ຂ່າວຫຼ້າສຸດ

ປະຊາຊົນໃຫ້ຄວາມສົນໃຈ ການແກ້ໄຂບັນຫາຂໍ້ຂັດແຍ້ງກ່ຽວກັບທີ່ດິນ

817 22 ສ.ຫ. 2019 ຂ່າວໜ້າ​ໜຶ່ງ
ປະຊາຊົນໃຫ້ຄວາມສົນໃຈ ການແກ້ໄຂບັນຫາຂໍ້ຂັດແຍ້ງກ່ຽວກັບທີ່ດິນ

    ທ່ານ ອາ­ນຸ­ພາບ ຕຸ​ນາ​ລົມ ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ຊຸດ​ທີ 8 ປະ­ຈຳ​ເຂດ​ເລືອກ​ຕັ້ງ 1 ປະ­ທານ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ (ສປ ນວ) ທ່ານ ອຸ­ດອນ ໄຊ​ມຸນ­ຕີ ຮອງ​ປະ­ທານ ສປ ນວ ແລະ ທ່ານ ນາງ ຄຳ​ແຫວນ ສິງ​ບັນ­ດິດ ສສ ນວ ລົງ​ພົບ​ປະ​ປະ­ຊາ­ຊົນ​ບ້ານ​ດົງ​ປ່າ​ລານ​ທ່າ ດົງ​ປ່າ​ລານ​ທົ່ງ ເພຍ​ວັດ ເກົ້າ​ຍອດ ແລະ ໜອງ​ຈັນ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ວັນ​ທີ 20 ສິງ­ຫາ 2019 ຢູ່​ວັດ​ດົງ​ປ່າ​ລານ ໂດຍ​ມີ​ທ່ານ ສຸດ​ທະ­ນູ ຫຼວງ​ພົນ ປະ­ທານ​ກວດ­ກາ​ພັກ-ລັດ ເມືອງ​ສີ​ສັດ­ຕະ​ນາກ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສຸດ​ທະ­ນູ ຫຼວງ​ພົນ ກ່າວ​ວ່າ: ບ້ານ​ດົງ​ປ່າ​ລານ​ທ່າ ດົງ​ປ່າ​ລານ​ທົ່ງ ເພຍ​ວັດ ເກົ້າ​ຍອດ ແລະ ບ້ານ​ໜອງ​ຈັນ ປະ­ກອບ​ມີ 62 ໜ່ວຍ 917 ຄອບ­ຄົວ ພົນ­ລະ­ເມືອງ 4.633 ຄົນ ຍິງ 2.085 ຄົນ ປະ­ຊາ­ຊົນ​ສ່ວນ​ໃຫຍ່​ປະ­ກອບ​ອາ­ຊີບ​ຄ້າ­ຂາຍ ພື້ນ­ຖານ​ໂຄງ​ລ່າງ​ໄດ້​ຮັບ​ການ​ປັບ­ປຸງ ແລະ ພັດ­ທະ­ນາ​ໃຫ້​ດີ​ຂຶ້ນ​ເປັນ​ກ້າວໆ ມີ​ພື້ນ­ຖານ​ເກັບ​ລາຍ​ຮັບ 151 ພື້ນ­ຖານ ປັດ­ຈຸ­ບັນ​ເກັບ​ລາຍ​ຮັບ​ໄດ້ 152 ລ້ານ​ກີບ ເທົ່າ​ກັບ 30,6% ຂອງ​ແຜນ­ການ ທັງ 5 ບ້ານ​ໄດ້​ປະ­ກາດ​ເປັນ​ບ້ານ​ພັດ­ທະ­ນາ​ມາ​ແຕ່​ປີ 2009 ແລະ ພວມ​ສືບ­ຕໍ່​ພັດ­ທະ­ນາ​ຢ່າງ​ຕໍ່​ເນື່ອງ.

