ອິນ​ໂດ​ເນ​ເຊຍ ​ເພີ່ມ​ເຕີມ​ກອງ​ກຳລັງ​ຮັກສາ​ຄວາມ​ສະຫງົບ​ໄປ​ຍັງ​ແຂວງ​ປາ​ປົວ

496 26 ສ.ຫ. 2019 ຂ່າວຕ່າງປະເທດ

    ຂ່າວ­ສານ AFP ຂອງ​ຝຣັ່ງ ລາຍ​ງານ​ວ່າ ທາງ​ການ​ອິນ​ໂດ​ເນ​ເຊຍ ໄດ້​ຜັນ​ຂະ­ຫຍາຍ​ເຈົ້າ​ໜ້າ­ທີ່​ຮັກ­ສາ​ຄວາມ​ສະ­ຫງົບ​ກວ່າ 1.000 ຄົນ ໄປ​ຍັງ​ແຂວງ​ປາ​ປົວ ຊຶ່ງ​ຕັ້ງ​ຢູ່​ໃນ​ທິດ­ຕາ­ເວັນ­ອອກ​ຂອງ​ປະ­ເທດ​ນີ້ ທ່າມ­ກາງ​ທີ່​ກະ­ແສ​ຄື້ນ​ປະ​ທ້ວງ ແລະ ຈາ­ລະ​ຈົນ​ຍັງ​ສືບ­ຕໍ່​ເກີດ​ຂຶ້ນ​ຢູ່​ທີ່​ນັ້ນ.

    ເຖິງ​ຢ່າງ­ໃດ​ກໍ​ຕາມ ໂດຍ​ບໍ່​ເອົາ​ຫົວ­ຊາ​ຕໍ່​ການ​ເພີ່ມ​ທະ­ວີ ດ້ານ​ການ​ຮັກ­ສາ​ຄວາມ​ສະ­ຫງົບ​ຄື​ດັ່ງ­ກ່າວ ການ​ປະ​ທ້ວງ​ກໍ​ຍັງ​ຄົງ​ເກີດ​ຂຶ້ນ​ຢູ່​ໃນ​ຫຼາຍ​ຕົວ​ເມືອງ​ຂອງ​ແຂວງ​ປາ​ປົວ. ຢູ່​ໃນ​ນະ­ຄອນ ຕີ​ມີ​ກາ ມີ​ປະ­ມານ 1.000 ຄົນ ຍັງ​ສືບ­ຕໍ່​ລົງ​ສູ່​ທ້ອງ​ຖະ­ໜົນ​ເພື່ອ​ປະ​ທ້ວງ ໂດຍ​ໄດ້​ແກວ່ງ​ກ້ອນ​ຫີນ​ໃສ່​ເຈົ້າ​ໜ້າ­ທີ່​ຕຳ­ຫຼວດ ແລະ ທຳ­ລາຍ​ຮົ້ວ​ອ້ອມ​ຮອບ​ສຳ­ນັກ­ງານ​ຂອງ​ສະ­ພາ​ນິ­ຕິ­ບັນ­ຍັດ​ໃນ​ທ້ອງ­ຖິ່ນ. ກຸ່ມ​ຜູ້​ປະ​ທ້ວງ​ໄດ້​ສະ­ຫຼາຍ​ໄປ ເມື່ອ​ຕຳ­ຫຼວດ​ຍິງ​ປືນ​ຂຶ້ນ​ຟ້າ.

    ກະ­ແສ​ຄື້ນ​ການ​ປະ​ທ້ວງ ພວມ​ແຜ່​ກວ້າງ​ອອກ​ຢູ່​ໃນ​ແຂວງ​ປາ​ປົວ ຫຼັງ​ຈາກ​ທີ່​ປະ­ຊາ­ຊົນ​ຫຼາຍ​ພັນ​ຄົນ ຊຶ່ງ​ໃນ​ນັ້ນ​ຕົ້ນ­ຕໍ​ແມ່ນ​ນັກ​ສຶກ​ສາ​ລະ­ດັບ​ມະ­ຫາ­ວິ­ທະ­ຍາ­ໄລ ລົງ​ສູ່​ທ້ອງ​ຖະ­ໜົນ​ມາ​ຕັ້ງ­ແຕ່​ວັນ​ທີ 19 ສິງ­ຫາ ເພື່ອ​ຄັດ­ຄ້ານ​ຕໍ່​ໄພ​ຈຳ­ແນກ​ເຊື້ອ​ຊາດ ແລະ ຈຳ­ແນກ​ການ​ປະ­ພຶດ.

ໂຄ­ສົກ​ອົງ­ການ​ຕຳ­ຫຼວດ​ແຫ່ງ​ຊາດ​ອິນ​ໂດ​ເນ​ເຊຍ ເວົ້າ​ວ່າ ຜູ້​ປະ​ທ້ວງ​ເກືອບ​ທັງ​ໝົດ ຖືກ​ກະ​ຕຸ້ນ ຫຼັງ​ຈາກ​ທີ່​ນັກ​ສຶກ​ສາ 43 ຄົນ ຢູ່​ໃນ​ແຂວງ​ປາ​ປົວ ຖືກ​ຈັບ​ໃນ​ຂໍ້​ຫາ​ວ່າ​ບໍ່​ນັບ­ຖື​ທຸງ­ຊາດ​ຂອງ​ອິນ​ໂດ​ເນ​ເຊຍ ທີ່​ໃສ່​ເສົາ​ປັກ​ໄວ້​ຕໍ່­ໜ້າ​ຫໍ​ພັກ​ນັກ​ສຶກ​ສາ ໃນ​ໂອ­ກາດ​ລະ­ນຶກ​ວັນ​ເອ­ກະ­ລາດ​ຂອງ​ອິນ​ໂດ​ເນ​ເຊຍ ເມື່ອ​ວັນ​ທີ 17 ສິງ­ຫາ​ທີ່​ຜ່ານ​ມາ.

    ໃນ​ເມື່ອ​ກ່ອນ ປາ​ປົວ ເປັນ​ເມືອງ​ຂຶ້ນ​ຂອງ​ໂຮນ​ລັງ ຊຶ່ງ​ຕັ້ງ​ຢູ່​ທາງ​ທິດ­ຕາ­ເວັນ­ຕົກ​ຂອງ ນູ​ແວນ ກີ​ເນ. ປະ­ຊາ­ຊົນ​ຢູ່​ໃນ​ປາ​ປົວ ມີ​ຮີດ­ຄອງ​ປະ­ເພ­ນີ ແລະ ວັດ­ທະ­ນະ­ທຳ ແຕກ​ຕ່າງ​ກັບ​ສ່ວນ​ທີ່​ຍັງ​ເຫຼືອ​ຂອງ​ອິນ​ໂດ​ເນ​ເຊຍ. ເມື່ອ​ປີ 1969 ປາ​ປົວ​ໄດ້​ຜະ­ໜວກ​ເຂົ້າ​ກັບ​ອິນ​ໂດ​ເນ​ເຊຍ ຫຼັງ​ຈາກ​ມີ​ການ​ລົງ​ຄະ­ແນນ​ສຽງ ໂດຍ​ໄດ້​ຮັບ​ການ​ອຸ­ປະ­ຖຳ​ຈາກ​ອົງ­ການ​ສະ­ຫະ​ປະ­ຊາ​ຊາດ.

 

ຂ່າວທີ່ກ່ຽວຂ້ອງ