ເບິ່ງບ້ານເຂົາເອົາບົດຮຽນ 29-08-2019

624 29 ສ.ຫ. 2019 ຫົວຂໍ້ຂ່າວອື່ນໆ

    ມື້­ນີ້ ມີ 3 ເລື່ອງ​ທີ່​ຄວນ​ເບິ່ງ​ໄວ້​ເປັນ​ບົດ­ຮຽນ ເຊັ່ນ: ຄຳ​ສັ່ງ​ຫ້າມ​ບໍ­ລິ­ໂພກ​ຊີ້ນ​ໝາ-ແມວ ຢູ່​ເກາະ​ໄຕ້​ຫວັນ ເລື່ອງ​ການ​ນຳ​ໃຊ້​ແຮງ​ງານ​ເຖົ້າ ຢູ່​ຍີ່­ປຸ່ນ ແລະ ທັດ​ສະ​ນຳ​ຂອງ​ອົງ­ການ ສປຊ ກ່ຽວ​ກັບ​ປັດ​ໄຈ​ທີ່​ກໍ່­ໃຫ້­ເກີດ​ມີ​ການ​ໃຊ້​ວາ­ຈາ ເພື່ອ​ສ້າງ​ຄວາມ​ກຽດ​ຊັງ​ໃນ​ສັງ­ຄົມ​ໂລກ​ປັດ­ຈຸ­ບັນ.

    ທີ່​ເກາະ​ໄຕ້​ຫວັນ: ມີ​ຂ່າວ​ເມື່ອ​ສອງ​ປີ​ກ່ອນ​ໜ້າ​ນີ້​ວ່າ ລັດ​ຖະ​ສະ­ພາ​ຂອງ​ເກາະ​ໄຕ້​ຫວັນ ໄດ້​ອອກ​ກົດ­ໝາຍ​ຫ້າມ​ບໍ​ລິ ໂພກ ຊື້ ຫຼື ມີ​ໄວ້​ໃນ​ຄອບ​ຄອງ ຊີ້ນ​ໝາ ແລະ ຊີ້ນ​ແມວ ພ້ອມ​ທັງ​ໄດ້​ກຳ­ນົດ​ໂທດ​ຕໍ່​ຜູ້​ລະ­ເມີດ ດ້ວຍ​ການ​ປັບ​ໃໝ​ສູງ​ສຸດ 250.000 ໂດ​ລາ​ໄຕ້​ຫວັນ (ປະ­ມານ 8.000 ໂດ​ລາ​ສະ­ຫະ­ລັດ) ນອກ­ຈາກ​ນັ້ນ ກົດ­ໝາຍ​ຍັງ​ໄດ້​ກຳ­ນົດ​ໂທດ​ຕໍ່​ຜູ້​ທໍ­ລະ­ມານ​ສັດ ດ້ວຍ​ໂທດ​ຈຳ​ຄຸກ​ສູງ​ສຸດ 2 ປີ ແລະ ປັບ​ໃໝ​ສູງ​ສຸດ 2 ລ້ານ​ໂດ​ລາ​ໄຕ້​ຫວັນ ເຊັ່ນ​ດຽວ​ກັບ​ບາງ​ປະ­ເທດ​ໃນ​ອາ­ຊີ ຊາວ​ໄຕ້​ຫວັນ ນິ­ຍົມ​ບໍ­ລິ­ໂພກ​ຊີ້ນ​ໝາ ແຕ່­ໃດໆ​ມາ ແຕ່​ໃນ​ປັດ­ຈຸ­ບັນ ລົດ​ນິ­ຍົມ​ດັ່ງ­ກ່າວ​ໄດ້​ບົກ­ບາງ​ລົງ​ຫຼາຍ ແນວ­ໃດ​ກໍ​ດີ ຂ່າວ​ບອກ​ວ່າ ການ​ຈັບ​ກຸມ​ເຈົ້າ​ຂອງ​ຮ້ານ​ທີ່​ລັກ­ລອບ​ຂາຍ​ຊີ້ນ​ໝາ​ກໍ​ຍັງ​ເກີດ​ຂຶ້ນ​ເປັນ​ບາງ​ຄັ້ງ​ໃນ​ຊຸມ​ປີ​ຫຼັງໆ​ມາ​ນີ້ ຍ້ອນ​ແນວ​ນີ້​ເອງ ຈຶ່ງ​ມີ​ຫາງ​ສຽງ​ຂອງ​ສັງ­ຄົມ​ຮຽກ­ຮ້ອງ​ໃຫ້​ທາງ​ການ​ເອົາ​ມາດ​ຕະ­ການ​ຈິງ​ຈັງ ເພື່ອ​ປາບ​ປາມ​ການ​ຄ້າ­ຂາຍ ແລະ ບໍ­ລິ­ໂພກ​ຊີ້ນ​ໝາ-ແມວ​ໃຫ້​ຊິ້ນ​ຊາກ​ໄປ.

