ໄຊເສດຖາ ສືບຕໍ່ສ້າງຂະບວນການຊຸກຍູ້ໃຫ້ທຸກຄົນມີສ່ວນຮ່ວມ ໃນການກຳຈັດໜອນນ້ຳຍຸງລາຍ

773 20 ສ.ຫ. 2019 ຂ່າວໜ້າ​ໜຶ່ງ

    ເມືອງ​ໄຊ​ເສດ​ຖາ ນະ­ຄອນ­ຫຼວງ​ວຽງ​ຈັນ ເປັນ​ເມືອງ​ອັນ​ດັບ 2 ຮອງ​ຈາກ​ເມືອງ​ໄຊ​ທາ­ນີ ທີ່​ພົບ​ຜູ້​ຕິດ­ເຊື້ອ​ພະ­ຍາດ​ໄຂ້­ຍຸງ​ລາຍ​ເຖິງ 1.167 ກໍ­ລະ­ນີ ເສຍ​ຊີ­ວິດ 2 ຄົນ ເພື່ອ​ຕ້ານ​ກັບ​ພະ­ຍາດ​ດັ່ງ­ກ່າວ​ຈຶ່ງ​ໄດ້​ສືບ­ຕໍ່​ສ້າງ​ຂະ​ບວນ​ການ ກຳ­ຈັດ​ໜອນ​ນ້ຳ​ຍຸງ​ລາຍ.

    ວັນ​ທີ 17 ສິງ­ຫາ 2019 ອຳ­ນາດ​ການ​ປົກ­ຄອງ​ເມືອງ​ໄຊ​ເສດ​ຖາ ຮ່ວມ​ກັບ​ຫ້ອງ­ການ​ສາ­ທາ­ລະ­ນະ​ສຸກ​ເມືອງ ໄດ້​ສືບ­ຕໍ່​ສ້າງ​ຂະ​ບວນ​ການ​ນຳ­ພາ​ປະ­ຊາ­ຊົນ​ພາຍ​ໃນ​ບ້ານ​ຂາມ​ງອຍ ກຳ­ຈັດ​ໜອນ​ນ້ຳ ແລະ ຍຸງ​ລາຍ​ເພື່ອ​ຕ້ານ​ພະ­ຍາດ​ໄຂ້­ຍຸງ​ລາຍ ນຳ­ພາ​ໂດຍ​ທ່ານ ຖະ­ໜອມ ທຳ​ທອງ ເຈົ້າ­ເມືອງ​ໄຊ​ເສດ​ຖາ  ທ່ານ ດຣ ໄຊ​ຍະ​ວົງ ດວງ​ມະ­ນີ ຮອງ​ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ​ນະ­ຄອນ­ຫຼວງ​ວຽງ​ຈັນ ທ່ານ ຄັນ­ທະ​ລາດ ພິ­ລາ​ພັນ​ເດ​ຊ ຫົວ­ໜ້າ​ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ໄຊ​ເສດ​ຖາ ພ້ອມ​ດ້ວຍ ພະ­ນັກ­ງານ ແລະ ອສບ ບ້ານ.

