ຂ່າວຫຼ້າສຸດ

ດີເຄ ຍ້ອງຍໍນັກເຕະ ຢູ-14 ທີ່ສ້າງຜົນງານ ຢູ່ ສປ ຈີນ

385 21 ສ.ຫ. 2019 ວົງຈອນກີລາ
ດີເຄ ຍ້ອງຍໍນັກເຕະ ຢູ-14 ທີ່ສ້າງຜົນງານ ຢູ່ ສປ ຈີນ

    ພິ­ທີ​ສະ­ຫຼຸບ​ຜົນ­ງານ​ຂອງ​ທັບ​ນັກ­ກີ­ລາ​ເຍົາ­ວະ​ຊົນ ສະ­ໂມ­ສອນ​ບານ­ເຕະ ດີ​ເຄ ໃນ​ຄັ້ງ​ນີ້ ໄດ້​ມີ​ຂຶ້ນ ວັນ​ທີ 18 ສິງ­ຫາ 2019 ຢູ່​ເດີ່ນ​ກີ­ລາ​ເຕະ­ບານ​ຫຍ້າ​ທຽມ ຊ້າງ ເອັຟ​ຊີ ໂດຍ​ໃຫ້​ກຽດ​ເຂົ້າ​ຮ່ວມ ແລະ ມອບ​ໃບ​ຍ້ອງ­ຍໍ​ຂອງ​ທ່ານ ວິ​ສອນ ພັນ­ທະ​ວົງ ຮອງ​ປະ­ທານ​ສະ­ໂມ­ສອນ ດີ​ເຄ ເອັຟ​ຊີ ມີ​ທ່ານ ສົມ​ປອງ ທອງ​ມະ­ນີ ຜູ້​ໃຫ້­ການ​ສະ­ໜັບ­ສະ­ໜູນ ທັງ​ເປັນ​ປະ­ທານ​ສະ­ມາ­ຄົມ​ພໍ່​ແມ່​ຜູ້​ປົກ­ຄອງ​ທີມ​ດີ​ເຄ ພ້ອມ​ດ້ວຍ​ບັນ­ດາ​ຜູ້​ໃຫ້­ການ​ສະ­ໜັບ­ສະ­ໜູນ ຄູ​ເຝິກ ແລະ ນັກ­ກີ­ລາ ຕະ­ຫຼອດ​ຮອດ​ພໍ່​ແມ່​ນັກ­ກີ­ລາ.  

    ໂອ­ກາດ​ນີ້ ທ່ານ ວິ​ສອນ ພັນ­ທະ​ວົງ ກໍ​ໄດ້​ສະ­ແດງ​ຄວາມ​ຂອບ­ໃຈ​ເປັນ​ຢ່າງ​ສູງ​ມາ​ຍັງ​ບັນ­ດາ ພາກ­ສ່ວນ​ຜູ້​ໃຫ້­ການ​ສະ­ໜັບ­ສະ­ໜູນ ເຖິງ​ຢ່າງ­ໃດ​ກໍ​ດີ ພວກ​ເຮົາ​ຂໍ​ໃຫ້​ຄຳ​ໝັ້ນ​ສັນ­ຍາ​ວ່າ​ຈະ​ພະ­ຍາ­ຍາມ​ສືບ­ຕໍ່​ສົ່ງ­ເສີມ​ນັກ­ກີ­ລາ​ຊຸດ​ນີ້ ເຂົ້າ​ຮ່ວມ​ເຄື່ອນ​ໄຫວ​ແຂ່ງ­ຂັນ​ລາຍ­ການ​ຕ່າງໆ ທີ່​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ຈັດ​ຂຶ້ນ ແລະ ຈະ​ເຂົ້າ​ຮ່ວມ​ແຂ່ງ­ຂັນ​ນອກ​ປະ­ເທດ​ໃຫ້​ຕໍ່​ເນື່ອງ ເພື່ອ​ເສີມ​ສ້າງ​ທັກ​ສະ​ໃຫ້​ເດັກ ນ້ອຍ​ໄດ້​ມີ​ການ​ພັດ­ທະ­ນາ​ຕົນ​ເອງ​ມີ​ທ່າ​ກ້າວ​ທີ່​ພົ້ນ​ເດັ່ນ ແນ­ໃສ່​ສ້າງ​ໃຫ້​ເຂົາ­ເຈົ້າ​ໄດ້​ຕິດ​ທີມ​ຊາດ ຕາມ​ຄວາມ​ມຸ້ງ​ຫວັງ​ທີ່​ເຂົາ­ເຈົ້າ​ຕັ້ງ​ໄວ້ ໂດຍ​ສະ­ເພາະ​ໃນ​ເດືອນ​ຕຸ­ລາ 2019 ນີ້ ທາງ​ເຈົ້າ­ພາບ ສປ ຈີນ ຈະ​ໄດ້​ເຊີນ​ທີມ​ພວກ​ເຮົາ​ເຂົ້າ​ຮ່ວມ​ແຂ່ງ­ຂັນ​ຕື່ມ​ອີກ ທີ່​ນະ­ຄອນ​ຊຽງ​ໄຮ ເປັນ​ເຈົ້າ­ພາບ. 

