ຂ່າວຫຼ້າສຸດ

ສສຊ-ສສ ນວ ສືບຕໍ່ລົງພົບປະປະຊາຊົນ

956 23 ສ.ຫ. 2019 ຂ່າວໜ້າ​ໜຶ່ງ

    ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ຊຸດ​ທີ 8 ແລະ ສະ­ມາ­ຊິກ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ (ສສ ນວ) ສືບ­ຕໍ່​ລົງ​ພົບ​ປະ​ປະ­ຊາ­ຊົນ​ບ້ານ​ໂພນ​ຄຳ ໜອງ​ບົວ­ທອງ​ເໜືອ ໜອງ​ບົວ­ທອງ​ໃຕ້ ໂພນ​ສະ­ຫວາດ​ໃຕ້ ແລະ ບ້ານ​ໜອງ​ດ້ວງ​ທົ່ງ ເມືອງ​ສີ​ໂຄດ​ຕະ­ບອງ ຢູ່​ວັດ​ສີ​ຊົມ­ຊື່ນ ວັນ​ທີ 20 ສິງ­ຫາ 2019 ໂດຍ​ມີ​ທ່ານ ລິນ​ຄຳ ດວງ​ສະ­ຫວັນ ສສຊ ຊຸດ​ທີ 8 ປະ­ຈຳ​ເຂດ​ເລືອກ​ຕັ້ງ 1 ສສ ນວ ຊຸດ​ທີ 1 ທ່ານ ພັນ​ໂທ ຈັນ­ທະ​ລາ ອຸ­ດົມ​ສຸກ ຄະ­ນະ​ປະ­ຈຳ​ສະ­ພາ​ປະ­ຊາ­ຊົນ ນວ ສສ ນວ ຊຸດ​ທີ 1 ປະ­ຈຳ­ເມືອງ​ສີ​ໂຄດ​ຕະ­ບອງ ມີ​ທ່ານ ສົມ​ຫວັງ ເກືອບ​ພະ​ພອນ ຫົວ­ໜ້າ​ຫ້ອງ­ການ-ການ​ເງິນ ເມືອງ​ສີ​ໂຄດ​ຕະ­ບອງ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ສົມ​ຫວັງ ເກືອບ​ພະ​ພອນ ໄດ້​ຕາງ­ໜ້າ​ໃຫ້​ອຳ­ນາດ​ການ​ປົກ­ຄອງ 5 ບ້ານ ລາຍ​ງານ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ 5 ບ້ານ​ດັ່ງ­ກ່າວ ຈາກ​ນັ້ນ ຄະ­ນະ​ຜູ້​ແທນ​ກໍ​ໄດ້​ຜັດ­ປ່ຽນ​ກັນ​ເຜີຍ­ແຜ່​ເນື້ອ​ໃນ​ຜົນ­ສຳ­ເລັດ​ຂອງ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ 8 ແລະ ສະ­ພາ​ປະ­ຊາ­ຊົນ ນວ ຊຸດ​ທີ 1 ໂດຍ​ສະ­ເພາະ​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ປະ­ຊາ­ຊົນ ນວ ຊຸດ​ທີ I ເຊິ່ງ​ມີ​ຫຼາຍ​ບັນ ຫາ​ທີ່ ສສ ນວ ຍົກ​ຂຶ້ນ ໂດຍ​ສະ­ເພາະ​ການ​ແກ້​ໄຂ​ບັນ­ຫາ​ຂໍ້​ຂັດ​ແຍ່ງ​ທີ່​ດິນ​ຢູ່ ນວ ຄວາມ​ຄືບ​ໜ້າ​ຂອງ​ການ​ປະ­ຕິ­ບັດ​ໂຄງ­ການ ການ​ຊົດ​ເຊີຍ​ທີ່​ດິນ ແລະ ບັນ­ຫາ​ອື່ນໆ​ທີ່​ປະ­ຊາ­ຊົນ​ໃຫ້​ຄວາມ​ສົນ­ໃຈ.

    ທ່ານ​ນາຍ­ບ້ານ​ໂພນ​ສະ­ຫວາດ​ໃຕ້ ໄດ້​ສະ­ແດງ​ຄວາມ​ຊົມ­ເຊີຍ​ຄະ­ນະ​ຜູ້​ແທນ​ທີ່​ເອົາ­ໃຈ­ໃສ່​ແກ້​ໄຂ​ບັນ­ຫາ​ຂອງ​ປະ­ຊາ­ຊົນ​ຢ່າງ​ຈິງ​ໃຈ ຈາກ​ການ​ນຳ​ສະ­ເໜີ​ບັນ­ຫາ​ໄຟ​ເຍືອງ​ທາງ​ຕໍ່ ສສຊ ກໍ​ຄື ສສ ນວ ກ່ອນ​ໜ້າ​ນີ້ ປັດ­ຈຸ­ບັນ​ໄດ້​ຮັບ​ການ​ແກ້​ໄຂ​ບ້ານ​ໂພນ​ສະ­ຫວາດ​ໃຕ້ ໄດ້​ຮັບ​ໄຟ​ເຍືອງ​ທາງ ແລະ ມີ​ຫຼາຍ​ບັນ­ຫາ​ໄດ້​ຮັບ​ການ​ແກ້​ໄຂ​ໄປ​ໃນ​ທາງ​ທີ່​ດີ​ຂຶ້ນ ນອກ​ນີ້ ໄດ້​ສະ­ເໜີ​ຄະ­ນະ​ຜູ້​ແທນ​ຮັບ​ໄປ​ພິ­ຈາ­ລະ­ນາ ໂດຍ​ສະ­ເພາະ​ບັນ­ຫາ​ການ​ອະ­ນຸ­ຍາດ​ເປີດ​ຮ້ານ​ເກມ ແລະ ໂຕະ​ສະ­ນຸກ​ເກີ້ ບັນ­ຫາ​ຢາ​ເສບ​ຕິດ ຈະ​ເຮັດ​ແນວ­ໃດ​ໃຫ້​ມີ​ຄວາມ​ເປັນ​ເອ­ກະ​ພາບ​ໃນ​ການ­ຈັດ­ຕັ້ງ​ປະ­ຕິ­ບັດ ນອກ​ນີ້​ປະ­ຊາ­ຊົນ​ບ້ານ​ຕ່າງໆ​ຍັງ​ໄດ້​ນຳ​ສະ­ເໜີ​ບັນ­ຫາ​ການ​ພັດ­ທະ­ນາ​ພື້ນ­ຖານ​ໂຄງ​ລ່າງ ຖະ­ໜົນ​ຫົນ­ທາງ ຮ່ອງ​ລະ­ບາຍ​ນ້ຳ ຄ່າ​ໄຟ­ຟ້າ ນ້ຳ​ປະ­ປາ ຄຳ​ຕັດ­ສິນ​ຂອງ​ສານ ປາ­ກົດ­ການ​ຫຍໍ້­ທໍ້​ທີ່​ເກີດ​ຂຶ້ນ​ຢູ່​ສູນ​ປິ່ນ­ປົວ​ບຳ­ບັດ​ຜູ້​ຕິດ​ຢາ​ເສບ​ຕິດ ແລະ ອື່ນໆ.

ຂ່າວທີ່ກ່ຽວຂ້ອງ