    ທ່ານ ຄັນ­ທະ​ລາດ ພິ­ລາ​ພັນ​ເດ​ຊ ໄດ້​ກ່າວ​ວ່າ: ຫ້ອງ­ການ​ສາ­ທາ­ລະ­ນະ​ສຸກ ໄດ້​ເອົາ­ໃຈ­ໃສ່​ສ້າງ​ຂະ​ບວນ​ການ​ທຳ­ລາຍ​ໜອນ​ນ້ຳ ແລະ ຍຸງ​ລາຍ ເພື່ອ​ຕ້ານ​ກັບ​ພະ­ຍາດ​ດັ່ງ­ກ່າວ ໂດຍ​ໄດ້​ຈັດ​ຕັ້ງ​ປະ­ຕິ­ບັດ​ໃນ 6 ຍຸດ​ທະ​ສາດ ຄື: ການ​ສ້າງ­ສັນ​ຍາ​ຕ້ານ​ພະ­ຍາດ​ໄຂ້­ຍຸງ​ລາຍ​ໂດຍ​ເນັ້ນ​ໃຫ້​ຄອບ­ຄົວ​ປະ­ຕິ­ບັດ​ຫຼັກ­ການ 5 ປ ໄດ້​ເຮັດ​ໃບ​ສັນ­ຍາ​ຄອບ­ຄົວ​ໄດ້ 45 ບ້ານ ຈຳ­ນວນ 9.233 ໃບ ກວມ 43 % ສ້າງ​ອາ­ສາ​ສະ­ໝັກ​ບ້ານ​ໄດ້ 498 ຄົນ ສະ­ເລ່ຍ​ບ້ານ​ລະ 10 ຄົນ ທັງ​ໄດ້​ເອົາ­ໃຈ­ໃສ່​ພາ­ຫະ​ນຳ​ເຊື້ອ ລົງ​ຕິດ­ຕາມ​ຄົນ​ເຈັບ​ໄຂ້­ຍຸງ​ລາຍ ແລະ ກວດ​ໜອນ​ນ້ຳ​ໄດ້ 216 ຄັ້ງ ເຮືອນ​ທີ່​ສຳ​ຫຼວດ 4.808 ຫຼັງ­ຄາ ກວມ 21 % ເຮືອນ​ທີ່​ພົບ​ໜອນ​ນ້ຳ 120 ຫຼັງ­ຄາ ພາ­ຊະ­ນະ​ທັງ​ໝົດ 13.211 ອັນ ພາ­ຊະ­ນະ​ທີ່​ພົບ ໜອນ​ນ້ຳ 163 ອັນ ພົ່ນ​ຢາ​ຂ້າ​ຍຸງ​ໂຕ​ແກ່ 37 ຄັ້ງ ກວມ 11 ບ້ານ ໄດ້​ຢາຍ​ຊາຍ​ອາ​ເບດ​ເພື່ອ​ຂ້າ​ໜອນ​ນ້ຳ​ໃນ​ພາ­ຊະ­ນະ 3.545 ກຼາມ ລະ­ດົມ​ລ້ຽງ​ປາ​ຫາງ​ນົກ​ຍຸງ ສາ​ທາ​ເມືອງ​ມີ 6 ອ່າງ ທົ່ວ​ເມືອງ​ມີ​ທະ­ນາ­ຄານ​ປາ​ຫາງ​ນົກ​ຍຸງ 48 ບ້ານ ມີ​ອ່າງ​ປາ​ຫາງ​ນົກ​ຍຸງ 2.532 ອ່າງ ເປີດ​ຂະ​ບວນ​ການ​ຕ້ານ ແລະ ສະ­ກັດ​ກັ້ນ​ພະ­ຍາດ​ໄຂ້­ຍຸງ​ລາຍ​ທຸກ​ວັນ​ເສົາ​ໄດ້ 10 ຄັ້ງ ກວມ 10 ບ້ານ ເອົາ­ໃຈ­ໃສ່​ໂຄ­ສະ­ນາ​ສຸ​ຂະ​ສຶກ​ສາ​ເຄື່ອນ​ທີ່​ຜ່ານ​ລົດ​ໄດ້ 28 ບ້ານ ໂຄ­ສະ­ນາ​ສຸ​ຂະ​ສຶກ​ສາ​ໃຫ້​ໂຮງ­ງານ 2 ແຫ່ງ ໂຮງ­ຮຽນ 5 ຄັ້ງ ຕິດ​ຕັ້ງ​ປ້າຍ​ໂຄ­ສະ­ນາ​ຕ້ານ​ພະ­ຍາດ​ໄຂ້­ຍຸງ​ລາຍ​ໄດ້  3 ບ້ານ.

ຂ່າວທີ່ກ່ຽວຂ້ອງ