    ທີ່​ຍີ່­ປຸ່ນ: ໃນ​ໄລ­ຍະ​ຫຼັງໆ​ມາ​ນີ້ ບັນ­ຫາ​ການ​ຂາດ­ແຄນ​ແຮງ​ງານ ຢູ່​ຍີ່­ປຸ່ນ ໄດ້​ກາຍ­ເປັນ​ຂ່າວ​ທີ່​ທະ­ຍອຍ​ອອກ​ມາ​ຢ່າງ​ຕໍ່​ເນື່ອງ ພ້ອມ​ກັບ​ຂ່າວ​ກ່ຽວ​ກັບ​ມາດ​ຕະ­ການ​ອັນ​ຈຳ­ເປັນ ເພື່ອ​ແກ້​ໄຂ​ບັນ­ຫາ​ຂາດ­ແຄນ​ດັ່ງ­ກ່າວ ຂ່າວ​ໜັງ­ສື­ພິມ​ວຽງ​ຈັນ​ທາມ (27 ເມ­ສາ 2015) ໄດ້​ໃຫ້​ຮູ້​ວ່າ ມີ​ຫຼາຍໆ​ບໍ­ລິ­ສັດ​ໃນ​ຍີ່­ປຸ່ນ ທີ່​ສືບ­ຕໍ່​ນຳ​ໃຊ້​ແຮງ​ງານ​ເຖົ້າ​ທີ່​ມີ​ອາ­ຍຸ​ເລີຍ 65 ປີ ແຮງ​ງານ​ເຖົ້າ​ທີ່​ຫຼາຍ​ບໍ­ລິ­ສັດ​ສືບ­ຕໍ່​ຈ້າງ​ງານ​ນັ້ນ ແມ່ນ​ຜູ້​ທີ່​ມີ​ປະ­ສົບ​ການ​ໃນ​ວິ­ຊາ​ຊີບ​ສູງ ແລະ ມີ​ເຄືອ​ຄ່າຍ​ການ​ພົວ­ພັນ​ຢ່າງ​ກວ້າງ­ຂວາງ ນັບ​ແຕ່​ເດືອນ​ເມ­ສາ 2015 ບໍ­ລິ­ສັດ​ໄຕ​ວະ ທີ່​ເປັນ​ເຈົ້າ​ຂອງ​ອຸດ­ສາ­ຫະ­ກຳ​ປຸກ​ສ້າງ​ເຮືອນ​ຢູ່ ໄດ້​ຮັບ­ຮອງ​ເອົາ​ລະ­ບົບ​ການ​ຈ້າງ​ງານ​ໃໝ່ ໂດຍ​ບໍ່​ມີ​ການ​ກຳ­ນົດ​ໄວ​ເຂົ້າ​ບຳ­ນານ​ຄື​ຄົນ​ງານ​ທີ່​ມີ​ອາ­ຍຸ 65 ປີ ຫຼື ສູງ​ກວ່າ​ນັ້ນ ສາ­ມາດ​ສືບ­ຕໍ່​ເຮັດ​ວຽກ​ແບບ​ເຄິ່ງ​ເວ­ລາ (ພາດ​ທາມ) ໂດຍ​ມີ​ກຳ­ນົດ​ການ​ເຮັດ​ວຽກ 4 ວັນ​ຕໍ່​ອາ­ທິດ ດ້ວຍ​ເພ­ດານ​ເງິນ­ເດືອນ 200.000/ເດືອນ (ເທົ່າ​ກັບ 1.673 ໂດ​ລາ​ສະ­ຫະ­ລັດ ຫຼື ກວ່າ 16 ລ້ານ​ກີບ) ບອກ​ກັບ​ເງິນ​ສິນ​ນ້ຳ­ໃຈ (ໂບ​ນັດ-bonus) ໃນ​ຈຳ­ນວນ​ເຄິ່ງ​ໜຶ່ງ​ຂອງ​ຜູ້​ອອກ­ແຮງ​ງານ​ເຕັມ​ເວ­ລາ​ຕາມ​ປົກ­ກະ­ຕິ​ໄດ້​ຮັບ​ໃນ​ເດືອນ​ມີ­ນາ 2015 ບໍ­ລິ­ສັດ ໄຕ​ວະ ມີ­ແຮງ​ງານ​ເຖົ້າ ໄວ​ເຂົ້າ​ບຳ­ນານ ຈຳ­ນວນ 30 ຄົນ ແລະ ທາງ​ບໍ­ລິ­ສັດ​ໄດ້​ຮັບ​ເອົາ ສືບ­ຕໍ່​ເຮັດ​ວຽກ​ຈຳ­ນວນ 9 ຄົນ ສ່ວນ​ບໍ­ລິ­ສັດ​ທັດ​ສະ​ໂກ ນາ​ກາ​ຢາ​ມະ ທີ່​ຜະ­ລິດ​ເຄື່ອງ­ມື​ກົນ​ຈັກ​ນັ້ນ ໄດ້​ປັບ​ຂຶ້ນ​ອາ­ຍຸ​ເຂົ້າ​ບຳ­ນານ​ຂອງ​ແຮງ​ງານ​ຈາກ 63 ປີ ເປັນ 65 ປີ ແລະ ມີ​ກຳ­ນົດ​ນຳ​ໃຊ້​ແຮງ​ງານ​ຫຼັງ​ເຂົ້າ​ບຳ­ນານ ແຕ່​ອາ­ຍຸ 65-70 ປີ ເປົ້າ​ໝາຍ​ຂອງ​ທາງ​ບໍ­ລິ­ສັດ​ແມ່ນ​ເພື່ອ​ສົ່ງ­ເສີມ​ກຳ­ລັງ​ໃຈ​ຂອງ​ຜູ້​ອອກ­ແຮງ​ງານ​ໃນ​ວິ­ຊາ​ຊີບ​ຂອງ​ພວກ​ເຂົາ­ເຈົ້າ.

