ເງິນ​ເຟີ້​ຂອງ Eurozone ຕ່ຳ​ກວ່າ​ຄາດໝາຍ​ຂອງ ECB

478 26 ສ.ຫ. 2019 ຂ່າວຕ່າງປະເທດ
ເງິນ​ເຟີ້​ຂອງ Eurozone ຕ່ຳ​ກວ່າ​ຄາດໝາຍ​ຂອງ ECB

    ຕົວ​ເລກ​ສະຖິຕິ​ຢ່າງ​ເປັນ​ທາງ​ການ ທີ່​ໄດ້​ມີ​ການ​ດັດແກ້ ຂອງ​ອົງການ​ສະຖິຕິ​ເອີ​ຣົບ (Eurostat) ແລະ ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 19 ສິງຫາ​ນີ້ ຊີ້​ໃຫ້​ເຫັນ​ວ່າ ເງິນ​ເຟີ້​ຢູ່​ໃນ 19 ປະເທດ ທີ່​ເປັນ​ສະມາຊິກ​ເຂດ​ໃຊ້​ເງິນ​ເອີ​ໂຣ  (Eurozone) ໄດ້​ຫຼຸດ​ລົງ​ໄປ​ຍັງ​ເຫຼືອ 1% ພາຍ​ໃນ​ເດືອນ​ກໍລະກົດ ປີ 2019 ເມື່ອ​ທຽບໃສ່​ລະດັບ 1,3% ໃນ​ເດືອນ​ມິຖຸນາ 2019 ແລະ ລະດັບ 2,2% ໃນ​ເວລາ​ດຽວ​ກັນ​ຂອງ​ປີ​ກາຍ ນັບ​ວ່າ​ໄກ​ຈາກ​ຄາດໝາຍ​ຂອງ​ທະນາຄານ​ກາງ​ເອີ​ຣົບ (ECB) ທີ່​ວາງ​ອອກ​ມາ​ວ່າ​ຢູ່​ພຽງ​ທີ່​ຕ່ຳ​ກວ່າ 2%.

    ທ່ານ ມາ​ຣີ​ໂອ ດຣາ​ກີ ປະທານ​ທະນາຄານ​ກາງ​ເອີ​ຣົບ (ECB) ໃຫ້ການ​ຄາດ​ຄະເນ​ອອກ​ມາ​ເມື່ອ​ເດືອນ​ທີ່​ຜ່ານ​ມາ​ວ່າ ບັນດາ​ມາດ​ຕະການ​ກະ​ຕຸ້ນ​ໃໝ່ ອາດ​ຈະ​ຖືກ​ນຳ​ອອກ​ມາ ເພື່ອ​ຕ້ານ​ກັບ​ເງິນ​ເຟີ້​ຕ່ຳ ທ່າມກາງ​ຄວາມ​ກັງວົນ​ກ່ຽວ​ກັບ​ລັດທິ​ປົກ​ປ້ອງ​ຂອງ ສ ອາ​ເມ​ຣິ​ກາ ເພີ່ມ​ຂຶ້ນ ປະກອບ​ກັບ​ຄວາມ​ອ່ອນແອ​ຢູ່​ໃນ​ບັນດາ​ຕະຫຼາດ​ເກີດ​ໃໝ່ ແລະ ຄວາມ​ເປັນ​ໄປ​ໄດ້​ທີ່​ອັງກິດ​ຖອນ​ອອກ​ໄປ​ຈາກ​ສະຫະພາບ​ເອີ​ຣົບ  (EU) ຫຼື​ທີ່​ເອີ້ນ​ວ່າ ເບຣ​ຊິດ Brexit ໂດຍ​ບໍ່​ມີ​ຂໍ້​ຕົກລົງ.

    ໃນ​ວັນ​ດຽວ​ກັນ Eurostat ກໍ​ໄດ້​ເປີດເຜີຍ​ຕົວ​ເລກ ໃຫ້​ຮູ້​ວ່າ ລະດັບ​ເງິນ​ເຟີ້​ຂອງ EU ຢູ່​ທີ່ 1,4% ໃນ​ເດືອນ​ກໍລະກົດ ປີ 2019 ເປັນ​ການ​ຫຼຸດ​ລົງ​ເມື່ອ​ທຽບໃສ່​ລະດັບ 1,6% ໃນ​ເດືອນ​ມິຖຸນາ ປີ 2019 ແລະ ລະດັບ 2,2% ຂອງ​ເວລາ​ດຽວ​ກັນ​ໃນ​ປີ​ກາຍ.

ຂ່າວທີ່ກ່ຽວຂ້ອງ