ຂ່າວຫຼ້າສຸດ

ທຸກພາກສ່ວນທີ່ກ່ຽວຂ້ອງ ສືບຕໍ່ຊອກຄົ້ນຫາສາເຫດຕາມຜົນຕົວຈິງ

923 23 ສ.ຫ. 2019 ຂ່າວໜ້າ​ໜຶ່ງ
ທຸກພາກສ່ວນທີ່ກ່ຽວຂ້ອງ ສືບຕໍ່ຊອກຄົ້ນຫາສາເຫດຕາມຜົນຕົວຈິງ

    ເວ­ລາ​ປະ­ມານ 15 ໂມງ 20 ນາ­ທີ​ຂອງ​ວັນ​ທີ 19 ສິງ­ຫາ​ຜ່ານ​ມາ ໄດ້​ເກີດ​ເຫດ​ລົດ​ໂດຍ­ສານ ໝາຍ​ເລກ​ທະ­ບຽນ ບຂ 8839 ກຳ­ແພງ​ນະ­ຄອນ​ວຽງ​ຈັນ ເສຍ​ຫຼັກ​ຕົກ​ຂົວ​ນ້ຳ​ງ້າວ ເມືອງ​ນານ ແຂວງ​ຫຼວງ​ພະ​ບາງ ເຊິ່ງ​ລົດ​ດັ່ງ­ກ່າວ​ເດີນ­ທາງ​ຈາກ​ໂຮງ­ແຮມ​ແດນ​ສະ­ຫວັນ ແຂວງ​ວຽງ​ຈັນ ໄປ​ແຂວງ​ຫຼວງ​ພະ​ບາງ ໂດຍ​ຜ່ານ​ເສັ້ນ­ທາງ​ກາ­ສີ-ເມືອງ​ນານ ບັນ­ທຸກ​ຜູ້­ໂດຍ­ສານ 45 ຄົນ ຄົນ​ຂັບ 1 ຄົນ ລວມ 46 ຄົນ ຍິງ 24 ຄົນ ໃນ​ນີ້ ເປັນ​ນັກ​ທ່ອງ​ທ່ຽວ​ສັນ­ຊາດ​ຈີນ 44 ຄົນ ຍິງ 23 ຄົນ ສ່ວນ​ອີກ 2 ຄົນ​ແມ່ນ​ສັນ­ຊາດ​ລາວ ຍິງ 1 ຄົນ ( ພະ­ນັກ­ງານ​ຂັບ​ລົດ ແລະ ພະ­ນັກ­ງານ​ນຳ​ທ່ຽວ).

    ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ໄດ້​ຕາງ­ໜ້າ​ໃຫ້​ລັດ­ຖະ­ບານ ສປປ ລາວ ຖະ­ແຫຼງ​ຂ່າວ​ເຫດ­ການ​ດັ່ງ­ກ່າວ ວັນ​ທີ 22 ສິງ­ຫາ 2019 ໂດຍ​ທ່ານ ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ ຖວ​ທ ວ່າ: ນັບ​ແຕ່​ເຫດ­ການ​ເກີດ​ຂຶ້ນ​ເຖິງ​ປັດ­ຈຸ­ບັນ ລັດ­ຖະ­ບານ​ລາວ ໄດ້​ຊີ້​ນຳ​ຢ່າງ​ໃກ້­ຊິດ​ໃຫ້​ອຳ­ນາດ​ການ​ປົກ­ຄອງ​ທ້ອງ­ຖິ່ນ ກໍ​ຄື ກຳ­ລັງ​ທະ­ຫານ ຕຳ­ຫຼວດ ຊາວ​ໜຸ່ມ ປະ­ຊາ­ຊົນ​ທີ່​ອາ­ໄສ​ຢູ່​ໃກ້​ຄຽງ​ກັບ​ຈຸດ​ເກີດ​ເຫດ ແລະ ໜ່ວຍ​ກູ້​ໄພ ສຸມ​ໃສ່​ໃຫ້­ການ​ຊ່ວຍ­ເຫຼືອ​ຢ່າງ​ຮີບ​ດ່ວນ ໂດຍ​ໄດ້​ພົບ​ຜູ້​ເສຍ​ຊີ­ວິດ 13 ຄົນ ຍິງ 8 ຄົນ ບາດ­ເຈັບ 33 ຄົນ ໂດຍ​ໄດ້​ສົ່ງ​ໄປ​ປິ່ນ­ປົວ​ຢູ່​ໂຮງ­ໝໍ​ລາວ-ຈີນ ຫຼວງ​ພະ​ບາງ ແລະ ໂຮງ­ໝໍ​ແຂວງ​ຫຼວງ​ພະ​ບາງ ໂດຍ​ດ່ວນ ພ້ອມ​ນີ້ ກະ­ຊວງ ຖວ​ທ ຍັງ​ໄດ້​ແຕ່ງ­ຕັ້ງ​ທ່ານ​ຮອງ​ລັດ­ຖະ­ມົນ­ຕີ ຮັບ­ຜິດ­ຊອບ​ວຽກ​ງານ​ທ່ອງ​ທ່ຽວ​ເດີນ­ທາງ​ໄປ​ຈຸດ​ເກີດ​ເຫດ ເພື່ອ​ສົມ­ທົບ​ກັບ​ອຳ­ນາດ​ການ​ປົກ­ຄອງ​ທ້ອງ­ຖິ່ນ ເປັນ­ຕົ້ນ ພະ​ແນກ ຖວ​ທ ແຂວງ​ຫຼວງ​ພະ​ບາງ ສະ­ຖານ­ທູດ​ຈີນ ປະ­ຈຳ​ລາວ  ກໍ​ຄື ກົງ​ສູນ​ໃຫຍ່ ສປ ຈີນ ປະ­ຈຳ​ແຂວງ​ຫຼວງ​ພະ​ບາງ ເພື່ອ​ຮ່ວມ​ກັນ​ແກ້​ໄຂ​ສະ­ພາບ​ການ​ຢ່າງ​ຮີບ​ດ່ວນ ພ້ອມ​ທັງ​ລົງ​ຢ້ຽມ­ຢາມ​ຜູ້​ບາດ­ເຈັບ​ຢູ່​ໂຮງ­ໝໍ​ແຂວງ ແລະ ໄປ​ກວດ­ກາ​ຈຸດ​ເກີດ​ເຫດ ນອກ​ນີ້ ພະ​ແນກ ຖວ​ທ ແຂວງ​ຫຼວງ​ພະ​ບາງ ຍັງ​ໄດ້​ແຕ່ງ­ຕັ້ງ​ພະ­ນັກ­ງານ​ນຳ​ທ່ຽວ​ຜູ້​ທີ່​ຮູ້​ພາ­ສາ​ຈີນ 15 ຄົນ ໄປ​ຊ່ວຍ​ອຳ­ນວຍ​ຄວາມ​ສະ­ດວກ​ແປ​ພາ­ສາ​ໃຫ້​ຄົນ​ເຈັບ​ທີ່​ຮັບ​ການ​ປິ່ນ­ປົວ​ຢູ່​ໂຮງ­ໝໍ​ແຂວງ ນອກ​ນີ້ ການ​ນຳ​ກະ­ຊວງ ຖວ​ທ ພ້ອມ​ຄະ­ນະ ຍັງ​ໄດ້​ໄປ​ຢ້ຽມ­ຢາມ ແລະ  ໃຫ້​ກຳ­ລັງ​ໃຈ​ຜູ້​ໄດ້​ຮັບ​ບາດ­ເຈັບ​ທີ່​ຖືກ​ນຳ​ສົ່ງ​ມາ​ປິ່ນ­ປົວ​ຢູ່​ໂຮງ­ໝໍ 103 ນະ­ຄອນ­ຫຼວງ​ວຽງ​ຈັນ ສຳ­ລັບ​ການ​ປິ່ນ­ປົວ​ຄົນ​ເຈັບ ແມ່ນ​ໄດ້​ຮັບ​ການ​ປິ່ນ­ປົວ​ໂດຍ​ບໍ່​ໄດ້​ເສຍ​ຄ່າ.