    ສຳ­ລັບ​ການ​ແຂ່ງ­ຂັນ​ເຕະ­ບານ ຮຸ່ນ​ເຍົາ­ວະ​ຊົນ​ອາ­ຍຸ​ບໍ່​ເກີນ 14 ປີ ລາຍ­ການ ນາໆຊາດ ປະ ຈຳ­ປີ 2019 ທີ່​ເມືອງ​ຣີ​ຈາວ ສປ ຈີນ ຄັ້ງ​ນີ້ ແມ່ນ​ຈັດ​ຂຶ້ນ​ລະ­ຫວ່າງ​ວັນ​ທີ 29 ກໍ­ລະ­ກົດ ຫາ 6 ສິງ­ຫາ 2019 ໂດຍ​ມີ 7 ຮຸ່ນ ຄື: ຢູ-7 ຢູ-8 ຢູ-9 ຢູ-10 ຢູ-11 ຢູ-12 ແລະ ຢູ-14 ໂດຍ​ມີ 81 ທີມ ໃນ​ນັ້ນ ປະ­ກອບ​ມີ 3 ຊາດ ຄື ດີ​ເຄ ຕາງ­ໜ້າ ສປປ ລາວ ປະ­ເທດ​ບັງ​ກາ­ລະ​ເທດ ແລະ ບັນ­ດາ​ທີມ ຂອງ​ເຈົ້າ­ພາບ ສປ ຈີນ ເຂົ້າ​ຮ່ວມ ສະ­ເພາະ​ສະ­ໂມ­ສອນ ດີ​ເຄ ເອັບ​ຊີ ສົ່ງ​ເຂົ້າ​ຮ່ວມ​ແຂ່ງ­ຂັນ​ລາຍ ການ​ດັ່ງ­ກ່າວ ພຽງ​ຮຸ່ນ​ດຽວ ຮຸ່ນ​ອາ­ຍຸ​ບໍ່​ເກີນ 14 ປີ ໂດຍ​ມີ 8 ພາກ­ສ່ວນ​ເຂົ້າ​ຮ່ວມ ແບ່ງ​ອອກ​ເປັນ 2 ກຸ່ມ ແຂ່ງ­ຂັນ​ແບບ​ໝົດ​ກັນ​ໝົດ ຄັດ​ເອົາ​ທີມ​ທີ່​ມີ​ຄະ­ແນນ​ດີ​ທີ່​ສຸດ​ເປັນ​ແຊັມ ແລະ ຮອງ​ແຊັມ ຕາມ​ລະ­ດັບ.

    ສ່ວນ​ຜົນ­ງານ​ຂອງ ດີ​ເຄ ໃນ​ຮອບ​ແບ່ງ​ກຸ່ມ ກຸ່ມ A ນັດ​ທຳ​ອິດ​ໄລ່​ຖະ​ຫຼົ່ມ ທີມ​ເສິນ​ໂຈວ A 10-0 ປະ­ຕູ ນັດ​ທີ 2 ຖະ​ຫຼົ່ມ ກວນ​ເຊິນ 17-0 ປະ­ຕູ ແລະ ນັດ​ທີ 3 ຊະ­ນະ ເຈົ້າ­ພາບ ທີມ​ຣີ​ຈາວ 6-1 ປະ­ຕູ ເກັບ​ໄຊ 3 ນັດ​ລວດ ມີ 9 ຄະ­ແນນ​ເຕັມ ເປັນ​ອັນ​ດັບ​ທີ 1 ຂອງ​ກຸ່ມ  ຜ່ານ​ເຂົ້າ​ຮອບ​ຮອງ​ຊະ­ນະ​ເລີດ ຫຼື ຮອບ 4 ທີມ ໃນ​ຮອບ​ນີ້ ດີ​ເຄ  ນັດ​ທຳ​ອິດ ຊະ­ນະ ທີມ​ສົງ​ຊິງ 9-0 ປະ­ຕູ ນັດ​ທີ 2 ຊະ­ນະ ທີມ​ເສິນ​ໂຈວ A 7-0 ປະ­ຕູ ແລະ ນັດ​ສຸດ​ທ້າຍ ຊະ­ນະ ທີມ​ເສິນ​ໂຈວ B 8-0 ປະ­ຕູ.

ຂ່າວທີ່ກ່ຽວຂ້ອງ