ຂ່າວຫຼ້າສຸດ

ເຫດການຮຸນແຮງຢູ່ໃນບວກກີນາ ຟາໂຊ

829 22 ສ.ຫ. 2019 ຂ່າວຕ່າງປະເທດ
ເຫດການຮຸນແຮງຢູ່ໃນບວກກີນາ ຟາໂຊ

    ຈຳນວນ​ພົນທະຫານ​ທີ່​ເສຍ​ຊີວິດ ຢູ່​ໃນ​ເຫດການ​ໂຈມ​ຕີ ທີ່​ດຳເນີນ​ການ​ໂດຍ​ກຸ່ມ​ມື​ປືນ ທີ່​ບໍ່​ຮູ້​ວ່າ​ເປັນ​ຝ່າຍ​ໃດ ຊຶ່ງ​ມຸ່ງ​ໃສ່​ພື້ນຖານ​ດ້ານ​ການ​ທະຫານ​ແຫ່ງ​ໜຶ່ງ ຢູ່​ທາງ​ພາກ​ເໜືອ ບວກ​ກີ​ນາ ຟາ​ໂຊ ເມື່ອ​ວັນ​ທີ 19 ສິງຫາ​ທີ່​ຜ່ານ​ມາ ນັ້ນ​ໄດ້​ເພີ່ມ​ຂຶ້ນ​ເປັນ 24 ຄົນ ທຽບໃສ່​ຕົວ​ເລກ ທີ່​ມີ​ອອກ​ມາ​ໃນ​ເບື້ອງ​ຕົ້ນ​ທີ່ 10 ຄົນ.

    ໃນ​ຖະແຫຼງການ​ທີ່​ມີ​ອອກ​ມາ​ເມື່ອ​ວັນ​ທີ 20 ສິງຫາ​ນັ້ນ ກອງ​ເສນາ​ທິ​ການ​ຂອງ​ກອງ​ກຳລັງ ປະກອບ​ອາວຸດ ບວກ​ກີ​ນາ ຟາ​ໂຊ ໃຫ້​ຮູ້​ວ່າ ການ​ໂຈມ​ຕີ​ດັ່ງກ່າວ ຍັງ​ເຮັດ​ໃຫ້​ມີ​ຜູ້​ໄດ້​ຮັບ​ບາດເຈັບ 7 ຄົນ ແລະ ຫາຍ​ສາບ​ສູນ 5 ຄົນ. ປັດຈຸບັນ​ນີ້ ກອງທັບ​ບວກ​ກີ​ນາ ຟາ​ໂຊ ຍັງ​ສືບຕໍ່​ດຳເນີນ​ບັ້ນ​ຮົບ ເທິງ​ອາກາດ ແລະ ທາງ​ພາກ​ພື້ນ​ດິນ ເພື່ອ​ຮອງ​ຮັບ​ເຫດການ​ໂຈມ​ຕີ​ນັ້ນ.

    ກ່ອນ​ໜ້າ​ນີ້ ເຫດການ​ໂຈມ​ຕີ​ທີ່​ຖື​ວ່າ​ຮ້າຍ​ແຮງ​ທີ່​ສຸດ ທີ່​ແນໃສ່​ກອງທັບ​ຂອງ​ບວກ​ກີ​ນາ ຟາ​ໂຊ ໄດ້​ເກີດ​ຂຶ້ນ​ເມື່ອ​ເດືອນ​ທັນວາ ປີ 2016 ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 12 ຄົນ. ໃນ​ເຫດການ​ໂຈມ​ຕີ​ເທື່ອ​ນີ້ ມີ​ມື​ປືນ​ເຂົ້າ​ຮ່ວມ​ການ​ປະ​ຕິດ​ການ​ປະມານ 40 ຄົນ. ຕໍ່​ມາ ໃນ​ເດືອນ​ມີນາ ປີ 2018 ກອງທັບ ບວກ​ກີ​ນາ ຟາ​ໂຊ ກໍ​ຖືກ​ໂຈມ​ຕີ ໂດຍ​ແນໃສ່​ກອງ​ເສນາ​ທິ​ການ​ຢູ່​ໃນ​ນະຄອນ ກົວ​ກາ​ດູ​ກູ ສົ່ງ​ຜົນ​ໃຫ້​ທະຫານ​ເສຍ​ຊີວິດ 8 ຄົນ.

ຂ່າວທີ່ກ່ຽວຂ້ອງ