    ຈາກ​ນັ້ນ ກໍ​ໄດ້​ຮັບ​ຟັງ​ການ​ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 7 ຂອງ ສປ ນວ ຊຸດ​ທີ I ເຊິ່ງ​ດຳ­ເນີນ​ແຕ່​ວັນ​ທີ 24–26 ກໍ­ລະ­ກົດ 2019 ໄດ້​ສຸມ​ໃສ່​ພິ­ຈາ­ລະ­ນາ​ບັນ­ຫາ​ສຳ­ຄັນ​ພື້ນ­ຖານ ນວ ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ 6 ເດືອນ​ຕົ້ນ​ປີ ແລະ ແຜນ​ດັດ­ແກ້​ງົບ­ປະ­ມານ 6 ເດືອນ​ທ້າຍ​ປີ 2019 ຂອງ ນວ ການ­ເຄື່ອນ­ໄຫວ​ວຽກ​ງານ 6 ເດືອນ​ຕົ້ນ​ປີ ແລະ ແຜນ​ວຽກ​ຈຸດ​ສຸມ 6 ເດືອນ​ທ້າຍ​ປີ 2019 ຂອງ​ຄະ­ນະ​ປະ­ຈຳ ສປ ນວ ພິ­ຈາ­ລະ­ນາ ແລະ ຮັບ­ຮອງ​ເອົາ​ບົດ​ລາຍ​ງານ​ຂອງ​ອົງ­ການ​ໄອ​ຍະ​ການ​ປະ ຊາ​ຊົນ ສານ​ປະ­ຊາ­ຊົນ ແລະ ພະ​ແນກ​ຍຸ­ຕິ​ທຳ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 6 ຂອງ ສປ ນວ.

    ຜ່ານ​ການ​ເຜີຍ­ແຜ່​ຜູ້​ເຂົ້າ​ຮ່ວມ​ໄດ້​ໃຫ້​ຄວາມ​ສົນ­ໃຈ​ຫຼາຍ​ບັນ­ຫາ ເປັນ­ຕົ້ນ ການ​ແກ້​ໄຂ​ບັນ­ຫາ​ຂໍ້​ຂັດ​ແຍ່ງ​ທີ່​ດິນ​ຢູ່ ນວ ຄວາມ​ຄືບ​ໜ້າ​ຂອງ​ການ​ປະ­ຕິ­ບັດ​ໂຄງ­ການ ການ​ຊົດ​ເຊີຍ​ທີ່​ດິນ ແລະ ສິ່ງ​ປຸກ​ສ້າງ​ໃຫ້​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ ທົບ​ຈາກ​ໂຄງ­ການ​ກໍ່­ສ້າງ​ເສັ້ນ­ທາງ​ດ່ວນ ນວ ໄລ­ຍະ​ທີ 1 ນວ-ວັງ​ວຽງ ໂຄງ­ການ​ກໍ່­ສ້າງ​ເສັ້ນ­ທາງ​ດອນ​ນົກ​ຂຸ້ມ-450 ປີ ຂອງ​ບໍ­ລິ­ສັດ​ນ້ຳ​ທາ​ກໍ່­ສ້າງ​ຂົວ​ທາງ ໂຄງ­ການ​ກໍ່­ສ້າງ​ສະ­ໜາມ​ກ໋ອບ​ລ່ອງ​ແທັງ​ຂອງ​ບໍ­ລິ­ສັດ​ລົງ­ທຶນ​ວຽງ​ຈັນ ແລະ ອະ­ສັງ­ຫາ­ລິ­ມະ​ຊັບ ການ​ຄຸ້ມ​ຄອງ ແລະ ອະ­ນຸ­ຍາດ​ໃຫ້​ນັກ​ລົງ­ທຶນ​ຕ່າງ­ປະ­ເທດ ລົງ­ທຶນ​ປູກ​ກ້ວຍ​ຢູ່ ນວ ບັນ­ຫາ​ໄຟ​ເຍືອງ​ທາງ​ຕາມ​ເສັ້ນ­ທາງ​ແຕ່​ລະ​ເສັ້ນ ບັນ­ຫາ​ນ້ຳ​ເປື້ອນ​ທີ່​ໄຫຼ​ລົງ​ຮ່ອງ​ແຊງ ສົ່ງ​ກິ່ນ​ເໝັນ​ແກ່​ປະ­ຊາ­ຊົນ​ທີ່​ອາ­ໄສ​ຢູ່​ໃກ້​ຄຽງ ແລະ ບັນ­ຫາ​ອື່ນໆ ເຮັດ​ໃຫ້­ການ​ພົບ​ປະ​ຄັ້ງ​ນີ້​ມີ​ບັນ­ຍາ­ກາດ​ຄຶກ­ຄື້ນ ສ້າງ​ຄວາມ​ເຂົ້າ­ໃຈ​ເປັນ​ເອ­ກະ​ພາບ ຕ້ານ​ກັບ​ຫາງ​ສຽງ​ຂອງ​ກຸ່ມ​ຄົນ​ບໍ່​ດີ ທີ່​ຫວັງ​ທັບ​ຖົມ​ໃສ່​ຮ້າຍ​ປ້າຍ​ສີ ອຳ­ນາດ​ການ​ປົກ­ຄອງ ກໍ​ຄື ພັກ ແລະ ລັດ­ຖະ­ບານ.

ຂ່າວທີ່ກ່ຽວຂ້ອງ