    ຄະ­ນະ​ນຳ​ກະ­ຊວງ ຖວ​ທ ຂໍ​ສະ­ແດງ​ຄວາມ​ເສຍ​ໃຈ​ຢ່າງ​ສຸດ​ຊຶ້ງ ມາ​ຍັງ​ຜູ້​ໄດ້​ຮັບ​ເຄາະ​ຮ້າຍ ແລະ ຄອບ­ຄົວ ແລະ ສະ­ແດງ​ຄວາມ​ເສົ້າ​ສະ­ຫຼົດ​ໃຈ​ມາ​ຍັງ​ຄອບ­ຄົວ​ຜູ້​ເສຍ​ຊີ­ວິດ​ຄັ້ງ​ນີ້ ພ້ອມ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ ສປປ ລາວ ຍັງ​ໄດ້​ຕາງ­ໜ້າ​ໃຫ້​ລັດ­ຖະ­ບານ ແລະ ປະ­ຊາ­ຊົນ​ລາວ ສົ່ງ​ສານ​ສະ­ແດງ​ຄວາມ​ເສຍ​ໃຈ ແລະ ເສົ້າ​ສະ­ຫຼົດ​ໃຈ​ເຖິງ​ທ່ານ​ນາ­ຍົກ­ລັດ­ຖະ­ມົນ­ຕີ ສປ ຈີນ ພ້ອມ​ນີ້ ລັດ­ຖະ­ບານ​ລາວ ຍັງ​ໄດ້​ຊີ້​ນຳ​ທຸກ​ພາກ­ສ່ວນ​ກ່ຽວ­ຂ້ອງ ສືບ­ຕໍ່​ຊອກ​ຄົ້ນ​ຫາ​ສາ­ເຫດ ຕາມ​ຜົນ​ຕົວ​ຈິງ ແລະ ຕາມ​ກົດ­ໝາຍ ແລະ ລະ­ບຽບ​ການ​ຂອງ ສປປ ລາວ.

    ທ່ານ​ລັດ­ຖະ­ມົນ­ຕີ​ກະ­ຊວງ ຖວ​ທ ໄດ້​ຮຽກ­ຮ້ອງ​ມາ​ຍັງ​ຜູ້​ປະ­ກອບ​ການ​ທຸ­ລະ​ກິດ​ທ່ອງ​ທ່ຽວ ການ​ບໍ­ລິ­ການ​ຂົນ­ສົ່ງ​ຕ້ອງ​ໄດ້​ເອົາ­ໃຈ­ໃສ່​ເພີ່ມ​ທະ­ວີ​ຄວາມ​ຮັບ­ຜິດ­ຊອບ ໃຫ້​ສູງ​ກວ່າ​ເກົ່າ ປະ­ຕິ­ບັດ​ກົດ​ລະ­ບຽບ​ຈະ­ລາ­ຈອນ​ຢ່າງ​ເຂັ້ມ​ງວດ ແລະ ມີ​ສະ­ຕິ​ລະ­ວັງ​ຕົວ​ໃນ​ການ​ຂັບ​ຂີ່ ເພື່ອ​ຮັບ­ປະ­ກັນ​ຄວາມ​ປອດ​ໄພ​ຕໍ່​ຊີ­ວິດ ແລະ ຊັບ​ສິນ​ຂອງ​ນັກ​ທ່ອງ​ທ່ຽວ​ທຸກ​ຄົນ​ທີ່​ມາ​ທ່ຽວ ສປປ ລາວ.

ຂ່າວທີ່ກ່ຽວຂ້ອງ