ຂ່າວຫຼ້າສຸດ

ສ ເກົາຫຼີ ສະໜັບສະໜູນການປັບປຸງ ການບໍລິການສຸຂະພາບຢູ່ພາກເໜືອລາວ

933 23 ສ.ຫ. 2019 ຂ່າວໜ້າ​ໜຶ່ງ
ສ ເກົາຫຼີ ສະໜັບສະໜູນການປັບປຸງ ການບໍລິການສຸຂະພາບຢູ່ພາກເໜືອລາວ

    ພິ­ທີ​ລົງ​ນາມ​ບົດ​ບັນ­ທຶກ​ການ​ປຶກ­ສາ​ຫາ­ລື​ໂຄງ­ການ​ປັບ­ປຸງ​ຄຸນ​ນະ​ພາບ ແລະ ການ​ເຂົ້າ​ເຖິງ​ການ​ບໍ­ລິ­ການ​ສຸ­ຂະ­ພາບ​ຈະ­ເລີນ​ພັນ​ແມ່ ແລະ ເດັກ-ເດັກ​ເກີດ​ໃໝ່​ແບບ​ຊຸມ​ຊົນ​ມີ​ສ່ວນ​ຮ່ວມ​ໃນ​ແຂວງ​ພາກ​ເໜືອ​ຂອງ​ລາວ ຈັດ​ຂຶ້ນ​ວັນ​ທີ 20 ສິງ­ຫາ 2019 ຢູ່​ກະ­ຊວງ​ສາ­ທາ­ລະ­ນະ​ສຸກ ລະ­ຫວ່າງ​ທ່ານ ບຸນ​ເພັງ ພິ­ລາ​ວົງ ຫົວ­ໜ້າ​ກົມ​ອະ­ນາ­ໄມ ແລະ ສົ່ງ­ເສີມ​ສຸ­ຂະ­ພາບ ກະ­ຊວງ​ສາ­ທາ­ລະ­ນະ​ສຸກ ແລະ ທ່ານ ຊິນ​ຊູນ​ໂອະ ຜູ້­ຕາງ­ໜ້າ​ອົງ­ການ​ຮ່ວມ​ມື​ສາ­ກົນ ສ ເກົາ­ຫຼີ (KOICA) ປະ­ຈຳ​ລາວ ໂດຍ​ມີ​ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ທ່ານ ຊິນ​ຊອງ​ຊຸນ ເອກ​ອັກ​ຄະ​ລັດ​ຖະ​ທູດ ສ ເກົາ­ຫຼີ ປະ­ຈຳ ສປປ ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ປັບ­ປຸງ​ສະ­ຖາ­ນະ​ພາບ ສຸ­ຂະ­ພາບ​ໄວ​ຈະ­ເລີນ​ພັນ ຫຼຸດ​ອັດ­ຕາ​ການ​ຕາຍ ເຈັບ­ເປັນ ການ​ຂາດ​ສານ​ອາ­ຫານ​ຂອງ​ແມ່ ແລະ ເດັກ-ເດັກ​ເກີດ​ໃໝ່​ດ້ວຍ​ການ​ເຝິກ­ອົບ­ຮົມ​ວິ­ຊາ​ສະ­ເພາະ (ແພດ​ຜະ­ດຸງ­ຄັນ ການ​ປິ່ນ ປົວ​ສຸກ​ເສີນ​ເດັກ​ເຈັບ ວິ­ທີ​ການ​ໃຫ້​ຄວາມ​ຮູ້​ແກ່​ຜູ້​ປົກ­ຄອງ ການ​ເຝົ້າ​ລະ­ວັງ ແລະ ຕອບ​ໂຕ້​ກໍ­ລະ­ນີ​ແມ່​ເສຍ​ຊີ­ວິດ ກວດ​ທ້ອງ​ກ່ອນ ແລະ ຫຼັງ​ເກີດ ສັກ​ຢາ​ວັກ​ແຊັງ ວາງ​ແຜນ​ຄອບ­ຄົວ ຕິດ­ຕາມ​ການ​ຈະ­ເລີນ​ເຕີບ​ໂຕ​ຂອງ​ເດັກ​ລຸ່ມ 5 ປີ) ຈັດ​ສົ່ງ​ພະ­ນັກ­ງານ​ແພດ​ໝໍ ໄປ​ທັດ­ສະ­ນະ​ສຶກ​ສາ​ຢູ່ ສ ເກົາ­ຫຼີ ກໍ່­ສ້າງ​ສູນ​ປຶກ­ສາ​ດ້ານ​ໂພ­ຊະ​ນາ​ການ​ຢູ່​ແຂວງ​ຫຼວງ​ນ້ຳ​ທາ ສະ­ໜອງ​ອຸ­ປະ­ກອນ​ການ​ແພດ​ພື້ນ­ຖານ ແລະ ອື່ນໆ.

    ໂຄງ­ການ​ດັ່ງ­ກ່າວ ຈະ​ຈັດ​ຕັ້ງ​ປະ­ຕິ­ບັດ​ຢູ່​ແຂວງ​ຫຼວງ​ນ້ຳ​ທາ ອຸ­ດົມ​ໄຊ ແລະ ຫຼວງ​ພະ​ບາງ ໄລ­ຍະ​ເວ­ລາ 5 ປີ (2019-2023) ມູນ​ຄ່າ 65,24 ຕື້​ກວ່າ​ກີບ ຫຼື 7.500.000 ໂດ​ລາ​ສະ­ຫະ­ລັດ ເພື່ອ​ເຮັດ​ໃຫ້​ສຸ­ຂະ­ພາບ​ແມ່ ແລະ ເດັກ-ເດັກ​ເກີດ​ໃໝ່ ໄວ​ໜຸ່ມ ໄວ​ຈະ­ເລີນ​ພັນ​ໄດ້​ຮັບ​ການ​ປັບ­ປຸງ​ການ​ເຂົ້າ​ເຖິງ ການ​ບໍ­ລິ­ການ​ດ້ານ​ສຸ­ຂະ­ພາບ​ໃຫ້​ທົ່ວ​ເຖິງ.

ຂ່າວທີ່ກ່ຽວຂ້ອງ