ຂ່າວຫຼ້າສຸດ

ຜູ້ເສບຂ່າວຕ້ອງມີສະຕິ

3.796 26 ສ.ຫ. 2019 ນານາສາລະ

   ວັນ​ທີ 13/08/2019 ຜ່ານ​ມາ ຖື​ເປັນ​ວັນ​ຄົບ­ຮອບ 69 ປີ ຂອງ​ສື່​ມວນ​ຊົນ​ລາວ ເຊິ່ງ​ຫວນ​ຄືນ​ຈາກ​ມື້​ທຳ​ອິດ​ຂອງ​ການ​ສ້າງ­ຕັ້ງ​ໃນ​ວັນ​ທີ 13 ສິງ­ຫາ 1950 ທ່ານ ສະ­ຫວັນ​ຄອນ ຣາ​ຊ​ມົນ​ຕຣີ ຮອງ​ລັດ­ຖະ­ມົນ­ຕີ​ກະ­ຊວງ ຖວ​ທ ໄດ້​ກ່າວ​ໃນ​ມື້​ໂຮມ​ຊຸມ­ນຸມ​ວ່າ: ໜຶ່ງ​ປີ­ຜ່ານ­ມາ ສື່​ມວນ​ຊົນ​ລາວ​ໄດ້​ມີ​ຜົນ­ງານ​ເດັ່ນ​ຫຼາຍ​ດ້ານ ເຊັ່ນ: ເອົາ­ໃຈ­ໃສ່​ໂຄ­ສະ­ນາ​ການ​ແກ້​ໄຂ​ບັນ­ຫາ​ໄພ­ພິ­ບັດ​ນ້ຳ​ຖ້ວມ ເອົາ­ໃຈ­ໃສ່​ສ່ອງ​ແສງ​ແກ້​ໄຂ​ປາ­ກົດ­ການ​ຫຍໍ້­ທໍ້​ໃນ​ສັງ­ຄົມ ແລະ ໄດ້​ອອກ​ຂ່າວ ບົດ​ນຳ ບົດ​ຄວາມ ຫຼື ລາຍ­ການ​ຕ່າງໆ ເພື່ອ​ເຕືອນ​ສະ­ຕິ​ໃຫ້​ສັງ­ຄົມ​ໃນ​ການ​ນຳ​ໃຊ້ ບໍ­ລິ­ໂພກ​ຂໍ້​ມູນ​ຂ່າວ­ສານ​ທາງ​ສື່​ສັງ­ຄົມ​ອອນ​ລາຍ.

   ຜູ້​ຂຽນ​ເຫັນ​ວ່າ​ມື້​ໂຮມ​ຊຸມ­ນຸມ​ສື່​ມວນ​ຊົນ​ຜ່ານ​ມາ ແມ່ນ​ເຫດ­ການ​ໜຶ່ງ​ທີ່​ຟົດ­ຟື້ນ ແລະ ຫ້າວ­ຫັນ​ຂອງ​ຜູ້​ເຮັດ​ໜ້າ­ທີ່​ສື່ ເຊັ່ນ: ມີ​ຜູ້​ເຂົ້າ​ຮ່ວມ​ຢ່າງ​ຫຼາກ​ຫຼາຍ ທັງ​ຜູ້​ອາ­ວຸ­ໂສ ບຳ­ນານ ນັກ​ຂ່າວ​ທຸກ​ແຫຼ່ງ​ຂ່າວ ນັກ​ຂຽນ ເຊິ່ງ​ລວມ​ທັງ​ພະ­ສົງ​ທີ່​ໄດ້​ເຮັດ​ໜ້າ­ທີ່ ບົດ­ບາດ­ປະ­ກອບ​ສ່ວນ​ແກ່​ການ​ພັດ­ທະ­ນາ​ສັງ­ຄົມ​ດ້ວຍ​ການ​ໃຊ້​ສື່​ຕ່າງໆ ເພື່ອ​ໃຫ້​ສັງ­ຄົມ​ໄດ້​ຮັບ​ຮູ້ ແລະ ເຂົ້າ­ໃຈ​ແນວ­ທາງ​ນະ­ໂຍ­ບາຍ​ຂອງ​ພັກ ແລະ ລັດ­ຖະ­ບານ ແນວ­ໃດ​ກໍ​ຕາມ ຜູ້​ຂຽນ​ກໍ​ຂໍ​ຮຽກ­ຮ້ອງ​ໃຫ້​ຜູ້​ເຮັດ​ໜ້າ­ທີ່​ຂ່າວ ຫຼື ເຈົ້າ​ຂອງ​ເຟດ​ຕ່າງໆ​ທີ່​ບໍ່​ທັນ​ໄດ້​ລົງ­ທະ­ບຽນ​ຖືກ­ຕ້ອງ​ເປັນ​ທາງ​ການ​ນັ້ນ ກໍ​ຄວນ​ໃຫ້​ຄວາມ​ຮ່ວມ​ມື​ກັບ​ພາກ​ລັດ ເພື່ອ​ສະ­ດວກ​ຕໍ່​ການ​ຄຸ້ມ​ຄອງ ແລະ ເຜີຍ­ແຜ່​ແນວ­ທາງ​ຂອງ​ພັກ-ລັດ​ໃຫ້​ໄປ​ໃນ​ລວງ​ດຽວ​ກັນ.

