ​ສຳ­ຄັນ​ຂອງ​ແຂວງ​ວຽງ​ຈັນ.

    ທ່ານ ຄຳ​ພັນ ສິດ­ທິ​ດຳ​ພາ ເຈົ້າ­ແຂວງ​ວຽງ​ຈັນ ໃຫ້​ສຳ­ພາດ​ໃນ​ວັນ​ທີ 15 ສິງ­ຫາ 2019 ວ່າ: ແຂວງ​ວຽງ​ຈັນ​ຕັ້ງ​ຢູ່​ພາກ​ກາງ ມີ​ທີ່​ຕັ້ງ​ຍຸດ​ທະ​ສາດ​ການ­ເມືອງ ເສດ­ຖະ­ກິດ ການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ເປັນ​ສູນ​ກາງ​ການ​ຄ້າ ການ​ລົງ­ທຶນ ເຊິ່ງ​ມີ​ນັກ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ​ສົນ­ໃຈ​ເຂົ້າ​ມາ​ລົງ­ທຶນ ແລະ ພັດ­ທະ­ນາ ມີ​ຊາຍ​ແດນ​ຕິດ​ກັບ​ນະ­ຄອນ­ຫຼວງ​ວຽງ​ຈັນ ຫຼວງ​ພະ​ບາງ ໄຊ​ຍະ​ບູ​ລີ ແລະ ແຂວງ​ໄຊ​ສົມ­ບູນ ນອກ​ນີ້ ຍັງ​ມີ​ຊາຍ​ແດນ​ຕິດ​ກັບ​ແຂວງ​ເລີຍ ປະ­ເທດ​ໄທ ລຽບ​ຕາມ​ແຄມ​ແມ່­ນ້ຳ​ຂອງ ຍາວ 97 ກິ­ໂລ­ແມັດ ກວມ​ເອົາ 2 ເມືອງ ມີ​ເມືອງ​ຊະ­ນະ​ຄາມ ແລະ ເມືອງ​ໝື່ນ ເຊິ່ງ​ເປັນ​ເງື່ອນ­ໄຂ ແລະ ທ່າ­ແຮງ​ສຳ­ຄັນ​ໃນ​ການ​ສົ່ງ​ອອກ​ສິນ­ຄ້າ​ຂອງ​ປະ­ຊາ­ຊົນ​ຢູ່​ໃນ 2 ເມືອງ​ດັ່ງ­ກ່າວ ເນື້ອ­ທີ່​ສ່ວນ​ໃຫຍ່​ເປັນ​ເຂດ​ພູ​ດອຍ ກວມ​ເອົາ 2/3 ຂອງ​ເນື້ອ­ທີ່​ທັງ​ໝົດ ແລະ ອີກ​ໜຶ່ງ​ສ່ວນ​ເປັນ​ເຂດ​ທົ່ງ­ພຽງ ມີ​ແມ່­ນ້ຳ​ໃຫຍ່ໆ​ຫຼາຍ​ສາຍ​ໄຫຼ​ຜ່ານ ໂດຍ​ສະ­ເພາະ​ນ້ຳ​ງຶ່ມ ນ້ຳ​ລີກ ນ້ຳ​ຊອງ ແລະ ອື່ນໆ ເຊິ່ງ​ເໝາະ​ແກ່​ການ​ປູກ­ຝັງ ເປັນ­ຕົ້ນ ແມ່ນ​ການ​ປູກ​ເຂົ້າ ລ້ຽງ­ສັດ ແລະ ຜະ­ລິດ​ສິນ­ຄ້າ​ປະ­ເພດ​ອື່ນໆ.

    ປັດ­ຈຸ­ບັນ ອຳ­ນາດ​ການ​ປົກ­ຄອງ​ທຸກ​ຂັ້ນ​ຂອງ​ແຂວງ​ວຽງ​ຈັນ ໄດ້​ສຸມ​ໃສ່​ການ​ຜະ­ລິດ​ເປັນ​ສິນ­ຄ້າ​ຂອງ​ປະ­ຊາ­ຊົນ​ໃຫ້​ນັບ​ມື້​ນັບ​ເພີ່ມ​ຂຶ້ນ ເປັນ­ຕົ້ນ ການ​ປູກ​ເຂົ້າ ມີ​ເນື້ອ­ທີ່​ນາ­ປີ 54.000 ກວ່າ​ເຮັກ­ຕາ ນາ­ແຊງ 10.000 ກວ່າ​ເຮັກ­ຕາ ນອກ​ນີ້ ຍັງ​ໄດ້​ຊຸກ­ຍູ້-ສົ່ງ­ເສີມ​ປະ­ຊາ­ຊົນ​ປູກ​ໝາກ­ເດືອຍ 12.000 ກວ່າ​ເຮັກ­ຕາ ມັນ­ຕົ້ນ 8.600 ກວ່າ​ເຮັກ­ຕາ ສາ­ລີ​ແຂງ 7.500 ກວ່າ​ເຮັກ­ຕາ ສາ­ລີ​ຫວານ 5.500 ກວ່າ​ເຮັກ­ຕາ ປີ ຜ່ານ​ມາ​ສາ­ມາດ​ສົ່ງ​ອອກ​ມູນ​ຄ່າ 18,8 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 170 ຕື້​ກີບ ສະ­ເພາະ 6 ເດືອນ​ຕົ້ນ​ປີ 2019 ສາ­ມາດ​ສົ່ງ​ອອກ 8,3 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 70 ຕື້​ກີບ ນອກ­ຈາກ​ການ​ປູກ​ພືດ​ທີ່​ເປັນ​ທ່າ­ແຮງ​ແລ້ວ ປະ­ຊາ­ຊົນ​ພາຍ​ໃນ​ບ້ານ​ຍັງ​ມີ​ຟາມ​ລ້ຽງ­ສັດ​ເຊັ່ນ: ງົວ-ຄວາຍ 6 ຟາມ ໝູ 26 ຟາມ ໄກ່​ຊີ້ນ 14 ຟາມ ໄກ່​ໄຂ່ 29 ຟາມ ເປັດ 8 ຟາມ ປາ​ກະ­ຊັງ 298 ກະ­ຊັງ ເຊິ່ງ​ສະ­ໜອງ​ໃຫ້​ພາຍ​ໃນ​ແຂວງ ແລະ ສົ່ງ​ຂາຍ​ໃຫ້​ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