ອີ​ຣັກ ຜັນ​ຂະຫຍາຍ​ການ​ໂຈມ​ຕີ IS ​ໄລຍະ​ທີ 4

347 28 ສ.ຫ. 2019 ຂ່າວຕ່າງປະເທດ
ອີ​ຣັກ ຜັນ​ຂະຫຍາຍ​ການ​ໂຈມ​ຕີ IS ​ໄລຍະ​ທີ 4

    ສື່ສານ​ໃນ​ເຂດ​ຕາເວັນ​ອອກ​ກາງ ລາຍ​ງານ​ເມື່ອ​ວັນ​ທີ 24 ສິງຫາ​ນີ້​ວ່າ ໃນ​ວັນ​ດຽວ​ກັນ ກອງ​ກຳລັງ​ຮັກສາ​ຄວາມ​ສະຫງົບ​ຂອງ​ອີ​ຣັກ ໄດ້​ເລີ່ມ​ເປີດ​ບັ້ນ​ໂຈມ​ຕີ​ເປັນ​ໄລຍະ​ທີ 4 ໃນ​ການ​ຕາມ​ລ່າ​ຫາ​ພວກ​ແຕກ​ທັບ​ຂອງ​ອົງການ​ກໍ່​ການ​ຮ້າຍ ລັດ​ອິດ​ສະ​ລາມ (IS) ຢູ່​ໃນ​ເຂດ​ທະເລຊາຍ ທີ່​ຂຶ້ນ​ກັບ​ແຂວງ ອານ​ບາ (ພາກ​ຕາເວັນຕົກ​ປະເທດ​ອີ​ຣັກ).

    ແຈ້ງ​ການ​ຈາກ​ຫ້ອງການ​ສື່ສານ ທີ່​ຂຶ້ນ​ກັບ​ກອງ​ບັນຊາ​ການ​ບັ້ນ​ຮົບ​ປະສົມ (JOC) ໃຫ້​ຮູ້​ວ່າຕາມ​ການ​ຊີ້​ນຳ​ຂອງ​ນາຍົກລັດຖະມົນຕີ​ອີ​ຣັກ ອັບ​ແດລ ອັບ​ດູ​​ລ ມາ​ດີ ຜູ້​ທີ່​ທັງ​ເປັນ​ຜູ້​ບັນຊາ​ການ​ສູງ​ສຸດ ຂອງ​ກອງ​ກຳລັງ​ປະກອບ​ອາວຸດ​ອີ​ຣັກ ນັ້ນ ບັນດາ​ກອງ​ກຳລັງ​ຂອງ​ລັດຖະບານ​ອີ​ຣັກ ກໍ​ໄດ້​ຜັນ​ຂະຫຍາຍ​ການ​ໂຈມ​ຕີ​ທີ່​ໃສ່​ຊື່ວ່າ "Victory Will" ຕັ້ງແຕ່​ເວລາ​ຮຸ່ງ​ເຊົ້າ​ຂອງ​ວັນ​ທີ 24 ສິງຫາ ເພື່ອ​ກວດ​ລ້າງ​ພວກ​ມື​ປືນ IS ຢູ່​ໃນ​ເຂດ​ທະ​​ເລ​ຊາຍ ແລະ ເຂດ​ອື່ນໆ ທີ່​ຂຶ້ນ​ກັບ​ແຂວງ​ອານ​ບາ.

    JOC ໃຫ້​ຮູ້​ຕື່ມ​ວ່າ ກອງ​ກຳລັງ​ປະສົມ ປະກອບ​ມີ​ກອງທັບ ຕຳຫຼວດ ແລະ ບັນດາ​ກົມ​ກອງ​ເຄິ່ງ​ການ​ທະຫານ ໄດ້​ປະສານ​ສົມທົບ​ກັນ​ໃນ​ການ​ຜັນ​ຂະຫຍາຍ​ບັ້ນ​ຮົບ​ດັ່ງກ່າວ ດ້ວຍ​ການ​ໜູນ​ຊ່ວຍ​ຂອງ​ກອງ​ກຳລັງ​ທະຫານ​ອາກາດ​ອີ​ຣັກ ແລະ ບັນດາ​ເຮືອບິນ​ຂອງ​ກອງ​ກຳລັງ​ປະສົມ​ສາກົນ​ຕ້ານ IS ອັນ​ມີ ສ ອາ​ເມ​ຣິ​ກາ​ເປັນ​ແກນ​ນຳ.

    ກ່ອນ​ໜ້າ​ນັ້ນ ເມື່ອ​ຕົ້ນ​ເດືອນ​ສິງຫາ​ທີ່​ຜ່ານ​ມາ ກອງ​ກຳລັງ​ຂອງ​ອີ​ຣັກ ກໍ​ໄດ້​ຜັນ​ຂະຫຍາຍ​ການ​ໂຈມ​ຕີ​ໄລຍະ​ທີ 3 ເພື່ອ​ຕາມ​ລ່າ​ມີ​ປືນ IS ຢູ່​ທາງ​ພາກ​ເໜືອ ແລະ ພາກ​ຕາເວັນ​ອອກ​ຂອງ​ອີ​ຣັກ.

 

ຂ່າວທີ່ກ່ຽວຂ້ອງ