ເງິນ​ເຟີ້​ຂອງ​ສິງ​ກະ​ໂປ ​ແຕະ​ລະດັບ​ຕ່ຳ​ສຸດ​ໃນ​ຮອບ​ສາມ​ປີຜ່ານມາ

428 28 ສ.ຫ. 2019 ຂ່າວຕ່າງປະເທດ
ເງິນ​ເຟີ້​ຂອງ​ສິງ​ກະ​ໂປ ​ແຕະ​ລະດັບ​ຕ່ຳ​ສຸດ​ໃນ​ຮອບ​ສາມ​ປີຜ່ານມາ

    ແຈ້ງ​ການ​ຂອງ​ກະຊວງ​ການ​ຄ້າ ແລະ ອຸດສາຫະກຳ (MTI) ແລະ ອົງການ​ຄຸ້ມ​ຄອງ​ເງິນຕາ​ຂອງ​ສິງກະໂປ (ທະນາຄານ​ກາງ - MAS) ທີ່​ມີ​ອອກ​ມາ​ເມື່ອ​ວັນ​ທີ 23 ສິງຫາ​ທີ່​ຜ່ານ​ມາ ໃຫ້​ຮູ້​ວ່າ ລະດັບ​ເງິນ​ເຟີ້​ພື້ນຖານ​ຂອງ​ສິງກະໂປ ໃນ​ເດືອນ​ກໍລະກົດ​ທີ່​ຜ່ານ​ມາ ຢູ່​ທີ່​ລະດັບ​ຕ່ຳ​ສຸດ​ໃນ​ຮອບ​ສາມ​ປີ​ທີ່​ຜ່ານ​ມາ ແລະ ຢູ່​ຕ່ຳ​ກວ່າ​ລະດັບ​ຄາດ​ຄະເນ​ຂອງ​ບັນດາ​ນັກ​ເສດຖະສາດ.

    ເງິນ​ເຟີ້​ພື້ນຖານ​ຢູ່​ໃນ​ສິງກະໂປ ໂດຍ​ບໍ່​ລວມ​ເຖິງ​ຄ່າ​ໃຊ້​ຈ່າຍ​ໃນ​ການ​ເດີນທາງ​ໄປ​ມາ ແລະ ບ່ອນຢູ່​ຂອງ​ເອກະ​ຊົນ ນັ້ນ​ໄດ້​ຫຼຸດ​ລົງ​ໄປ​ຍັງ​ເຫຼືອ 0,8% ໃນ​ເດືອນ​ກໍລະກົດ​ປີ​ນີ້. ລະດັບ​ເງິນ​ເຟີ້​ລວມ​ຢູ່​ໃນ​ເດືອນ​ກໍລະກົດ ແມ່ນ​ຢູ່​ທີ່ 0,4% ນັບ​ວ່າ​ຫຼຸດ​ລົງ​ເມື່ອ​ທຽບໃສ່ 0,6% ໃນ​ເດືອນ​ມິຖຸນາ.

    ໃນ​ເດືອນ​ກໍລະກົດ ລາຄາ​ບັນດາ​ສິນຄ້າ​ຂາຍຍ່ອຍ ຫຼຸດ​ລົງ 1% ເມື່ອ​ທຽບໃສ່​ເດືອນ​ດຽວ​ກັນ​ຂອງ​ປີ​ກາຍ ກົງກັນຂ້າມ​ກັບ​ລະດັບ​ເພີ່ມ​ຂຶ້ນ 0,4% ໃນ​ເດືອນ​ມິຖຸນາ. ໃນ​ຂະນະ​ດຽວ​ກັນ ຄ່າ​ໃຊ້​ຈ່າຍ​ໃຫ້​ແກ່​ໄຟຟ້າ ແລະ ແກ​​ັສ ໄດ້​ຫຼຸດ​ລົງ 7% ເມື່ອ​ທຽບໃສ່​ປີ​ກາຍ.

ເງິນ​ເຟີ້​ຢູ່​ໃນ​ຂົງເຂດ​ການ​ບໍລິການ ໃນ​ເດືອນ​ກໍລະກົດ ຢູ່​ທີ່​ລະດັບ 1,6% ຫຼຸດ​ລົງ​ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ​ກາຍ ແລະ ຫຼຸດ​ລົງ​ໜ້ອຍ​ໜຶ່ງ ເມື່ອ​ທຽບໃສ່​ຕົວ​ເລກ 1,7% ໃນ​ເ​ດື​​ອນ​ມິ​ຖຸ​​ນາ ທັງ​ນີ້​ກໍ​ເພາະວ່າ​ການ​ບໍລິການ​ດ້ານ​ໂທລະ​ຄົມມະນາຄົມ ຫຼຸດ​ລົງ​ຢ່າງ​ແຮງ. ສ່ວນ​ລາຄາ​ສະບຽງ​ອາຫານ ມີ​ລະດັບ​ເພີ່ມ​ຂຶ້ນ 1,4% ບໍ່​ມີ​ການ​ປ່ຽນແປງ​ເມື່ອ​ທຽບໃສ່​ເດືອນ​ມິຖຸນາ.

    ບັນດາ​ຕົວ​ເລກ​ເງິນ​ເຟີ້​ຂອງ​ສິງກະໂປ ໃນ​ເດືອນ​ກໍລະກົດ ຕ່ຳ​ກວ່າ​ສິ່ງ​ທີ່ ບລຸມ​ເບີກ (Bloomberg) ໄດ້​ຄາດ​ຄະເນ​ໄວ້​ກ່ອນ​ໜ້າ​ນີ້ ຊຶ່ງ​ບັນດາ​ນັກ​ວິເຄາະ​ຂອງ Bloomberg ໃຫ້​ຮູ້​ວ່າ ລະດັບ​ເງິນ​ເຟີ້​ລວມ​ຂອງ​ສິງກະໂປ ໃນ​ເດືອນ​ກໍລະກົດ ຢູ່​ທີ່ 0,5% ແລະ ເງິນ​ເຟີ້​ພື້ນຖານ​ຢູ່​ທີ່ 1%.

    ເມື່ອ​ຕົ້ນ​ເດືອນ​ສິງຫາ​ນີ້ ສິງກະໂປ​ໄດ້​ປັບ​ຫຼຸດ​ການ​ຄາດ​ຄະເນ​ຄວາມ​ເຕີບ​ໂຕ​ເສດຖະກິດ​ໃນ​ປີ​ນີ້​ລົງ​ແຕ່ 0-1% ໄປ​ຍັງ​ເຫຼືອ​ທີ່ 1,5-2,5% ແລະ ຄາດ​ຄະເນ​ສິນຄ້າ​ສົ່ງ​ອອກ​ປະເພດ​ຕ່າງໆ ທີ່​ບໍ່​ແມ່ນ​ນ້ຳມັນ ຈະ​ເຕີບ​ໂຕ​ໃນ​ແດນ​ລົບ ແຕ່ -9% ຫາ -8%.

 

ຂ່າວທີ່ກ່ຽວຂ້ອງ