ຂ່າວຫຼ້າສຸດ

ເກີນ​ດຸນ​ບ້ວງ​ເງິນ​ໝູນວຽນ​ຂອງ​ເມັກ​ຊິກ ບັນລຸ​ສູງ​ສຸດ​ໃນ​ຮອບ​ຫຼາຍ​ສິບ​ປີ

364 02 ກ.ຍ. 2019 ຂ່າວຕ່າງປະເທດ
ເກີນ​ດຸນ​ບ້ວງ​ເງິນ​ໝູນວຽນ​ຂອງ​ເມັກ​ຊິກ ບັນລຸ​ສູງ​ສຸດ​ໃນ​ຮອບ​ຫຼາຍ​ສິບ​ປີ

    ທະນາຄານ​ກາງຂອງ​ເມັກ​ຊິກ (Banxico) ແຈ້ງ​ໃຫ້​ຮູ້ເມື່ອ​ບໍ່​ດົນ​ມາ​ນີ້​ວ່າ ເມັກ​ຊິກ​ໄດ້​ບັນລຸ ລະດັບ​ເກີນ​ດຸນ​ບ້ວງ​ເງິນ​ໝູນວຽນ​ກວ່າ 5 ຕື້ ໂດ​ລາ​ສະຫະລັດ ພາຍ​ໃນ​ໄຕ​ມາດ 2/2019 ນັບ​ວ່າ​ເປັນ​ລະດັບ​ສູງ​ສຸດ ນັບ​ແຕ່​ປີ 1980 ເປັນຕົ້ນ​ມາ ຊຶ່ງ​ໄດ້​ຍ້ອນ​ມູນ​ຄ່າ​ການ​ສົ່ງ​ອອກ​ສິນຄ້າ ແລະ ເງິນ​ທີ່​ຊາວ​ເມັກ​ຊິກ​ຕ່າງ​ດ້າວ​ສົ່ງ​ກັບ​ຄືນ​ປະເທດ ເພີ່ມ​ຂຶ້ນ​ຢ່າງ​ແຮງ ໃນ​ຂະນະ​ທີ່ ການ​ນຳ​ເຂົ້າ​ສິນ ຄ້າ​ຫຼຸດ​ລົງ.

    ຕົວ​ເລກ​ຂອງ Banxico ຊີ້​ໃຫ້​ເຫັນ​ວ່າ ການ​ສົ່ງ​ອອກ​ສິນຄ້າ​ຂອງ​ເມັກ​ຊິກ ໃນ​ໄລຍະ​ເວລາ ແຕ່​ເດືອນ​ເມສາ ຫາ​ເດືອນ​ມິຖຸນາ ປີ 2019 ບັນລຸ​ກວ່າ 119 ຕື້ ໂດ​ລາ​ສະຫະລັດ ໃນ​ຂະນະ​ທີ່ ການ​ນຳ​ເຂົ້າ​ສິນຄ້າ​ບັນລຸ​ມູນ​ຄ່າ​ພຽງ​ທີ່​ລະດັບ​ກວ່າ 114 ຕື້​ໂດ​ລາ​ສະຫະລັດ.

    ຢູ່​ໃນ​ຂົງເຂດ​ການ​ດຶງ​ດູດ​ເງິນຕາ​ສົ່ງ​ກັບ​ປະເທດ​ນັ້ນ ເມັກ​ຊິກ​ໄດ້​ຮັບ​ເງິນ​ກວ່າ 9 ຕື້​ໂດ​ລາ ສະຫະລັດ ພາຍ​ໃນ​ໄຕ​ມາດ 2/2019 ເພີ່ມ​ຂຶ້ນ 18,8% ເມື່ອ​ທຽບໃສ່​ໄຕ​ມາດ 1/2019 ແລະ ເພີ່ມ​ຂຶ້ນ 3,8% ເມື່ອ​​ຽບ​ໃສ່​ໄຕ​ມາດ 2/2018.

    ໃນ​ຂະນະ​ດຽວ​ກັນ ຄວາມ​ກ້ຳ​ເກິ່ງ​ທາງ​ດ້ານ​ການ​ຄ້າ​ໂດຍ​ປາສະຈາກ​ນ້ຳມັນ ຂອງ​ເມັກ​ຊິກ ໃນ​ໄຕ​ມາດ 2/2019 ເກີນ​ດຸນ​ສູງ​ທີ່​ເກືອບ 11 ຕື້​ໂດ​ລາ​ສະຫະລັດ ເພີ່ມ​ຂຶ້ນ 270% ເມື່ອ​ທຽບໃສ່​ໄຕ​ມາດ 1/2019 ແລະ ເພີ່ມ​ຂຶ້ນ 297% ເມື່ອ​ທຽບໃສ່​ໄຕ​ມາດ 2/2018. ໃນ​ທາງ​ກົງກັນຂ້າມ ບັນດາ​ຜະລິດ​ຕະ​ພັນ​ນ້ຳມັນ ພັດ​ຊີ້​ໃຫ້​ເຫັນ​ເຖິງ​ການ​ຂາດ​ດຸນ​ຫຼາຍ​ພໍ​ສົມຄວນ ຄື​ທີ່​ເກືອບ 6 ຕື້​ໂດ​ລາ​ສະຫະລັດ.

    ເກີນ​ດຸນ​ບ້ວງ​ເງິນ​ໝູນວຽນ​ຂອງ​ເມັກ​ຊິກ ໄດ້​ຮັບ​ການ​ຢືນຢັນ​ຢູ່​ທີ່​ລະດັບ 1,6% ຂອງ​ຍອດ ຜະລິດ​ຕະ​ພັນ​ພາຍ​ໃນ​ປະເທດ (GDP) ໃນ​ໄຕ​ມາດ 2/2019. Banxico ໃຫ້ການ​ຕີ​ລາຄາ​ວ່າ ນີ້​ເປັນ​ສິ່ງ​ບົ່ງ​ບອກ​ທີ່​ໜ້າ​ພູມໃຈ ເພາະວ່າ​ໃນ​ໄຕ​ມາດ​ດຽວ​ກັນ​ຂອງ​ປີ 2018 ບ້ວງ​ເງິນ​ໝູນວຽນ ຂອງ​ເມັກ​ຊິກ ຖືກ​ຂາດ​ດຸນ​ໄປ 1,1% ຂອງ GDP.

    ກະຊວງ​ເສດຖະກິດ​ຂອງ​ເມັກ​ຊິກ ໃຫ້​ຮູ້​ວ່າ ຄວາມ​ເຕີບ​ໂຕ​ທາງ​ດ້ານ​ເສດຖະກິດ ຂອງ​ເມັກ​ຊິກ ໃນ​ໄຕ​ມາດ​ທີ 2/2019 ບັນລຸ​ພຽງ​ທີ່ 0,1%. ໃນ​ຂະນະ​ດຽວ​ກັນ ເມື່ອ​ບໍ່​ດົນ​ມາ​ນີ້ ກອງ​ທຶນ​ເງິນຕາ​ສາກົນ  ໄດ້​ປັບ​ຫຼຸດ​ຕົວ​ເລກ​ຄາດ​ຄະເນ​ຄວາມ​ເຕີບ​ໂຕ​ເສດຖະກິດ​ຂອງ​ເມັກ​ຊິກ  ໃນ​ປີ 2019 ຈາກ 1,6% ລົງ​ໄປ​ຍັງ​ເຫຼືອ 0,9%.

ຂ່າວທີ່ກ່ຽວຂ້ອງ