ບັນດາ​ສະມາຊິກ​ຂອງ​ອົງການ​ກຳ​ອຳນາດ​ໃນ​ຊູ​ດານ ສາບານ​ຕົນ​ຮັບ​ຕຳ​ແໜ່​ງ

560 26 ສ.ຫ. 2019 ຂ່າວຕ່າງປະເທດ
ບັນດາ​ສະມາຊິກ​ຂອງ​ອົງການ​ກຳ​ອຳນາດ​ໃນ​ຊູ​ດານ ສາບານ​ຕົນ​ຮັບ​ຕຳ​ແໜ່​ງ

    ບັນດາ​ສະມາຊິກ​ຝ່າຍ​ພົນ​ລະ​ເຮືອນ ແລະ ຝ່າຍ​ທະຫານ ຂອງ​ສະພາ​ສູງ​ສຸດ​ໃນ​ຊູ​ດານ ຊຶ່ງ​ເປັນ​ອົງການ​ກຳ​ອຳນາດ​ໃໝ່​ຢູ່​ໃນ​ປະເທດ​ນີ້ ໄດ້​ເຂົ້າ​ພິທີ​ສາບານ​ຕົນ​ຮັບ​ຕຳແໜ່ງ ໃນ​ວັນ​ທີ 21 ສິງຫາ​ນີ້. ໃນ​ຂະນະ​ດຽວ​ກັນ ທ່ານ ອັບ​ດານ​ລາ ຮາມ​ດອກ ຜູ້​ຊຶ່ງ​ໄດ້​ຮັບ​ການ​ສະເໜີ​ຊື່​ຈາກ​ສະຫະພາບ ເພື່ອ​ເສລີພາບ ແລະ ການ​ປ່ຽນແປງ (FFC) ທີ່​ເປັນ​ຝ່າຍ​ຄ້ານ​ໃນ​ຊູ​ດານ ໃຫ້​ເປັນ​ນາຍົກລັດຖະມົນຕີ ໃນ​ໄລຍະ​ຂ້າມ​ຜ່ານ​ນັ້ນ ຈະ​ໄດ້​ຮັບ​ການ​ແຕ່​ຕັ້ງ ຫຼັງ​ວັນ​ທີ 21 ສິງຫາ.

    ກ່ອນ​ໜ້າ​ນັ້ນ ໃນ​ວັນ​ດຽວ​ກັນ ນາຍ​ພົນ ອັບ​ແດລ ຟັດ​ຕາ ອາ​​ລ-ບູ​ຮັນ ກໍ​ໄດ້​ເຂົ້າ​ພິທີ​ສາບານ​ຕົນ​ຮັບ​ຕຳແໜ່ງ​ປະທານ ສະພາ​ສູງ​ສຸດ​ຂອງ​ຊູ​ດານ. ນາຍ​ພົນ ອັບ​ແດລ ຟັດ​ຕາ ອາ​​ລ-ບູ​ຮັນ ເຄີຍ​ເປັນ​ຫົວໜ້າ​ສະພາ​ການ​ທະຫານ​ຂ້າມ​ຜ່ານ (TMC) ຊຶ່ງ​ເປັນ​ອົງການ​ກຳ​ອຳນາດ​ນຳພາ​ຊູ​ດານ ນັບ​ແຕ່​ເວລາ​ທີ່​ປະທານາທິບໍດີ ໂອ​ມາ ອາ​​ລ-ບາ​ຊີ ຖືກ​ຂັບ​ໄລ່​ອອກ​ຈາກ​ຕຳແໜ່ງ ເມື່ອ​ວັນ​ທີ 11 ເມສາ ປີ​ນີ້​ເປັນຕົ້ນ​ມາ ຫຼັງ​ຈາກ​ທີ່​ທ່ານ​ໄດ້​ກຳ​ອຳນາດ​ມາ​ເປັນ​ເວລາ 30 ປີ.

    ສະພາ​ສູງ​ສຸດ​ຂອງ​ຊູ​ດານ ທີ່​ຫາ​ກໍ​ໄດ້​ຮັບ​ການ​ສ້າງຕັ້ງ​ຂຶ້ນ​ມາ​ນັ້ນ ປະກອບ​ມີ 11 ຄົນ ເປັນ​ສະມາຊິກ. ອົງການ​ດັ່ງກ່າວ ຈະ​ເຂົ້າ​ແທນ​ທີ່ TMC ເພື່ອ​ນຳພາ​ປະເທດ​ຊາດ​ຊູ​ດານ ໃນ​ໄລຍະ​ຂ້າມ​ຜ່ານ​ແກ່ຍາວ​ເປັນ​ເວລາ 3 ປີ ເພື່ອ​ກ້າວ​ໄປ​ສູ່​ອຳນາດ​ການ​ປົກຄອງ​ຝ່າຍ​ພົນ​ລະ​ເຮືອນ. ຫົວໜ້າ​ຂອງ​ສະພາ​ດັ່ງກ່າວ ໃນ​ໄລຍະ​ເວລາ 21 ເດືອນ​ທຳ​ອິດ ແມ່ນ​ຍາຍ​ພົນ​ຄົນ​ໜຶ່ງ​ທີ່​ມາ​ຈາກ​ກອງທັບ ແລະ ໃນ 18 ເດືອນ​ທີ່​ຍັງ​ເຫຼືອ ຈະ​ແມ່ນ​ຕົວ​ແທນ​ຝ່າຍ​ພົນ​ລະ​ເຮືອນ.

ຂ່າວທີ່ກ່ຽວຂ້ອງ