ທີມຄູ່ສາວລາວ ໄດ້ຫຼຽນເງິນ ກະຕໍ້ຊີງແຊັມໂລກ ທີ່ປະເທດໄທ

227 29 ສ.ຫ. 2019 ວົງຈອນກີລາ
ທີມຄູ່ສາວລາວ ໄດ້ຫຼຽນເງິນ ກະຕໍ້ຊີງແຊັມໂລກ ທີ່ປະເທດໄທ

    ທ່ານ ສູນ​ທອນ ຄຳ​ສານ ຫົວ­ໜ້າ​ຄູ​ເຝິກ​ກີ­ລາ​ກະ­ຕໍ້​ຍິງ​ທີມ​ຊາດ​ລາວ ແຈ້ງ​ໃຫ້​ຊາບ​ວ່າ: ການ​ແຂ່ງ­ຂັນ​ກະ­ຕໍ້ ລະ­ດັບ​ສູງ​ສຸດ ຫຼື ພຣີ​ເມຍ ຄູ່​ຊີງ​ຊະ­ນະ​ເລີດ​ປະ­ເພດ​ທີມ​ຄູ່​ຍິງ ລາຍ­ການ ຊີງ​ແຊັມ​ໂລກ (King's Cup Sepaktakraw World Championship) ຄັ້ງ​ທີ 34 ຊີງ​ຂັນ​ເຈົ້າ​ຊີ­ວິດ​ໄທ ເມື່ອ​ວັນ​ທີ 27 ສິງ­ຫາ 2019 ທີ່​ສູນ​ການ​ຄ້າ ແຟ​ຊັ່ນ ໄອ​ແລນ ນະ­ຄອນ­ຫຼວງ​ບາງ­ກອກ ຣາ​ຊະ​ອາ­ນາ­ຈັກ​ໄທ ໂດຍ​ທີມ​ຄູ່​ສາວ​ລາວ ໃນ​ຖາ­ນະ​ແຊັມ​ເກົ່າ ພົບ​ກັບ ສາວ​ທີມ​ຊາດ​ມຽນ​ມາ ໂດຍ​ລາຍ­ການ​ດັ່ງ­ກ່າວ ບໍ່​ມີ​ທີມ​ຄູ່​ຍິງ-ຊາຍ​ທີມ​ຊາດ​ໄທ ສົ່ງ​ເຂົ້າ​ຮ່ວມ.

    ຜ່ານ​ການ​ແຂ່ງ­ຂັນ​ຜົນ​ປະ­ກົດ​ວ່າ: ທີມ​ສາວ​ລາວ ຕ້ອງ​ມາ​ພົບ​ກັບ​ຂ່າວ​ຮ້າຍ ເມື່ອ ກ້ອຍ ໄຊ​ຍະ​ວົງ ນັກ​ເຕະ​ຕົວ​ຫຼັກ​ມີ​ອາ­ການ​ບາດ­ເຈັບ​ກ້າມ­ຊີ້ນ​ຂາ​ຕຶງ ແຕ່​ກໍ​ຝືນ​ສູ້​ສຸດ​ຂີດ ສຸດ​ທ້າຍ​ຕ້ານ​ຄວາມ​ແຂງ​ແກ່ນ ສາວ ມຽນ​ມາ ບໍ່​ໄຫວ ເສຍ 0-2 ເຊັດ 13-21 ແລະ 18-21 ຄະ­ແນນ ໄດ້​ພຽງ​ຫຼຽນ​ເງິນ​ມາ​ຄ້ອງ​ຄໍ ສ່ວນ​ຫຼຽນ​ທອງ​ຮ່ວມ ຕົກ​ເປັນ​ຂອງ ສ ເກົາ­ຫຼີ ແລະ ອິນ​ໂດ​ເນ​ເຊຍ ຂະ­ນະ​ທີ່​ປະ­ເພດ​ຄູ່​ຊາຍ ທີມ​ຊາດ​ລາວ ໃນ​ຖາ­ນະ​ເປັນ​ແຊັມ​ເກົ່າ​ເຊັ່ນ​ກັນ ກໍ​ຕົກ​ຮອບ 4 ທີມ​ສຸດ​ທ້າຍ ເສຍ​ໃຫ້ ສ ເກົາ­ຫຼີ ຫວຸດ​ຫວິດ 1-2 ເຊັດ ດ້ວຍ​ຄະ­ແນນ 19-21 21-16 ແລະ 14-21 ຄະ­ແນນ ໄດ້​ພຽງ​ຫຼຽນ​ທອງ​ຮ່ວມ​ກັບ ມາ​ເລ​ເຊຍ ສ່ວນ​ຫຼຽນ​ຄຳ ຕົກ​ເປັນ​ຂອງ ມຽນ​ມາ ແລະ ຫຼຽນ​ເງິນ​ແມ່ນ ສ ເກົາ­ຫຼີ ສົ່ງ​ຜົນ​ໃຫ້​ປີ​ນີ້ ມຽນ​ມາ ມາ​ແຮງ ສາ­ມາດ​ຄວ້າ​ແຊ໋ມ​ຫຼຽນ​ຄຳ ໄດ້​ທັງ​ທີມ​ຄູ່​ຍິງ ແລະ ຄູ່​ຊາຍ.

