ຂ່າວຫຼ້າສຸດ

ການຊ່ວງເສັງທີ່ອັນຕະລາຍ

4.544 30 ສ.ຫ. 2019 ນານາສາລະ

    ຈຸດ​ຮ້ອນ​ທີ່​ເກີດ​ຂຶ້ນ​ໃນ​ໂລກ​ມີ​ຫຼາຍ​ຢ່າງ ເປັນ­ຕົ້ນ ແມ່ນ​ສົງ­ຄາມ​ການ​ຄ້າ​ໂລກ​ລະ­ຫວ່າງ​ສອງ​ມະ­ຫາ​ອຳ­ນາດ​ໂລກ ຄື: ສະ­ຫະ­ລັດ​ອາ​ເມ​ຣິ​ກາ ແລະ ສປ ຈີນ ໄດ້­ແກ່​ຍາວ​ມາ​ບໍ່​ຮູ້​ວ່າ​ຈະ​ລົງ​ເອີຍ​ແບບ​ໃດ ?.

    ໃນ​ຂະ­ນະ​ດຽວ​ກັນ ຈຸດ​ຮ້ອນ​ທີ່​ທົ່ວ​ໂລກ​ໃຫ້​ຄວາມ​ວິ­ຕົກ​ກັງ­ວົນ​ນັ້ນ ກໍ​ຄື ການ​ຊ່ວງ​ເສັງ​ປະ­ກອບ​ກຳ­ລັງ​ອາ­ວຸດ ລະ­ຫວ່າງ ອາ​ເມ​ຣິ​ກາ ແລະ ຣັດ​ເຊຍ ພາຍ­ຫຼັງ​ທີ່​ທັງ​ສອງ​ປະ­ເທດ​ຖອນ​ຕົວ​ອອກ​ຈາກ​ສົນ­ທິ­ສັນ­ຍາ INF ໝາຍ​ເຖິງ​ການ​ຢຸດ­ຕິ​ສົນ­ທິ ສັນ­ຍາ​ດັ່ງ­ກ່າວ.

    ອີງ​ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ ໃຫ້​ຮູ້​ວ່າ: ທ່ານ ຈອນ ໂບນ​ຕັນ (John Bolton) ທີ່​ປຶກ­ສາ​ຄວາມ​ໝັ້ນ­ຄົງ​ແຫ່ງ​ຊາດ​ອາ​ເມ​ຣິ​ກາ ແຈ້ງ­ວ່າ: ອາ​ເມ​ຣິ​ກາ​ຈະ​ຖອນ​ຕົວ​ອອກ​ຈາກ INF ຕັ້ງ­ແຕ່​ວັນ​ທີ 2 ສິງ­ຫາ 2019 ເປັນ­ຕົ້ນ​ໄປ ໂດຍ​ໃຫ້​ເຫດ­ຜົນ​ວ່າ: ຝ່າຍ​ຣັດ​ເຊຍ​ບໍ່​ຟັງ​ຄຳ­ເຕືອນ​ເລື່ອງ​ພັດ­ທະ­ນາ​ອາ­ວຸດ​ນິວ​ເຄຼຍ​ຮຸ່ນ​ໃໝ່ SSC-8 ເຊິ່ງ​ເປັນ​ການ​ລະ­ເມີດ​ສົນ­ທິ­ສັນ­ຍາ INF ທີ່​ລົງ​ນາມ​ກັນ​ເມື່ອ​ປີ 1987 ບໍ່​ທໍ່​ນັ້ນ ອາ​ເມ​ຣິ​ກາ ຍັງ​ຈະ​ເບິ່ງ​ຄືນ​ຂໍ້​ຕົກ­ລົງ​ຄວບ​ຄຸມ​ອາ­ວຸດ​ນິວ​ເຄຼຍ​ໃໝ່ (New Start) ທີ່​ບໍ່​ທັນ​ສົມ­ບູນ​ແບບ ເຊິ່ງ​ຈະ​ໝົດ​ອາ­ຍຸ​ໃນ​ປີ 2021 ຄາດ​ວ່າ​ຈະ​ບໍ່​ມີ​ການ​ລົງ​ນາມ​ໃດໆ.

    ໃນ​ຂະ­ນະ​ດຽວ​ກັນ​ນັ້ນ ຝ່າຍ​ຣັດ​ເຊຍ ໂດຍ​ແມ່ນ​ປະ­ທາ­ນາ­ທິ­ບໍ­ດີ ປູ​ຕິນ ກໍ​ໄດ້​ລົງ​ນາມ​ໃຫ້​ສັດ­ຕະ­ຍາ­ບັນ​ຮ່າງ​ກົດ­ໝາຍ ວ່າ​ດ້ວຍ​ການ​ຢຸດ­ຕິ​ສົນ­ທິ­ສັນ­ຍາ INF ເຊັ່ນ​ກັນ ເຊິ່ງ​ຮ່າງ​ກົດ­ໝາຍ​ນີ້​ໄດ້​ຮັບ​ການ​ຮັບ­ຮອງ​ຈາກ​ສະ­ພາ​ດູ​ມາ (ສະ­ພາ​ຕ່ຳ) ແລະ ສະ­ພາ​ສະ­ຫະ­ພັນ (ສະ­ພາ​ສູງ) ຂອງ​ຣັດ​ເຊຍ​ແລ້ວ ຕັ້ງ­ແຕ່​ເດືອນ​ມິ­ຖຸ­ນາ​ຜ່ານ​ມາ ມາ​ຮອດ​ເດືອນ​ກໍ­ລະ­ກົດ ທ່ານ ປູ​ຕິນ ຈຶ່ງ​ລົງ​ນາມ.

