ສ ອາ​ເມຣິກາ ປະກາດ​ຂໍ້​ກຳນົດ​ໃໝ່​ກ່ຽ​ວກັບ​ເດັກນ້ອຍ​ຍ້າຍ​ຖິ່ນ​ຖານ

493 26 ສ.ຫ. 2019 ຂ່າວຕ່າງປະເທດ
ສ ອາ​ເມຣິກາ ປະກາດ​ຂໍ້​ກຳນົດ​ໃໝ່​ກ່ຽ​ວກັບ​ເດັກນ້ອຍ​ຍ້າຍ​ຖິ່ນ​ຖານ

     ເມື່ອ​ວັນ​ທີ 21 ສິງຫາ​ນີ້ ລັດຖະບານ ສ ອາ​ເມ​ຣິ​ກາ ໄດ້​ປະກາດ​ຂໍ້​ກຳນົດ​ໃໝ່ ໂດຍ​ອະນຸຍາດ​ໃຫ້​ເຈົ້າ​ໜ້າທີ່​ປະເທດ​ນີ້ ກັກ​ບັນດາ​ຄອບຄົວ​ຜູ້​ຍ້າຍ​ຖິ່ນ​ຖານ​ເປັນ​ການ​ຊົ່ວຄາວ​ໂດຍ​ບໍ່​ມີ​ກຳນົດ​ເວລາ ໃນ​ຂະນະ​ທີ່​ຄຳ​ຮ້ອງ​ຂໍ​ລີ້​ໄພ​ຂອງ​ຄອບຄົວ​ຜູ້​ຍ້າຍ​ຖິ່ນ​ຖານ​ເຫຼົ່ານັ້ນ ພວມ​ໄດ້​ຮັບ​ການ​ພິຈາລະນາ​ຮັບຮອງ​ຮອງ.

    ຂໍ້​ກຳນົດ​ໃໝ່​ດັ່ງກ່າວ ຈະ​ແທນ​ທີ່​ໃຫ້​ແກ່​ຂໍ້​ຕົກລົງ​ດ້ານ​ນິ​ກຳ​ສະບັບ​ໜຶ່ງ ທີ່​ໄດ້​ຮັບ​ການ​ປະຕິບັດ​ມາ​ຕັ້ງແຕ່​ປີ 1997 (Flores Settlement Agreement) ໂດຍ​ໃຫ້​ອະນຸຍາດ​ກຳນົດ​ເວລາ ທີ່​ບັນດາ​ອົງການ​ເຂົ້າ​ເມືອງ​ຕັ້ງ​ຖິ່ນ​ຖານ​ຂອງ ສ ອາ​ເມ​ຣິ​ກາ ກັກ​ເດັກນ້ອຍ​ຜູ້​ຍ້າຍ​ຖິ່ນ​ຖານ ພາຍ​ໃນ​ເວລາ 20 ວັນ ນັ້ນ​ກໍ​ໝາຍ​ຄວາມ​ວ່າ ບັນດາ​ຄອບຄົວ​ທີ່​ມີ​ເດັກນ້ອຍ ກໍ​ຕ້ອງ​ໄດ້​ຮັບ​ການ​ປ່ອຍ​ເປັນ​ອິດ​ສະລະ ພາຍ​ໃນ​ຮອບ​ເວລາ 20 ວັນ.

    ທາງ​ການ ສ ອາ​ເມ​ຣິ​ກາ ເຫັນ​ວ່າ ຂໍ້​ກຳນົດ​ດັ່ງກ່າວ ເປັນ​ການ​ປະກອບສ່ວນ​ເຮັດ​ໃຫ້​ເພີ່ມ​ກະແສ​ຜູ້​ຍ້າຍ​ຖິ່ນ​ຖານ​ເຂົ້າ​ໄປ​ໃນ ສ ອາ​ເມ​ຣິ​ກາ ໂດຍ​ສະເພາະ​ກໍ​ແມ່ນ​ບັນດາ​ຄອບຄົວ​ທີ່​ມາ​ຈາກ​ອາ​ເມ​ຣິ​ກາ​ກາງ ແລະ ເປັນ​ການ​ສົ່ງເສີມ​ໃຫ້​ບັນດາ​ຄອບຄົວ​ນັ້ນ​ນຳ​ເອົາ​ເດັກນ້ອຍ​ໄປ​ນຳ ເພື່ອ​ໃຫ້​ໄດ້​ມີ​ໂອກາດ​ຖືກ​ປ່ອຍ​ເປັນ​ອິດ​ສະລະ​ໄວ​ກວ່າ ໃນ​ເວລາ​ທີ່​ຄຳ​ຮ້ອງ​ຂໍ​ລີ້​ໄພ​ຂອງ​ເຂົາເຈົ້າ​ພວມ​ໄດ້​ຮັບ​ການ​ພິ​ຈາລະ​ນະ​ຮັບຮອງ. ຕາມ​ທຳ​ມະ​ດາ​ແລ້ວ ບັນດາ​ຄອບຄົວ​ຜູ້​ຍ້າຍ​ຖິ່ນ​ຖານ ຕ້ອງ​ໄດ້​ລໍຖ້າ​ເປັນ​ເວລາ​ຫຼາຍ​ເດືອນ ເພື່ອ​ໃຫ້​ສານ​ພິຈາລະນາ​ຮັບຮອງ​ເອກະສານ​ຂໍ​ລີ້​ໄພ.

    ຂໍ້​ກຳນົດ​ໃໝ່​ທີ່​ມີ​ອອກ​ມາ​ນັ້ນ ອະນຸຍາດ​ໃຫ້​ກະຊວງ​ຄວາມ​ໝັ້ນຄົງ​ພາຍ​ໃນ​ຂອງ ສ ອາ​ເມ​ຣິ​ກາ (DHS) ສືບຕໍ່​ກັກ​ຂັງ​ບັນດາ​ຄອບຄົວ​ຜູ້​ຍ້າຍ​ຖິ່ນ​ຖານ ໄປ​ຈົນ​ກວ່າ​ວ່າ​ສານ​ຈະ​ສຳເລັດ​ຂະ​ບວນ​ການ​ພິຈາລະນາ​ຮັບຮອງ. ຂໍ້​ກຳນົດ​ໃໝ່​ນີ້​ຈະ​ນຳ​ອອກ​ມາ​ປະກາດ​ຢ່າງ​ເປັນ​ທາງ​ການ​ໃນ​ວັນ​ທີ 23 ສິງຫາ​ນີ້ ແລະ ຈະ​ມີ​ຜົນ​ບັງຄັບ​ໃຊ້ ຫຼັງ 60 ວັນ ນັບ​ແຕ່​ມື້​ປະກາດ​ເປັນຕົ້ນ​ໄປ.

ຂ່າວທີ່ກ່ຽວຂ້ອງ