    ທີ່​ອົງ­ການ​ສະ­ຫະ​ປະ­ຊາ​ຊາດ: ມີ​ຂ່າວ​ຈາກ​ອົງ­ການ​ສະ­ຫະ​ປະ­ຊາ​ຊາດ (ສປຊ) ວ່າ ທ່ານ ກູ​ເຕ​ເຣັດ (Guterres) ເລ­ຂາ­ທິ­ການ​ໃຫຍ່​ອົງ­ການ ສປຊ ໄດ້​ປະ­ກາດ​ເປີດ​ບັ້ນ​ດຳ­ເນີນ​ຍຸດ​ທະ​ສາດ ແລະ ແຜນ​ປະ­ຕິ­ບັດ​ງານ ເພື່ອ​ຕ້ານ​ວາ­ຈາ​ທີ່​ສ້າງ​ຄວາມ​ລັງ​ກຽດ​ຄຽດ​ຊັງ​ຜ່ານ​ສື່­ສານ​ສັງ­ຄົມ ຈຸດ​ສຳ­ຄັນ​ໜຶ່ງ​ໃນ​ຄຳ​ເຫັນ​ຂອງ​ທ່ານ​ເລ­ຂາ­ທິ­ການ​ໃຫຍ່ ໃນ​ພິ­ທີ​ເປີດ​ບັ້ນ​ດັ່ງ­ກ່າວ ໄດ້​ເວົ້າ​ວ່າ ໃນ 75 ປີ­ຜ່ານ­ມາ ວາ­ຈາ ຫຼື ຄຳ​ເວົ້າ​ທີ່​ສ້າງ​ຄວາມ​ລັງ​ກຽດ​ຄຽດ​ຊັງ​ໃນ​ສັງ­ຄົມ ໄດ້​ກາຍ­ເປັນ​ຕົ້ນ​ກຳ­ເນີດ​ອາ​ຊະ​ຍາ​ກຳ​ຕ່າງໆ ເຊັ່ນ ການ​ຂ້າ​ລ້າງ​ເຜົ່າ​ພັນ ຢູ່​ປະ­ເທດ​ຮວນ​ດາ ກຳ­ປູ­ເຈຍ ແລະ ຫວ່າງ​ບໍ່​ດົນ​ມາ​ນີ້ ກໍ​ແມ່ນ​ເຫດ­ການ​ກວາດ​ຍິງ​ຢູ່​ຫຼາຍໆ​ພາກ​ພື້ນ​ຂອງ​ໂລກ ລວມ​ທັງ​ຢູ່​ສີ​ລັງ­ກາ ນິວ​ຊີ​ແລນ ແລະ ສະ­ຫະ­ລັດ​ອາ​ເມ​ຣິ​ກາ ທ່ານ​ເລ­ຂາ­ທິ­ການ​ໃຫຍ່​ບອກ​ວ່າ ເປົ້າ​ໝາຍ​ຂອງ​ແຜນ​ປະ­ຕິ­ບັດ​ງານ​ຕ້ານ​ວາ­ຈາ​ທີ່​ກໍ່​ຄວາມ​ລັງ​ກຽດ ຄຽດ​ຊັງ ແມ່ນ​ເພື່ອ​ກຳ­ຈັດ​ບັນ­ຫາ​ຮາກ​ເຫງົ້າ​ຂອງ​ມັນ ເຊັ່ນ: ການ​ໃຊ້​ຄວາມ​ຮຸນ​ແຮງ ບັນ­ຫາ​ຊ່ອງ​ຫວ່າງ​ການ​ດ້ານ​ໂອ­ກາດ ການ​ຈຳ­ແນກ ຄວາມ­ທຸກ​ຍາກ ການ​ບໍ່​ມີ​ສ່ວນ​ຮ່ວມ ຄວາມ​ບໍ່​ສະ­ເໝີ­ພາບ ສະ­ພາບ​ຂາດ​ການ​ສຶກ​ສາ​ຂັ້ນ​ພື້ນ­ຖານ ແລະ ສະ­ພາບ​ອ່ອນ­ແອ​ຂອງ​ລະ­ບົບ​ປົກ­ຄອງ.

ຂ່າວທີ່ກ່ຽວຂ້ອງ