ຂ່າວຫຼ້າສຸດ

ຫວຽດນາມ - ກໍາປູ​ເຈຍ ລົງ​ນາມ​ບົດ​ບັນທຶກ​ກຳນົດ​ທິດ​ທາງ​ການ​ຮ່ວມ​ມື​ໃນຫຼາຍຂົງ​ເຂດ

445 26 ສ.ຫ. 2019 ຂ່າວຕ່າງປະເທດ
ຫວຽດນາມ - ກໍາປູ​ເຈຍ ລົງ​ນາມ​ບົດ​ບັນທຶກ​ກຳນົດ​ທິດ​ທາງ​ການ​ຮ່ວມ​ມື​ໃນຫຼາຍຂົງ​ເຂດ

    ສະໄໝ​ປະຊຸມ​ຄັ້ງ​ທີ 17 ຂອງ​ຄະນະ​ກຳມະການ​ປະສົມ ຫວຽດນາມ-ກຳປູເຈຍ ກ່ຽວ​ກັບ​ການ​ຮ່ວມ​ມື​ທາງ​ດ້ານ​ເສດຖະກິດ ວັດທະນະທຳ ວິທະຍາສາດ ແລະ ເຕັກນິກ ໄດ້​ຈັດ​ຂຶ້ນ​ເມື່ອ​ວັນ​ທີ 21 ສິງຫາ​ນີ້ ທີ່​ນະຄອນຫຼວງ​ພະນົມ​ເປັນ ຂອງ​ກຳປູເຈຍ ພາຍ​ໃຕ້​ການ​ເປັນ​ປະທານ​ຮ່ວມ​ຂອງ​ທ່ານ ຟ້າມ ບິ່ງ​ມິງ ຮອງ​ນາຍົກລັດຖະມົນຕີ ທັງ​ເປັນ​ລັດຖະມົນຕີ​ການ​ຕ່າງປະເທດ​ຫວຽດນາມ ແລະ ທ່ານ ປຣັກ ໂສ​ຄອນ ຮອງ​ນາຍົກລັດຖະມົນຕີ ທັງ​ເປັນ​ລັດຖະມົນຕີ​ການ​ຕ່າງປະເທດ ແລະ ຮ່ວມ​ມື​ສາກົນ ຂອງ​ກຳປູເຈຍ. ເຂົ້າ​ຮ່ວມ​ໃນ​ການ​ປະຊຸມ​ນີ້ ມີ​ບັນດາ​ການ​ນຳ​ລະດັບ​ສູງ ຈາກ​ຫຼາຍ​ອົງການ ກະຊວງ ແລະ ຂະແໜງການ​ຂອງ​ສອງ​ປະເທດ ຫວຽດນາມ ແລະ  ກຳປູເຈຍ.

    ທ່ານ ຟ້າມ​ບິ່ງ​ມິງ ແລະ ທ່ານ ປຣັກ ໂສ​ຄອນ ໄດ້​ເຫັນ​ດີ​ເປັນ​ເອກະສັນ​ກັນ​ວ່າ ການ​ພົວພັນ​ຫວຽດນາມ-ກຳປູເຈຍ ນັບ​ແຕ່​ສະໄໝ​ປະຊຸມ​ຂອງ​ຄະນະ​ກຳມະການ​ປະສົມ​ຄັ້ງ​ທີ 16 (ເດືອນ​ພຶດສະພາ ປີ 2018) ເປັນຕົ້ນ​ມາ ໄດ້​ມີ​ການ​ສືບຕໍ່​ພັດທະນາ ແລະ ບັນລຸ​ໝາກຜົນ​ໃໝ່ໆ ທີ່​ໜ້າ​ສົ່ງເສີມ. ສອງ​ຝ່າຍ​ເຫັນ​ດີ​ທີ່​ຈະ​ອຳນວຍ​ຄວາມ​ສະດວກ​ຫຼາຍ​ຂຶ້ນ ໃຫ້​ແກ່​ການ​ຮ່ວມ​ມື​ທາງ​ດ້ານ​ເສດຖະກິດ ການ​ຄ້າ; ສືບຕໍ່​ປັບປຸງ ແລະ ຊຸກຍູ້​ການ​ຮ່ວມ​ມື​ໃນ​ຂົງເຂດ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ ພັດທະນາ​ພື້ນຖານ​ໂຄງ​ລ່າງ​ການ​ຄົມມະນາຄົມ ຂົນສົ່ງ ອຸດສາຫະກຳ-ບໍ່​ແຮ່-ພະລັງງານ ກະສິກຳ-ປ່າໄມ້-ການ​ປະມົງ ຖະແຫຼງ​ຂ່າວ ແລະ ສື່ສານ ສາທາລະນະ​ສຸກ ແຮງ​ງານ ແລະ ບັນດາ​ບັນຫາ​ສັງຄົມ ວັດທະນະທຳ-ກິລາ-ທ່ອງ​ທ່ຽວ ສິ່ງແວດລ້ອມ ແລະ ອື່ນໆ.

    ເມື່ອ​ສິ້ນ​ສຸດ​ການ​ປະຊຸມ ທ່ານ ຟ້າມ​ບິ່ງ​ມິງ ແລະ ທ່ານ ປຣັກ ໂສ​ຄອນ ໄດ້​ຮ່ວມ​ກັນ​ລົງ​ນາມ​ໃນ​ບົດ​ບັນທຶກ​ຂໍ້​ຕົກລົງ ດ້ວຍ​ເນື້ອ​ໃນ ແລະ ໂຄງການ​ຮ່ວມ​ມື​ຕົວ​ຈິງ ຢູ່​ໃນ 28 ຂົງເຂດ​ວຽກ​ງານ ໂດຍ​ສອງ​ຝ່າຍ​ເຊື່ອ​ໝັ້ນ​ວ່າ ບົດ​ບັນທຶກ​ຂໍ້​ຕົກລົງ​ນີ້ ຈະ​ເປັນ​ການ​ກຳນົດ​ທິດ​ທາງ​ໃຫ້​ແກ່​ການ​ຮ່ວມ​ມື​ຮອບດ້ານ​ລະຫວ່າງ​ສອງ​ປະເທດ ໃນ​ຂົງເຂດ​ຕ່າງໆ ປະກອບສ່ວນ​ເຂົ້າ​ໃນ​ການ​ເຮັດ​ໃຫ້ການ​ພົວພັນ ຫວຽດນາມ-ກຳປູເຈຍ ພັດທະນາ​ຢ່າງ​ບໍ່​ຢຸດ​ຢັ້ງ​ໃນຕໍ່ໜ້າ.

ຂ່າວທີ່ກ່ຽວຂ້ອງ