ຂ່າວຫຼ້າສຸດ

ສ ອາເມຣິກາ ທົດລອງລູກສອນໄຟເຄື່ອນທີ່ຂະໜາດກາງ

823 22 ສ.ຫ. 2019 ຂ່າວຕ່າງປະເທດ
ສ ອາເມຣິກາ ທົດລອງລູກສອນໄຟເຄື່ອນທີ່ຂະໜາດກາງ

   ທຳ​ນຽບ​ຫ້າ​ແຈ (ກະຊວງ​ປ້ອງ​ກັນ​ປະເທດ ສ ອາ​ເມ​ຣິ​ກາ) ແຈ້ງ​ໃຫ້​ຮູ້ເມື່ອ​ວັນ​ທີ 19 ສິງຫາ​ນີ້​ວ່າ ໄດ້​ທົດ​ລອງ​ລູກ​ສອນ​ໄຟ​ເຄື່ອນ​ທີ່​ໜ່ວຍ​ໜຶ່ງ ທີ່​ຍິງ​ຂຶ້ນ​ຈາກ​ໜ້າດິນ ແລະ ລູກ​ສອນ​ໄຟ​ນັ້ນ ໄດ້​ຍິງ​ຖືກ​ເປົ້າ​ທີ່ຢູ່​ຫ່າງ​ໄກ​ໄປ​ກວ່າ 500​ກມ. ນີ້​ເປັນ​ການ​ທົດ​ລອງ​ລູກ​ສອນ​ໄຟ​ຂະໜາດ​ກາງ​ເປັນ​ເທື່ອ ທຳ​ອິດ​ນັບ​ແຕ່​ເວລາ​ທີ່ ສ ອາ​ເມ​ຣິ​ກາ ຖອນ​ຕົວ​ອອກ​ຈາກ​ສົນທິສັນຍາ ວ່າ​ດ້ວຍ​ບັນດາ​ກອງ​ກຳລັງ ນີວ​ເຄລຍ​ຂະໜາດ​ກາງ (INF) ເມື່ອ​ຕົ້ນ​ເດືອນ​ສິງຫາ​ນີ້.

    ຖະແຫຼງການ​ຂອງ​ທຳ​ນຽບ​ຫ້າ​ແຈ ໃຫ້​ຮູ້​ວ່າການ​ທົດ​ລອງ​ລູກ​ສອນ​ໄຟ​ດັ່ງກ່າວ ມີ​ຂຶ້ນ​ເມື່ອ​ວັນ​ທີ 18 ສິງຫາ​ທີ່​ຜ່ານ​ມາ ທີ່​ເກາະ ຊານ ນີ​ໂກ​ລາ​​ສ ທີ່​ຂຶ້ນ​ກັບ​ລັດ​ຄາ​ລີ​ຟໍ​ເນຍ. ລູກ​ສອນ​ໄຟ​ທີ່​ທົດ​ລອງ​ນັ້ນ ເປັນ​ລຸ້ນ​ໜຶ່ງ​ຂອງ​ລູກ​ສອນ​ໄຟ​ເຄື່ອນ​ທີ່ ໂທ​ມາ​ຮອກ (Tomahawk) ຊຶ່ງ​ສາມາດ​ຕິດ​ຫົວ​ກະ​ສູນ ນີວ​ເຄລຍ.

    ກ່ອນ​ໜ້າ​ນີ້ ລູກ​ສອນ​ໄຟ ໂທ​ມາ​ຮອກ ທີ່​ຍິງ​ຂຶ້ນ​ຈາກ​ໜ້າດິນ ໄດ້​ນຳ​ອອກ​ໄປ​ຈາກ​ການ ປະຈຳການ ຫຼັງ​ຈາກ​ທີ່ INF ໄດ້​ຮັບ​ການ​ຮັບຮອງ. INF ໄດ້​ຮັບ​ການ​ລົງ​ນາມ​ໂດຍ ສ ອາ​ເມ​ຣິ​ກາ ແລະ  ສ ໂຊ​ວຽດ (ໃນ​ເມື່ອ​ກ່ອນ) ເມື່ອ​ວັນ​ທີ 8 ທັນວາ ປີ 1987 ແລະ ໄດ້​ມີ​ຜົນ​ບັງຄັບ​ໃຊ້ ຢ່າງ​ເປັນ​ທາງ​ການ ນັບ​ແຕ່​ວັນ​ທີ 1 ມິຖຸນາ ປີ 1988 ເປັນຕົ້ນ​ມາ. ຕາມ​ນັ້ນແລ້ວ ສອງ​ຝ່າຍ ໃຫ້​ສັນຍາ ວ່າ​ຈະ​ບໍ່​ຜະລິດ ບໍ່​ທົດ​ລອງ ບໍ່​ຜັນ​ຂະຫຍາຍ​ລູກ​ສອນ​ໄຟ​ນຳ​ວິຖີ ແລະ ລູກ​ສອນ​ໄຟ ເຄື່ອນ​ທີ່​ເທິງ​ໜ້າດິນ ຂະໜາດ​ກາງ ແລະ ຂະໜາດ​ໃກ້ (ແຕ່ 500-5.500​ກມ). ເມື່ອ​ວັນ​ທີ 2 ສິງຫາ​ປີ​ນີ້ ສ ອາ​ເມ​ຣິ​ກາ ໄດ້​ຖອນ​ອອກ​ຈາກ INF ຢ່າງ​ເປັນ​ທາງ​ການ ນຳໄປ​ສູ່​ການ​ທີ່​ຣັດ​ເຊຍ ກໍ​ງົດ​ສົນທິສັນຍາ​ນີ້. 

ຂ່າວທີ່ກ່ຽວຂ້ອງ