   ທ່ານ​ຜູ້​ອ່ານ​ກໍ​ອາດ​ຮັບ​ຮູ້​ແລ້ວ​ວ່າ ທຸກ​ມື້­ນີ້​ເປັນ​ໂລກ​ຂອງ​ການ​ໃຊ້​ຂໍ້​ມູນ​ອອນ​ລາຍ​ທັນ​ສະ­ໄໝ​ໃນ​ເກືອບ​ທຸກ​ສາ­ຂາ​ອາ­ຊີບ ເຊິ່ງ​ສັງ­ຄົມ​ຜູ້​ເສບ​ຂ່າວ​ຕ້ອງ​ມີ​ສະ­ຕິ​ຮູ້​ເທົ່າ​ທັນ​ຂ່າວ​ດັ່ງ­ກ່າວ ເພາະ​ຄວາມ​ຈິງ​ຂອງ​ພວກ​ກຸ່ມ​ຄົນ​ບໍ່​ດີ ຍາມ​ໃດ​ກໍ​ຈ້ອງ​ຫາ​ໂອ­ກາດ​ທຳ­ລາຍ​ເຮົາ​ດ້ວຍ​ການ​ຕັດ​ຕໍ່​ຂ່າວ ສ້າງ​ຂ່າວ​ປອມ ຕື່ມ​ສີ​ຕີ​ໄຂ່ ເລື່ອງ​ຄ່າ​ສອກ​ຂະ­ຫຍາຍ​ອອກ​ຄ່າ​ວາ ເຊິ່ງ​ໃນ​ຫຼາຍ​ກໍ­ລະ­ນີ​ກຸ່ມ​ຄົນ​ບໍ່​ດີ​ກໍ​ໄດ້​ຊັກ​ຊວນ​ຊີ້​ນຳ​ເອົາ​ໄວ​ລຸ້ນ ຫຼື ບຸກ­ຄົນ​ຂາດ​ສະ­ຕິ​ເປັນ​ເຄື່ອງ­ມື​ນຳ​ໃຊ້​ສື່​ເພື່ອ​ປັ່ນ​ປ່ວນ​ໂຈມ​ຕີ​ລັດ­ຖະ­ບານ ຢ່າ​ລືມ​ວ່າ​ຊາດ​ເຮົາ​ທຸກ​ມື້­ນີ້​ມີ​ເອ­ກະ­ລາດ ອະ­ທິ­ປະ​ໄຕ ຍ້ອນ​ບັນ­ພະ­ບຸ­ລຸດ​ໄດ້​ເສຍ­ສະ­ຫຼະ​ເລືອດ​ເນື້ອ​ມາ​ນັບ​ບໍ່​ຖ້ວນ ພວກ​ເຮົາ​ເກີດ​ໃໝ່​ໃຫຍ່​ລຸນ​ຕ້ອງ​ມີ​ສະ­ຕິ ຮັກ­ຫອມ​ປົກ​ປ້ອງ​ຜົນ​ປະ­ໂຫຍດ​ໃຫ້​ແກ່​ຊາດ​ຂອງ​ຕົນ.

   ຜູ້​ເຮັດ​ສື່​ສ່ວນ​ຕົວ ຫຼື ເຈົ້າ​ຂອງ​ເຟດ​ກໍ​ຄວນ​ຮຽນ​ຮູ້​ຈັນ​ຍາ​ບັນ​ນັກ​ຂ່າວ ແລະ ຮູ້­ສຶກ​ສາ​ຄົ້ນ­ຄວ້າ​ກົດ­ໝາຍ​ສື່​ມວນ​ຊົນ ພ້ອມ​ດ້ວຍ​ຄຳ​ສັ່ງ​ແນະ­ນຳ​ຂອງ​ແຕ່​ລະ​ໜ່ວຍ​ງານ​ການ­ຈັດ­ຕັ້ງ​ທີ່​ໄດ້​ອອກ​ຂໍ້​ຫ້າມ​ໄວ້​ແລ້ວ​ຢ່າງ​ຮັດ­ກຸມ ບໍ່​ແມ່ນ​ເຮັດ​ຕາມ­ໃຈ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