ກອງ​ປະຊຸມ​ສຸດ​ຍອດ G7 ບັນລຸ​ຄວາມ​ເຫັນ​ພ້ອມ​ໃນ​ບາງ​ບັນຫາ​ຂອງ​ສາກົນ

193 28 ສ.ຫ. 2019 ຂ່າວຕ່າງປະເທດ
ກອງ​ປະຊຸມ​ສຸດ​ຍອດ G7 ບັນລຸ​ຄວາມ​ເຫັນ​ພ້ອມ​ໃນ​ບາງ​ບັນຫາ​ຂອງ​ສາກົນ

   ຫຼັງ​ຈາກ​ທີ່​ໄດ້​ດຳເນີນ​ງານ​ມາ​ເປັນ​ເວລາ 3 ວັນ ກອງ​ປະຊຸມ​ສຸດ​ຍອດ​ຂອງ​ກຸ່ມ 7 ປະເທດ​ອຸດສາຫະກຳ​ພັດທະນາ​ແຖວ​ໜ້າ​ຂອງ​ໂລກ (G7) ໄດ້​ອັດ​ລົງ​ເມື່ອ​ຄ່ຳ​ຄືນ​ຂອງ​ວັນ​ທີ 26 ສິງຫາ​ນີ້ ທີ່​ນະຄອນ​ເບຍ​ຣິ​​ສ ຂອງ​ປະເທດ​ຝຣັ່ງ.

    ປະທານາທິບໍດີ​ຝຣັ່ງ ເອມ​ມາ​ນູ​ແອນ ມາກ​ຣົງ ກ່າວ​ຢູ່​ໃນ​ກອງ​ປະຊຸມ​ຖະແຫຼງ​ຂ່າວ​ຮ່ວມ​ກັບ​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ໂດຍ​ໄດ້​ຊົມເຊີຍ​ຕໍ່​ການ​ທີ່​ກອງ​ປະຊຸມ​ໄດ້​ບັນລຸ​ຄວາມ​ເຫັນ​ພ້ອມ​ໃນ​ບາງ​ບັນຫາ​ຂອງ​ສາກົນ ໃນ​ນັ້ນ​ມີ​ວິ​ກິດ​ການ​ນີວ​ເຄລຍ​ອີ​ຣານ ການ​ຄ້າ ແລະ ໄຟ​ໄໝ້​ປ່າ ອາ​ມາ​ຊອນ ວ່າ​ເປັນ​ບັນຫາ​ທີ່​ສຳຄັນ.

    ເມື່ອ​ເວົ້າ​ເຖິງ​ບັນຫາ​ນີວ​ເຄລຍ​ອີ​ຣານ​ນັ້ນ ປະທານາທິບໍດີ ມາກ​ຣົງ ໃຫ້​ຮູ້​ວ່າ ຝ່າຍ​ຕ່າງໆ​ເຫັນ​ດີ​ເປັນ​ເອກະສັນ​ກັນ ກ່ຽວ​ກັບ​ສອງ​ປະເດັນ​ທີ່​ສຳຄັນ ນັ້ນ​ກໍ​ຄື​ອີ​ຣານ​ບໍ່​ສາມາດ​ທີ່​ຈະ​ຄອບ​ຄອງ​ອາວຸດ​ນີວ​ເຄລຍ ແລະ ສະພາບ​ການ​ໃນ​ປັດຈຸບັນ ບໍ່​ອະນຸຍາດ​ໃຫ້​ຄຸກ​ຄາມ​ຄວາມ​ໝັ້ນຄົງ​ໃນ​ພາກ​ພື້ນ. ປະທານາທິບໍດີ ມາກ​ຣົງ ກໍ​ສະແດງ​ຄວາມ​ເຊື່ອ​ໝັ້ນ​ວ່າ ຖ້າ​ຫາ​ກວ່າ​ປະທານາທິບໍດີ​ອີ​ຣານ ​ຮັສ​ຊານ ຣູ​ຮາ​ນີ ເຫັນ​ດີ​ພົບ​ປະ​ກັບ​ປະທານາທິບໍດີ​ທຣຳ ກໍ​ແນ່ນອນ​ວ່າ​ສອງ​ຝ່າຍ​ຈະ​ບັນລຸ​ຂໍ້​ຕົກລົງ ພ້ອມ​ກັນ​ນັ້ນ​ກໍ​ຫວັງ​ວ່າ ການ​ພົບ​ປະ​ນັ້ນ​ຈະ​ມີ​ຂຶ້ນ​ໃນ​ເວລາ​ບໍ່​ພໍ​ເທົ່າໃດ​ອາທິດ​ຂ້າງ​ໜ້າ​ນີ້.

    ນອກຈາກ​ນັ້ນແລ້ວ ປະທານາທິບໍດີ ມາກ​ຣົງ ກໍ​ຢັ້ງຢືນ​ວ່າ​ໄດ້​ຕົກລົງ​ກັບ​ປະທານາທິບໍດີ ທຣຳ ກ່ຽວ​ກັບ​ຂໍ້​ຕົກລົງ​ເກັບ​ພາສີ​ກັບ​ບັນດາ​ບໍລິສັດ​ເຕັກ​ໂນ​ໂລ​ຊີ​ຂະໜາດ​ໃຫຍ່ ພ້ອມ​ທັງ​ໃຫ້​ຮູ້​ວ່າ ຝຣັ່ງ​ຈະ​ຍົກເລີກ​ພາສີ​ເຕັກນິກ​ດີ​ຈີ​ຕາ​​ລ​ນັ້ນ ໃນ​ເມື່ອ​ວ່າ​ກົດໝາຍ​ສາກົນ​ໄດ້​ຮັບ​ການ​ນຳ​ໃຊ້. ທ່ານ ມາກ​ຣົງ ກໍ​ໃຫ້​ຮູ້​ວ່າ ບັນດາ​ຜູ້ນຳ G7 ໄດ້​ເຫັນ​ດີ​ເປັນ​ເອກະສັນ​ກັນ ໃນ​ການ​ປ່ຽນແປງ​ບັນດາ​ຂໍ້​ກຳນົດ​ຂອງ​ອົງການ​ການ​ຄ້າ​ໂລກ (WTO).

    ທາງ​ດ້ານ​ປະທານາທິບໍດີ ທຣຳ ໃຫ້​ຮູ້​ວ່າ ຈະ​ເຊື່ອ​ເຊີນ​ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ໄປ​ຢ້ຽມຢາມ ໃນ​ເວລາ​ທີ່ ສ ອາ​ເມ​ຣິ​ກາ  ເປັນ​ເຈົ້າພາບ​ຈັດ​ກອງ​ປະຊຸມ G7 ໃນ​ປີໜ້າ. ໃນ​ຂະນະ​ດຽວ​ກັນ ທ່ານ ທຣຳ ກໍ​ໃຫ້​ຮູ້​ວ່າ ທ່ານ​ພ້ອມ​ທີ່​ຈະ​ພົບ​ປະ​ກັບ​ປະທານາທິບໍດີ​ຣູ​ຮາ​ນີ ຖ້າ​ຫາ​ກວ່າ​ມີ​ສະພາບ​ທີ່​ເໝາະ​ສົມ.

 

ຂ່າວທີ່ກ່ຽວຂ້ອງ