ຄ່າ​ຂອງ​ເງິນ​ຢວນ​ຕົກ​ສູ່​ລະດັບ​ຕ່ຳ​ສຸດ​ໃນ​ຮອບ 11 ປີ

360 28 ສ.ຫ. 2019 ຂ່າວຕ່າງປະເທດ
ຄ່າ​ຂອງ​ເງິນ​ຢວນ​ຕົກ​ສູ່​ລະດັບ​ຕ່ຳ​ສຸດ​ໃນ​ຮອບ 11 ປີ

    ວັນ​ທີ 26 ສິງຫາ​ນີ້ ຄ່າ​ເງິນ​ຢວນ ຂອງ​ຈີນ ໄດ້​ຕົກ​ສູ່​ລະດັບ​ຕ່ຳ​ສຸດ​ໃນ​ຮອບ 11 ປີ​ທີ່​ຜ່ານ​ມາ ທ່າມກາງ​ທີ່​ຄວາມ​ຂັດ​ແຍ່ງ​ທາງ​ດ້ານ​ການ​ຄ້າ ລະຫວ່າງ​ຈີນ ກັບ ສ ອາ​ເມ​ຣິ​ກາ ເພີ່ມ​ຂຶ້ນ ແລະ ຄວາມ​ສ່ຽງ​ເສດຖະກິດ​ຊຸດໂຊມ​ທົ່ວ​ໂລກ ເປັນ​ຜົນ​ກະທົບ​ຕໍ່​ຕະຫຼາດ​ແຫ່ງ​ຕ່າງໆ. ໃນ​ການ​ແລກປ່ຽນ​ເມື່ອ​ວັນ​ທີ 26 ສິງຫາ​ນີ້ ທີ່​ຕະຫຼາດ​ອາຊີ ເງິນ​ຢວນ​ແລກປ່ຽນ​ຢູ່​ທີ່​ລະດັບ 7,14 ຢວນ/1 ໂດ​ລາ​ສະຫະລັດ ນັບ​ວ່າ​ເປັນ​ລະດັບ​ຕ່ຳ​ສຸດ ນັບ​ແຕ່​ຕົ້ນ​ປີ 2008 ເປັນຕົ້ນ​ມາ.

    ເມື່ອ​ວັນ​ທີ 14 ສິງຫາ​ທີ່​ຜ່ານ​ມາ ທະນາຄານ​ປະຊາຊົນ​ຈີນ ຫຼື​ທະນາຄານ​ກາງ (PBoC)  ໄດ້​ສືບຕໍ່​ອັດ​ສີດ​ເງິນ​ເຂົ້າ​ສູ່​ລະບົບ​ການ​ເງິນ ໂດຍ​ຜ່ານ​ການເຄື່ອນໄຫວ​ຕະຫຼາດ​ເປີດ ເພື່ອ​ຮັກສາ​ການ​ຊຳລະ​ບັນຊີ​ຢູ່​ໃນ​ຕະຫຼາດ. PBoC ໄດ້​ອັດ​ສີດ​ເງິນ 100 ຕື້​ຢວນ (ເທົ່າ​ກັບ​ປະມານ 14 ຕື້​ໂດ​ລາ​ສະຫະລັດ) ໂດຍ​ຜ່ານ​ການ​ຕົກລົງ​ຂາຍ ແລະ ຊື້​ຄືນ​ພັນທະບັດ (repo) ດ້ວຍ​ກຳນົດ​ເວລາ 7 ວັນ ຊຶ່ງ​ຕາມ​ນັ້ນແລ້ວ ທະນາຄານ​ສູນ​ກາງ​ຈະ​ຊື້​ເອົາ​ພັນທະບັດ​ຂອງ​ທະນາຄານ​ຕ່າງໆ ໂດຍ​ຜ່ານ​ຂໍ້​ຕົກລົງ​ຂາຍ​ຄືນ​ດ້ວຍ​ອັດຕາ​ດອກ​ເບ້ຍ 2,55% ໃນ​ເວລາ​ທີ່​ໝົດ​ກຳນົດ.

    ໃນ​ບົດ​ລາຍ​ງານ​ກ່ຽວ​ກັບ​ນະໂຍບາຍ​ເງິນຕາ ປະຈຳ​ໄຕ​ມາດ 2 ທີ່​ຜ່ານ​ມາ PBoC ໃຫ້​ຮູ້​ວ່າ ຈີນ​ໃຫ້​ສັນຍາ​ຮັກສາ​ນະໂຍບາຍ​ເງິນຕາ​ທີ່​ມີ​ຄວາມ​ລະມັດລະວັງ ໂດຍ “ບໍ່​ເຄັ່ງ​ຄັດ​ເກີນ​ໄປ ທັງ​ບໍ່​ລະ​ຫຼວມ​ເກີນ​ໄປ” ແລະ ນຳ​ເອົາ​ການ​ດັດແກ້​ອອກ​ມາ​ຕາມ​ຮອບ​ວຽນ ຢ່າງ​ທັນ​ການ ແລະ ພໍ​ດ້າມ​ພໍດີ ພ້ອມ​ກັນ​ນັ້ນ​ກໍ​ຢືນຢັນ​ວ່າ ຈີນ​ຈະ​ບໍ່​ນຳ​ໃຊ້​ນະໂຍບາຍ​ກະ​ຕຸ້ນ​ແບບ​ຖັ່ງ​ເທ.

 

ຂ່າວທີ່ກ່ຽວຂ້ອງ