    ເມື່ອ​ຫວນ​ຄືນ​ເຫດ­ການ​ຖອນ​ຕົວ​ອອກ​ຈາກ​ສົນ­ທິ­ສັນ­ຍາ INF ນີ້​ແມ່ນ​ຝ່າຍ ອາ​ເມ​ຣິ​ກາ ເລີ່ມ​ກ່ອນ ໂດຍ​ແມ່ນ​ທ່ານ ທຣຳ ແລະ ທ່ານ ໄມ ປອມ​ເປ​ໂອ ລັດ­ຖະ­ມົນ­ຕີ​ຕ່າງ­ປະ­ເທດ​ອາ​ເມ​ຣິ​ກາ ໃນ​ວັນ​ທີ 2 ກຸມ­ພາ 2019 ແລະ ບອກ​ວ່າ​ຈະ​ຢຸດ­ຕິ​ຢ່າງ​ເປັນ​ທາງ​ການ​ອີກ 6 ເດືອນ​ຂ້າງ​ໜ້າ ເຊິ່ງ​ກໍ​ເປັນ​ໄປ​ຕາມ​ການ​ຖະ­ແຫຼງ.

    ຜູ້​ສັງ­ເກດ​ການ​ໃຫ້​ທັດ­ສະ­ນະ​ວ່າ: ການ​ກ່າວ​ຫາ​ກັນ​ຂອງ​ຄູ່​ສົນ­ທິ­ສັນ­ຍາ INF ໄດ້​ກ້າວ​ໄປ​ເຖິງ​ການ​ຢຸດ­ຕິ​ນັ້ນ ເປັນ​ເຫດ­ການ​ທີ່​ຊາວ​ໂລກ​ໃຫ້​ຄວາມ​ກັງ­ວົນ​ໃຈ​ທີ່​ສຸດ ເພາະ​ຈາກ​ນີ້​ໄປ ທັງ​ສອງ​ມະ­ຫາ​ອຳ­ນາດ​ຈະ​ເພີ່ມ​ການ​ຜະ­ລິດ​ອາ­ວຸດ​ນິວ​ເຄຼຍ​ຮ້າຍ​ແຮງ​ຂຶ້ນ​ກວ່າ​ເກົ່າ ສະ­ນັ້ນ ຈຶ່ງ​ຮຽກ­ຮ້ອງ​ໃຫ້​ທັງ​ສອງ​ຝ່າຍ​ມີ​ມາດ​ຕະ­ການ​ຮີບ​ດ່ວນ ສ້າງ​ສົນ­ທິ­ສັນ­ຍາ​ໃດ​ໜຶ່ງ​ຂຶ້ນ​ມາ​ໃໝ່ ເພື່ອ​ຮອງ​ຮັບ​ໃຫ້​ແກ່​ການ​ຊ່ວງ​ເສັງ​ຜະ­ລິດ​ອາ­ວຸດ.

    INF ແມ່ນ​ຊື່​ຫຍໍ້​ຂອງ​ສົນ­ທິ­ສັນ­ຍາ (Intermediate Range Nuclear Forces) ເຊິ່ງ​ແມ່ນ​ສົນ­ທິ­ສັນ­ຍາ​ວ່າ​ດ້ວຍ​ການ​ກຳ­ຈັດ​ລູກ​ສອນ​ໄຟ​ຂະ­ໜາດ​ກາງ ແລະ ຂະ­ໜາດ​ໃກ້ (ແຕ່ 500 ຫາ 5.500 ກິ­ໂລ­ແມັດ) ໃນ​ສັນ­ຍາ​ທັງ​ສອງ​ຝ່າຍ​ຕົກ­ລົງ​ກັນ​ບໍ່​ຜະ­ລິດ ບໍ່​ທົດ​ລອງ ເຊິ່ງ​ການ​ນຳ​ຂອງ​ສະ­ຫະ­ລັດ​ອາ​ເມ​ຣິ​ກາ ກັບ​ການ​ນຳ​ອະ­ດີດ ສ ໂຊ​ວຽດ ລົງ​ນາມ​ກັນ​ໃນ​ວັນ​ທີ 8 ທັນ­ວາ 1987.