    ປັດ­ຈຸ­ບັນ ທັບ​ນັກ­ກີ­ລາ​ກະ­ຕໍ້​ທີມ​ຊາດ​ລາວ ທັງ​ຍິງ ແລະ ທີມ​ຊາຍ ຍັງ​ມີ​ຄວາມ​ຫວັງ​ໃນ​ການ​ລົງ​ແຂ່ງ­ຂັນ​ອີກ 1 ລາຍ­ການ ຈາກ​ປະ­ເພດ​ທີມ​ຊຸດ​ຍິງ-ຊາຍ ສ່ວນ​ຜົນ­ງານ​ຈະ​ເປັນ​ແນວ­ໃດ​ນັ້ນ ຈະ​ຂໍ​ລາຍ​ງານ​ໃຫ້​ບັນ­ດາ​ທ່ານ​ໄດ້​ຊາບ​ຕື່ມ​ອີກ ສຳ­ລັບ​ການ​ແຂ່ງ­ຂັນ​ລາຍ­ການ​ດັ່ງ­ກ່າວ ໄດ້​ດຳ­ເນີນ​ລະ­ຫວ່າງ​ວັນ​ທີ 25 ສິງ­ຫາ ຫາ 1 ກັນ­ຍາ 2019 ມີ 31 ປະ­ເທດ​ໃນ​ທົ່ວ​ໂລກ ມີ 8 ລາຍ­ການ ປະ­ກອບ​ມີ ປະ­ເພດ​ທີມ​ຄູ່​ຍິງ-ຊາຍ ທີມ​ຊຸດ​ຍິງ-ຊາຍ ທີມ​ດ່ຽວ​ຍິງ-ຊາຍ ແລະ ກະ­ຕໍ້​ລອດ​ຮ້ວງ​ຍິງ-ຊາຍ ໃນ​ນີ້ ທຸກ​ຊາດ​ທີ່​ສົ່ງ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ ກຳ­ນົດ​ໃຫ້​ສົ່ງ​ຊາດ​ລະ 3 ລາຍ­ການ.

    ສະ­ເພາະ ສປປ ລາວ ສົ່ງ​ເຂົ້າ​ຮ່ວມ​ແຂ່ງ­ຂັນ​ທັງ​ໝົດ 34 ຄົນ ຍິງ 16 ຄົນ ແລະ ຊາຍ 18 ຄົນ ເຂົ້າ​ຮ່ວມ​ແຂ່ງ­ຂັນ 3 ລາຍ­ການ ຄື: ປະ­ເພດ​ທີມ​ຊຸດ​ຍິງ-ຊາຍ ທີມ​ຄູ່​ຍິງ-ຊາຍ ແລະ ກະ­ຕໍ້​ລອດ​ບ້ວງ​ຍິງ-ຊາຍ ໂດຍ​ຜົນ­ງານ​ຫຼ້າ​ສຸດ ສາ­ມາດ​ຍາດ​ໄດ້ 1 ຫຼຽນ​ເງິນ ຈາກ​ທີມ​ຄູ່​ຍິງ 1 ຫຼຽນ​ທອງ​ຈາກ ທີມ​ຄູ່​ຊາຍ ສ່ວນ​ກະ­ຕໍ້​ລອດ​ບ້ວງ ຕົກ​ຮອບ​ທັງ​ຍິງ-ຊາຍ ຍັງ​ເຫຼືອ​ຄວາມ​ຫວັງ​ໄວ້​ພຽງ​ປະ­ເພດ​ທີມ​ຊຸດ​ຍິງ-ຊາຍ.

ຂ່າວທີ່ກ່ຽວຂ້ອງ