ຂ່າວຫຼ້າສຸດ

ເລັ່ງໃຫ້ການຊ່ວຍເຫຼືອແຮງງານລາວເກີດອຸບັດເຫດຢູ່ໄທ

924 23 ສ.ຫ. 2019 ຂ່າວໜ້າ​ໜຶ່ງ

    ປັດ­ຈຸ­ບັນ​ສະ­ຖານ­ທູດ ສປປ ລາວ ປະ­ຈຳ​ລາ­ຊະ​ອາ­ນາ­ຈັກ​ໄທ ພວມ​ເລັ່ງ​ດຳ­ເນີນ​ການ​ຢ່າງ​ຕໍ່​ເນື່ອງ ເພື່ອ​ໃຫ້­ການ​ຊ່ວຍ­ເຫຼືອ​ແຮງ​ງານ​ລາວ ທີ່​ປະ­ສົບ​ເຄາະ​ຮ້າຍ​ຈາກ​ອຸ­ບັດ­ເຫດ​ຕຳ​ກັບ​ລົດ​ພວງ ຢູ່​ແຂວງ​ສະ​ແກ້ວ ໃນ​ວັນ​ທີ 18 ສິງ­ຫາ ຜ່ານ​ມາ ເຊິ່ງ​ມີ​ຜູ້​ເສຍ​ຊີ­ວິດ 11 ຄົນ ໃນ​ນີ້ ເປັນ​ແຮງ​ງານ​ລາວ​ທີ່​ພວມ​ຈະ​ເດີນ­ທາງ​ໄປ​ຂໍ​ວິ­ຊາ​ເສຍ​ຊີ­ວິດ 10 ຄົນ ຍິງ 6 ຄົນ ແລະ ບາດ­ເຈັບ 3 ຄົນ.

    ທ່ານ ພົງ​ໄຊ​ສັກ ອິນ​ຖາ​ລາດ ຫົວ­ໜ້າ​ກົມ​ຄຸ້ມ​ຄອງ​ແຮງ​ງານ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໃຫ້​ສຳ­ພາດ​ໃນ​ວັນ​ທີ 21 ສິງ­ຫາ 2019 ວ່າ: ປັດ­ຈຸ­ບັນ​ສົບ​ຜູ້​ເສຍ​ຊີ­ວິດ​ໄດ້​ຖື​ນຳ​ສົ່ງ​ໄປ​ສັນ​ນະ​ສູດ​ຢູ່​ສະ​ຖາ​ບັນ​ນິ­ຕິ​ເວດ ໂຮງ­ໝໍ​ຕຳ­ຫຼວດ ຢູ່​ນະ­ຄອນ­ຫຼວງ​ບາງ­ກອກ ສ່ວນ​ຜູ້​ໄດ້​ຮັບ​ບາດ­ເຈັບ​ໄດ້​ປິ່ນ­ປົວ​ຢູ່​ໂຮງ­ໝໍ​ແຂວງ​ສະ​ແກ້ວ ຫຼ້າ​ສຸດ​ສະ­ຖານ­ທູດ ສປປ ລາວ ລາວ ປະ­ຈຳ ນະ­ຄອນ­ຫຼວງ​ບາງ­ກອກ ພວມ​ປະ­ສານ​ສົມ­ທົບ​ກະ­ຊວງ​ການ​ຕ່າງ­ປະ­ເທດ ແລະ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ເພື່ອ​ເລັ່ງ​ຕິດ­ຕໍ່​ຫາ​ຍາດ​ພີ່­ນ້ອງ​ຂອງ​ຜູ້​ເສຍ​ຊີ­ວິດ ໃນ​ນີ້ ຢູ່​ນະ­ຄອນ­ຫຼວງ​ວຽງ​ຈັນ ສະ­ຫວັນ​ນະ​ເຂດ ຈຳ­ປາ​ສັກ ແລະ ສາ­ລະ​ວັນ.

    ຜູ້​ເສຍ​ຊີ­ວິດ​ຈາກ​ອຸ­ບັດ­ເຫດ​ຄັ້ງ​ນີ້ ເບື້ອງ​ຕົ້ນ​ບໍ­ລິ­ສັດ​ລົດ​ຕູ້​ຈະ​ໃຫ້­ການ​ຊ່ວຍ­ເຫຼືອ​ເພື່ອ​ຈັດ​ພິ­ທີ​ຊາ​ປະ​ນະ​ກິດ​ສົບ 100.000 ບາດ ຫຼື ປະ­ມານ 29 ລ້ານ​ກີບ ສ່ວນ​ການ​ຊ່ວຍ­ເຫຼືອ​ດ້ານ​ອື່ນໆ ພາກ­ສ່ວນ​ກ່ຽວ ຂ້ອງ​ຈະ​ໄດ້​ດຳ­ເນີນ​ການ​ຕາມ​ຂັ້ນ​ຕອນ ແລະ ລະ­ບຽບ​ກົດ­ໝາຍ​ຂອງ​ປະ­ເທດ​ໄທ ໃນ​ຂັ້ນ​ຕໍ່​ໄປ.

ຂ່າວທີ່ກ່ຽວຂ້ອງ