    ຕະ­ຫຼອດ 30 ກວ່າ​ປີ ສອງ​ຝ່າຍ​ຕ່າງ​ກໍ​ກ່າວ​ຫາ​ເຊິ່ງ​ກັນ ແລະ ກັນ ໂດຍ​ຝ່າຍ​ອາ​ເມ​ຣິ​ກາ ບອກ​ວ່າ: ຣັດ​ເຊຍ ພັດ­ທະ­ນາ​ຢ່າງ​ລັບໆ​ຂີ​ປະ​ນາ​ວຸດ​ທີ່​ຕ້ອງ​ຫ້າມ​ໃນ​ຂໍ້​ຕົກ­ລົງ ເປັນ­ຕົ້ນ ແມ່ນ​ລູກ​ສອນ​ໄຟ “Novator 9 M 729) ສ່ວນ​ຣັດ​ເຊຍ ລະ­ບຸ​ວ່າ: ການ​ທີ່​ອາ​ເມ​ຣິ​ກາ​ສ້າງ​ລະ­ບົບ AEGIS Ashore ເທິງ​ເຮືອ​ຮົບ​ທີ່​ສາ­ມາດ​ຍິງ​ຂີ​ປະ​ນາ​ວຸດ “ໂທ​ມາ​ຣ໋ອກ” ກັບ ມິສ​ໄຊ ສະ­ກັດ​ຂີ​ປະ​ນາ​ວຸດ ກໍ​ເປັນ​ການ​ລະ­ເມີດ INF ເຊັ່ນ​ກັນ.

    ເລື່ອງ​ມາ​ຮ້າຍ​ແຮງ​ຂຶ້ນ​ເມື່ອ​ວັນ​ທີ 18 ສິງ­ຫາ 2019 ອາ​ເມ​ຣິ​ກາ ໄດ້​ຍິງ​ທົດ​ລອງ​ລູກ​ສອນ​ໄຟ​ຕິດ​ປີກ ໄລ­ຍະ​ໄກ​ກວ່າ 500 ກິ­ໂລ­ແມັດ ເຊິ່ງ​ຍິງ​ຈາກ​ເກາະ San Nicolas ໄຄ​ແຕ່​ວ່າ​ຖືກ​ເປົ້າ​ໝາຍ.

    ຕໍ່​ບັນ­ຫາ​ນີ້ ວິ­ທະ­ຍຸ​ກະ­ຈາຍ­ສຽງ​ຫວຽດ­ນາມ (VOV WORLD) ສະ­ບັບ​ອອນ​ລາຍ ລົງ​ວັນ​ທີ 22 ສິງ­ຫາ 2019 ໄດ້​ລົງ​ພິມ​ບົດ​ໃນ​ຫົວ­ຂໍ້: ການ​ກະ­ທຳ​ຂອງ​ອາ​ເມ​ຣິ​ກາ ກໍ່​ຄວາມ​ວິ­ຕົກ​ກັງ­ວົນ​ຕໍ່​ການ​ຊ່ວງ​ເສັງ​ອາ­ວຸດ ມີ​ບາງ​ຈຸດ​ຂຽນ​ວ່າ: ທັງ​ຣັດ​ເຊຍ ແລະ ສປ ຈີນ ໄດ້​ຕຳ​ໜິ​ຢ່າງ​ຮຸນ​ແຮງ ແລະ ກ່າວ​ເຕືອນ​ຜົນ​ຮ້າຍ​ຢ່າງ​ໜັກ­ໜ່ວງ​ຈາກ​ການ​ກະ­ທຳ​ຂອງ​ອາ​ເມ​ຣິ​ກາ ວັນ​ທີ 22 ສິງ­ຫາ ສປຊ ໄດ້​ຈັດ​ກອງ​ປະ­ຊຸມ​ດ່ວນ​ຕາມ​ຮູບ​ການ ເປີດ​ດ້ວຍ​ບົດ​ລາຍ​ງານ​ຈາກ​ຜູ້­ຕາງ­ໜ້າ​ເລ­ຂາ­ທິ­ການ​ແຫ່ງ ສປຊ ເລື່ອງ​ອາ​ເມ​ຣິ​ກາ ຍິງ​ລູກ​ສອນ​ໄຟ ພາຍ­ຫຼັງ INF ຖືກ​ຢຸດ­ຕິ ແລະ ສົນ­ທິ­ສັນ­ຍາ​ຫຼຸດ­ຜ່ອນ​ອາ­ວຸດ START NEW ມີ​ຄວາມ​ສ່ຽງ​ບໍ່​ໄດ້​ຕໍ່​ກຳ­ນົດ​ພາຍ­ຫຼັງ​ປີ 2021 ໄດ້​ເຮັດ​ໃຫ້​ຫາງ​ສຽງ​ໂລກ​ມີ​ຄວາມ​ວິ­ຕົກ​ກັງ­ວົນ​ຢ່າງ​ແທ້​ຈິງ ໃນ​ສະ­ພາບ​ປັດ­ຈຸ­ບັນ ບໍ່​ວ່າ​ບາດ­ກ້າວ​ເດີນ​ໃດ​ທີ່​ໄປ​ໄວ​ໂພດ ກໍ​ຈະ​ເກີດ​ຄວາມ​ສ່ຽງ​ຕໍ່​ການ​ຊ່ວງ​ເສັງ​ອາ­ວຸດ​ໃໝ່.

    ສະ­ເໜີ​ແລກ­ປ່ຽນ.

ແນວ​ລາວ

ຂ່າວທີ່ກ່ຽວຂ້ອງ